Lukas 10 - Nuevo Testamento Romané 2007

O Jesus bichalel e eftavardes ta duie llenen

¹ Mapalal o Gazda esvirisarda i avere eftavardes ta duie llenen, ta bichalda len dui po dui angla le te llan ande sa e forura ta kai suako rig kai vou saia te llal.

² Ta ppenda lenge: —Chachimaia o lliu si but a cherricha e manusa kai radin. Goleke molintumen e Gazdake te bichalel llenen kai radin te chiden o lliu.

³ Llan tumen; ttoven sama kai bichalau tumen sargo bakrorre maskar e ruva.

⁴ Na inllaren love ni jape ni minie; ta na den orba nikaia e dromea.

⁵ Kana ka den ande iek cher, mai anglal ppenen sar san, ‘e Pas te avel ande gava cher.’

⁶ A te avena kote llene pachivale, so manglen lenge ka cherdol; a te na avela gia, tumen ni ka jasaren niso.

⁷ Achen isto ande gua cher, jan ta pien katar so si len, soke gua kai radil morabi te pochindol leke. Na llan cher cherete.

⁸ Kana ka aven ande iek foro kai ka aven tumenchar pachivale, jan so ka den tumen.

⁹ Sastaren e nasualen kai si kote ta ppenen lenge: ‘E charoina e Devleki ia si pase tumende.’

¹⁰ A te avilen ande iek foro kai ni ka aven tumenchar pachivale, liken pe droma ta ppenen:

¹¹ ‘¡Llik o prajo tumare foroko kai lipisailo pe amare porrne chinosarale, te llanen kai ni avilen amenchar pachivale! A llanen gava, kai e charoina e Devleki ia si pase tumende.’

¹² Ppenau tumenge kai ande gua llive, e duk kai ka delpe gole foroke ka avel mai bari neko e llenenge kai zivina ande Sodoma.

E llene kai ni pachan

¹³ “¡Tesko chuke, Korazin! ¡Tesko chuke Betsaida! Soke te cherdilea ando Tiro ta ando Sidon e bare ezgode Devlikane kai cherdile tumende, von ollikana irisailea katar pe bilache droma ande patave zalosne ta chudiea prajo pe po soro.

¹⁴ A ando llive e krisako tumen ka aven mai dukkade neko e llene katar o Tiro ta katar o Sidon.

¹⁵ A tu, foro katar o Kapernau, ¿misli kai ka ave vazdino llik ando miloso? Ka fulie llik kai e charoina e merimaki.

¹⁶ “Gua kai asunel tumen, asunel man; ta gua kai ni kamel tumen, ni kamel man; ta ko ni kamel man, ni kamel gole kai bichalda man.”

E eftavardes ta dui disipulura irinpe

¹⁷ E eftavardes ta dui irisaile but vesele ta ppenena: —¡Gazda, llik e duura bilache kanden amen ande cho anau!

¹⁸ O Jesus ppenda lenge: —Ea, me dikklem sar o Satanas pelotar katar o miloso sargo iek esterlicha.

¹⁹ Me diem tumen zor te nakken upral pe sapa ta pe alakranura, ta suako zor e dusmanoki te jasarel tumenchar, ta te na nakke ni iek duk.

²⁰ A na veselin tumen kai e duura kanden tumen, veselin tumen soke tumaro anau si pisime ando miloso.

Samo o Jesus llanel ko si o Dad

²¹ Ondaka o Jesus veselime katar o Santo Duo ppenda: “Blagosiu tut, Dade, Gazda e milosoko ta i e ppuviako, soke gurudan gala ezgode katar e bizai ta katar e llangle ta sikadanlen e minonenge. Ea Dade, soke gia avila chuke drago te cherele

²² “Mo Dad dia mande sa e ezgode. Niko ni llanel ko si o Chavo, samo o Dad, ta niko ni llanel ko si o Dad, samo o Chavo ta o Chavo sikavel le kake vou mangela.”

²³ Ondaka dikkla pe disipulura, ta ppenda samo lenge: “Vesele gola kai ka dikken so tumen dikken;

²⁴ goleke ppenau tumenge kai but poraukura ta charura mangle te dikken so tumen dikken, ta ni dikkle; ta te asunen so tumen asunen, ta ni asunde.”

E paramichi katar o lacho samaritano

²⁵ Iek kovachi e zakonoko llelo te del orba e Jesusea, ta te zumavel le puchla le: —Kovachi, ¿so morabi te cherau te lau o zivoto ostade?

²⁶ O Jesus ppenda leke: —¿So si pisime ando zakono? ¿Sar chitisarele?

²⁷ O kovachi e zakonoko ppenda: —‘Volisar e Gazda cho Del sa che liea, sa che duoia, sa che zoriaia, ta sa che misloia’; ta volisar avere sar voli tu tut.’

²⁸ O Jesus ppenda leke: —Sukar dian orba. Te cherdan gua ka avel tut o zivoto.

²⁹ A o kovachi e zakonoko mangela te chacharel so puchla, ta ppenda e Jesuseke: —¿A ko si e llene kai si pasa ma?

³⁰ Ondaka o Jesus ppenda leke: —Iek manus fuliela katar o drom kai llal katar o Jerusalem llik kai o Jeriko, ta jutle pe lete iek kochkaria kai chorde letar sa llik leke patave. Marde le ta lleletar ta mukle le sargo mulo.

³¹ Ondaka iek popo nakkela isto katar gua drom; ta kana dikkla le, nakklo truial le ta llelotar.

³² Ta i iek levita avilo kote, ta kana dikkla le nakklo truial le ta llelotar.

³³ A iek manus katar e Samaria kai llala isto katar gua drom, kana dikkla le, avila leke zalba.

³⁴ Ondaka avilo pasa le sastarda lake rane zeitinoia ta moliaia, ta ulisarda le e kirpenchar. Mapalal ttoda le isto pe piri zen, inllarda le kai iek cher te soven, ta arakkla le.

³⁵ Ttiarinako, o Samaritano ikanda love kai mola len dui llive radoke ta dialen kai o gazda e chereko ta ppenda leke: ‘Arak gale manuse, ta te dian mai but love, ka pochinau chuke kana me ka iriuman.’

³⁶ ¿Savo katar gala trin cherdilo o llene kai saia pasa o gua kai marde le e kochkaria?

³⁷ O kovachi e zakonoko ppenda: —Gua kai avila leke zalba letar. O Jesus ppenda leke: —Lla ta cher tu isto gua.

O Jesus ando cher e Mariako ta e Martako

³⁸ O Jesus llelotar kotar ta avilo ande iek forichi, kote iek diskinia kai ikkardola Marta lia le ande po cher.

³⁹ E Marta saia la iek ppei kai ikkardola Maria, ta e Maria besli kai e porrne e Jesuseke te asunel so vou ppenela.

⁴⁰ A e Marta izdrala soke saia la but rado, ta avili pasa o Jesus ta ppenda leke: —Gazda, ¿Inai chuke briga kai mi ppei mukel man korkorre sa e radoia? ppen leke te pomozil man.

⁴¹ A o Jesus ppenda lake: Marta, Marta, chuke si briga ta izdra pala but ezgode,

⁴² a si samo iek ezgoda kai trubul. E Maria esvirisarda e mai lachi, ta niko ni ka lel le latar.