Lukas 1 - Nuevo Testamento Romané 2007

¹ But llene mangle te ppenen ando Pisipe sa e ezgode kai o Del cherda maskar amende,

² isto gia sar ppendelen amenge gola kai ande gua vreme sea kote ta kai pomozisarde te ppendol e porouka.

³ Glamno Teofilo, i me rodiem sa prezomaia sar kana lie te llan angle gala ezgode ta avila mange sukar te pisiulen chuke isto gia sar nakkle,

⁴ te sai pinllare o chachipe katar so sikade tut.

Iek suecho ppenel kai ka biandol o Juan gua kai kristil

⁵ Kana o Erodes saia charo katar e Judea, saia iek popo kai ikkardola Zakarias, kai saia iek katar e llene e Abdiaseke. Leki romi ikkardola Elisabet, ta i voi saia katar e vicha e Aaronoki.

⁶ E li dui sea chache angla o Del ta cherena sa prema e zakonura ta niko nasti dosarela len katar niso.

⁷ A len ni saia len minone, soke e Elisabet nasti achela ppari, ta e dui sea but ppure.

⁸ Iek llive kana avilo o vreme te cheren po rado angla o Del e llene kai sea popura e Zakariaseke,

⁹ Ta gia sar sea sikade e popura, esvirisarde maskar pete ta likisto o Zakarias te del ando santuario katar o cher e Devleko te ppabarel o taimano.

¹⁰ Ta kana ppabola o taimano, sa e llene molinape avri.

¹¹ Ondaka sikadilo e Zakariaske iek suecho e Devleko, pe porrne, pe rig e chachi katar o ttan kai ppabardola o taimano.

¹² Kana dikkla e suecho, o Zakarias ni llangla so te cherel ta darailo but.

¹³ A o suecho ppenda leke: —Zakarias, na dara, soke o Del asunda cho molipe, ta chi romi e Elisabet ka avel la iek minono, ta ka ttove leko anau Juan.

¹⁴ Ka ave but veselo, ta but llene ka veselinpe kana ka biandol,

¹⁵ soke cho chaurro ka avel baro angla o Gazda. Ni ka piel mol ni rachia, ta mai anglal te biandol ia ka avel pperdo katar o Santo Duo.

¹⁶ Ka cherel te irinpe kai o Gazda lengo Del but llene katar o Israel.

¹⁷ Gava Juan ka llal angla o Gazda, ta ka avel le o Duo ta e zor katar o porauko o Elias, te sai ttovel e daden ande veselia pe chaurrenchar, ta e llene kai ni kanden te sikon te kanden. Gia ka sikavel e llenen te len e Devle.

¹⁸ O Zakarias puchla e suecho: —¿Sar sai llanau chachimaia gava? Soke me sem but ppuro ta i mi romi.

¹⁹ O suecho ppenda: —Me sem o Gabriel, ta radiu e Devleke; vou bichalda man te dau tuia orba ta te dau tut gala lache viaste.

²⁰ A akana sar ni pachaian so ppendem chuke ka ache nemao ta nasti ka de orba lligo ni ka avel o vreme te cherdon sa gala ezgode.

²¹ A llene sea avri ta aduricharena e Zakariase ta chudinape soke ni likela katar o cher e Devleko.

²² Kana o Zakarias likisto, nasti dela lenchar orba. Ondaka acharde kai dikklaia vareso ando cher e Devleko ta dela lenchar orba e vastenchar soke achiloia nemao.

²³ Kana nakkle e llivesa kai o Zakarias saia te radil ando cher e Devleko llelotar kai po cher.

²⁴ Mapalal leki romi e Elisabet achili kkamni, ta panch chon ni likisti katar po cher ta mislilape:

²⁵ O Del cherda mange gava akana te na den man ios ando lallao e llene.

Iek suecho ppenel kai ka biandol o Jesus

²⁶ Pala e sou chon o Del bichalda e suecho o Gabriel ande iek foro katar e Galilea kai ikkardol Nazaret,

²⁷ kote zivila iek diskinia kai ikkardola Maria; voi saia mangli te zinilpe pala o Jose kai saia katar e vicha katar o charo o David.

²⁸ O suecho dia kote kai saia voi ta ppenda lake —¡But blagosime san! O Del si tuia.

²⁹ A kana voi dikkla e suecho chudisaili katar leke alava ta puchlape soke dela laia orba gia.

³⁰ Ondaka o suecho ppenda lake: —Maria na dara, soke maladan dragostia angla o Del.

³¹ Akana ka ache kkamni ta ka avel tut iek minono ta ka ttove leko anau Jesus.

³² Vou ka avel but pinllardo, ka ikkaren le chavo katar o Del e milosoko ta o Del o Gazda, ka cherel le charo, sargo e Davide kai saia katar leki vicha,

³³ te gazdaril ostade po foro katar o Israel, ta leko gazdaripe ni ka merel nikada.

³⁴ Ondaka e Maria ppenda e suechoke: —¿Sar sai avelpe gava, kana me ni sem zinime?

³⁵ O suecho ppenda leke: —O Santo Duo ka avel upral pe tute ta e zor katar o Del e milosoko ka ucharel tut sargo iek oblako. Goleke o minono kai ka biandol ka avel Santo Chavo e Devleko.

³⁶ Ta i e Elisabet kai si katar chi vicha ka avel la iek minono, isto gia sar si ppuri, goia kai ppenena latar kai nasti avena la minone, cherel sou chon sar kai si kkamni.

³⁷ O Del sai cherel sa

³⁸ Ondaka e Maria ppenda: —Me sem esluga e Gazdaki; te cherel manchar o Del isto sar ppendan mange. Ta o suecho llelotar kotar.

E Maria llal kai e Elisabet

³⁹ Ande gola llivesa e Maria lleli oma ande iek foro kai achela pe burdura katar e Judea,

⁴⁰ dia ando cher e Zakariaseko ta o Zakarias ppenda lake sar san.

⁴¹ Kana e Elisabet asunda lako avazi, o baiato miskosailo ande lako lli, ta voi pperdili katar o Santo Duo.

⁴² Ondaka dia orba zurale, ta ppenda: —¡O Del blagosisarda tut mai but neko sa e diskinien, ta blagosisarda che minone!

⁴³ ¿Ko sem me te avel mande e dei katar mo Gazda?

⁴⁴ Samo asundem cho avazi, mo chaurro miskosailo ande mo lli.

⁴⁵ ¡Veselime tu soke pachaian, soke ka cherdol so ppenda chuke o Gazda!

⁴⁶ Ondaka e Maria ppenda: Mo duo blagosil e Gazda.

⁴⁷ Mo duo veselilpe ando Del kai braduil man.

⁴⁸ Soke o Del dikkla pe mande, leki mai minoni esluga, ta katar angla e llene ka ppenen mange veseli;

⁴⁹ soke o Del cherda mange bare ezgode ¡leko anau si Santo!

⁵⁰ E Devleko volipe nikada ni merel pala e llene kai blagosin le.

⁵¹ O Del sikavel pi zor: achavel e llenen kai istardon

⁵² fuliarda e zuralen katar lenge estoliche, A e llenen kai ni istardon ttoda len upre.

⁵³ Pperda lachipe e llenen kai sea bokkale ta tradia e barvalen ta mukla len chuche vastenge.

⁵⁴ Pomozisarda e foro katar o Israel, kai si leko esluga, ta ni bristrailo te avel leke zalba letar.

⁵⁵ Gia dia po alau amare puranenge, e Abraameke ta golenge kai ka aven leko porodo ostade.

⁵⁶ E Maria achili e Elisabetaia preko trin chon, ta mapalal irisali kai po cher.

Sar biandilo o Juan gua kai kristil

⁵⁷ Kana avilo o vreme te maladol e Elisabetake, avila la iek minono.

⁵⁸ E llene kai zivina pase ta leki familia veselisaile but soke llangle kai o Del saia gia lacho laia.

⁵⁹ Pala e ojto llive, llele te cheren leke e sirkunsision, ta mangena te ttoven leko anau sargo leke dadeko, o Zakarias.

⁶⁰ A leki dei ppenda: —Iok. Vou si te ikkardol Juan.

⁶¹ Von ppende lake: —Niko ni ikkardol gia ande chi familia.

⁶² Ondaka puchle e vastenchar, e minoneke dade te llanen savo anau mangela te ttovel vou.

⁶³ Ondaka o dad e minoneko mangla te pisil leko anau pe iek kotor kas, ta pisisarda: “Leko anau si Juan.” Ta sa chudisaile.

⁶⁴ Isto ondaka o Zakarias pale dia orba ta blagosila e Devle.

⁶⁵ Sa e llene kai zivina pase chudisaile, ta ande sa e ppuv e burdonengi katar e Judea dena goia orba.

⁶⁶ Sa e llene kai asunena, mislinpe ta puchenape: ¿sar ka avel gava minono kana ka avel baro? Soke chachimaia o Del blagosila le.

O Zakarias blagosil e Devle

⁶⁷ O Zakarias, o dad e minoneko, pperdo katar o Santo Duo dia orba sargo iek porauko, ta ppenda:

⁶⁸ “¡Blagosime te avel o Gazda, o Del katar o Israel, soke avilo te braduil pe foro!

⁶⁹ Bichalda amenge iek zuralo Braduimari.

⁷⁰ Gua si so ppendaia tumenge omanglal kana dia po alau ta ppenda pe santone poraukonanchar:

⁷¹ Kai ka braduil amen katar amare dusmanura ta katar sa gola kai murzin pe amende,

⁷² ta kai ka avel leke zalba katar amaro foro ta kai ni bristarelpe katar po Santo alau kai dia amen.

⁷³ Gia ppenda o Del kana dia po alau amare dadeke o Abraam: kai ka mukel amen

⁷⁴ te zivi bi darako, ka tradel amendar amare dusmanonen, te radi leke bi darako,

⁷⁵ te zivi samo leke ta ando chachipe, ta te ava lea sa amaro zivoto.

⁷⁶ A tu, chaurrea, ka ikkaren tut porauko katar o Del e milosoko, soke ka lla angla o Gazda ta ka lachare leke droma,

⁷⁷ te sai cherel te llanel leko foro kai lengo bilachipe ka avel prostime, ta kai del len o braduipe.

⁷⁸ Soke pala e zalba kai avila e Devleke, anel amenge upral iek Braduimari sargo kana si o kkam katar iek nevo llive,

⁷⁹ te del villelo golen kai zivin ando mai baro truñariko, ta te inllarel amare estope po drom e lachimako.”

⁸⁰ Ta o minono bariola ta cherdola zuralo ando Duo, ta zivisarda po pusto llik kai o llive kai sikadilo e llenenge katar o foro katar o Israel.