Kolosenses 3 - Nuevo Testamento Romané 2007

¹ Goleke soke tumen te ustilen katar o meripe e Kristoia, morabi te roden e ezgode kai si upre kote kai o Kristo besel pe rig e chachi e Devleki.

² Mislin tumen ande ezgode kai si ando miloso, a na ande ezgode e ppuviake.

³ Soke tumen mulen ta o Del lacharda tumenge te zivin e Kristoia.

⁴ O Kristo si tumaro zivoto ta kana vou ka avel, i tumen ka aven lea ando baripe.

Sar morabi te zivin akana

⁵ Goleke cheren te meren sa gala ezgode e ppuviake kai si ande tumende: niko te na cherel o kurvaluko ta ni e ezgode pogane; achaven tumare bilache mislura ta na muken te inllarel tumen tumari llia e lovengi, soke gaia ezgoda si sargo te llan pala aver dela.

⁶ Soke cheres gala ezgode avel e joli e Devleki pe llene kai ni kanden le;

⁷ ta i tumen omanglal cherena gala ezgode.

⁸ A akana muken sa gala ezgode: e joli, o bilachipe, e brasnia maskar tumende ta e bilache alava.

⁹ Na kojaven iek avere, soke tumen chudien tumendar so sena omanglal ta so cherena,

¹⁰ ta akana si tumen iek nevo zivoto ta sen iek nevo manus kai sa mai lachardol prema o Del kai cherdale, te sai pinllaren le mai but.

¹¹ Akana ni chitilpe te avea griego o te avea judio o te san sirkunsidime o te na avea, ta ni chitilpe te avea katar aver ppuv o te llane o te na llane but ezgode, o te avea esluga o te na avea, soke o Kristo si sa ta si ande sa amende.

¹² O Del volil tumen ta esvirisarda tumen te aven katar o foro santo. Morabi te avel tumen volipe pala aver llene. Morabi te aven lache, proste, postene ta te terpin.

¹³ Terpin iek avereke ta prostin iek avere, a te si vareko dukkado averetar prostisaren tumen. Gia sar o Kristo prostisarda tumen i tumen si te prostin.

¹⁴ A furiadon mai but e volimaia, soke o volipe si kai ka cherel tumen te aven saurre ande iek ttan.

¹⁵ Ta e pas e Kristoki te charoil ande tumare lie, soke goleke ikkarda tumen o Del te sai aven katar iek esnaga ta te aven llene kai llanen te den e fala.

¹⁶ Ta te na bristaren tumen katar e alava e Kristoke ta sikaven iek avere bizaimaia. Den fala ta llilaben e Devleke e salmura ta llilia duoke.

¹⁷ Ta sa so ka cheren o so ka ppenen cherenle ando anau e Gazdako o Jesus, ta den fala e Devle kai si o Dad pala so cherda o Kristo pala tumende.

E familia kai pachal ando Jesus

¹⁸ Tumen romialen morabi te den liubao tumare romen, gava si so morabi te cheren sar trubulpe e diskiniendar, soke tumen pachan ando Gazda.

¹⁹ A tumen romalen morabi te volin tumare romien, ta na joliaon lenchar.

²⁰ Chavalen kande tumare daden pe suako ezgoda, soke gua si drago e Gazdake.

²¹ Tumen e dada na joliaven tumare chaurren, te na jasaren pi zor.

²² Tumen esluge morabi te kanden pe suako ezgoda e llenen kai kate pe ppuv si tumare gazde, na samo kana von dikken tumen te sai achen lache angla e manusa, cherenle e lietar pala o liubao e Gazdako.

²³ Ta sa so ka cheren, cherenle e lietar sargo kana radin e Devleke a na e manusenge.

²⁴ Soke tumen llanen kai o Del ka del tumen katar o chari kai ppenda kai ka del pe foro, soke tumen radin e Kristoke kai vou si tumaro chachuno Gazda.

²⁵ Soke kogo cherel o bilachipe, ka lel o pochindipe katar o bilachipe kai cherda, soke o Del chinel e kris orta saurrenge.