Kolosenses 2 - Nuevo Testamento Romané 2007

¹ Soke mangau te llanen kai radiu but pala tumende, ta i pala e llene kai si ande Laodisea ta i pala sa e llene kai ni dikkle man nikada.

² Radiu pala lende te sai len zor ande po lio, te aven ande iek ttan ando volipe ta te aven barvale ando bizaipe, ta gia te llanen kai so o Del gurudaia ta mangela te cherel cherdale isto ando Kristo.

³ Soke sa o barvalipe katar o bizaipe ta o llanglipe si ando Kristo.

⁴ Gala ezgode ppenaulen tumenge te na kojavel tumen niko pe nisave alava kai asundon sukar.

⁵ I te na avava tumenchar, sem tumenchar ando duo ta veseliu man kai dikkau kai cheren e ezgode sar trubulpe, ta kai sen zurale ande tumaro pachape ando Kristo.

⁶ Goleke sar lien e Jesukristo sar tumaro Gazda, morabi te zivin sar vou mangel.

⁷ Ta gia te barion ta te aven istarde po Kristo ando pachape gia sar sikilen te den fala e Devle suako llive ta den suako drom fala e Devle.

⁸ Ta arakken tumen: na ttoven sama golenge kai mangen te kojaven tumen alavenchar kai asundon bizai, soke gua bizaipe si e manusengo. Von ttoven sama e duonenge zurale kai si gale suetoke ta ni ttoven sama e Kristoke.

⁹ Soke sa so si o Del, dikkol ando Kristo.

¹⁰ Ta vou gazdaril pe sa e duura kai len si zor ta gazdarin.

¹¹ Ta ande lete i tumen sena sirkunsidime, na katar iek sirkunsision cherdi e manusendar, tumen lien e sirkunsision cherdi e Devletar kana ttoda tumen ande iek ttan e Kristoia ta gia lia tumendar e esnaga kai mangel te cherel o bilachipe.

¹² Kana kristisarde tumen, prajosarde tumen e Kristoia, ta i tumen ustilen lea katar o meripe, soke pachaien ande zor e Devleki kai vazdia le katar o meripe.

¹³ Omanglal tumen sena mule cheres tumaro bilachipe a akana o Del dia tumen zivoto ande iek ttan e Kristoia, ta cheres lete prostisarda amen katar sa o bilachipe.

¹⁴ O Del prostisarda o unllilipe kai saia amen pe iek lil kai ppandela amen, ta ppagla so saia ande gua lil, ta kafrosarda le po krusto.

¹⁵ O Del lia e duonendar lengi zor ta lengo gazdaripe, ta pala o Kristo ttoda len ando lallao angla sa, ta inllarda len ppangle kana dobisarda len po krusto.

¹⁶ Goleke niko te na dosarel tumen katar so jan o pien, o katar e ezgode sargo e llivesa veselimake o e chona neve o e sabadura.

¹⁷ Sa gala ezgode si samo e senka katar so si te avel, a o chachuno chachipe si o Kristo.

¹⁸ Na muken te dosaren tumen gola kai cherenpe proste manus ta kai blagosin e suechonen; ppenen kai sikadon lenge sargo sune, pukkon barimatar a mislinpe samo ando bilachipe.

¹⁹ Gola llene inai ande iek ttan e Kristoia a vou cherel te bariol sa e esnaga kana del la te jal ta kana ttovel ta cherel te radil sa pe po ttan gia sar mangla o Del.

Zivisara sar o Del mangel

²⁰ Tumen mulen e Kristoia ta akana ni sen ppangle pe zoria kai gazdarin pe gaia ppuv. A te si gia, ¿Soke pale zivin sargo omanglal ta cheren e ezgode gale suetoke

²¹ sargo gala: “Na dodisar gua, na ja goia ezgoda, na dodizar la che vastenchar”?

²² Sa gala ezgode kai si ttode te cheralen o vreme nakkel ta si te na aven ios, soke samo si zakonura manusenge.

²³ De istina si kai gola ezgode sai dikkon kai si len bizaipe, soke mangen katar o manus te avel mai Devlikano ta prosto ta te trudilpe but. A gala ezgode ni achaven o bilachipe gale suetoko.