Juan 8 - Nuevo Testamento Romané 2007

¹ A o Jesus llelotar po burdo e Maslinkengo,

² ta ttiarinako rano pale irisailo kai o cher e Devleko. E llene avile lete; ta vou besindo sikavela len.

³ Ondaka e kovacha e zakonoke ta e fariseura ande lete iekke diskinia kai maladea ando kurvaluko, ta ttode la po maskaral katar sa e llene,

⁴ ta ppende leke: —Kovachi, maladam gale diskinia kana cherela kurvaluko.

⁵ Ando zakono, o Moises ppenel amenge te mundara barrenchar gale diskinien. ¿A tu so ppene?

⁶ Von ppenena gava te zumaven le, te sai dosaren le. A o Jesus bangilo ta ttodape te pisil pe ppuv e naiea.

⁷ Ta sar von puchena le but droma, ortosailo ta ppenda lenge: —Te chudel o purvo barr ko tumendar ni cherda bilachipe.

⁸ Ta pale bangilo ta i pale ttoda te pisil pe ppuv.

⁹ Kana von asunde gava achardepe dosale ta ttode te llantar iek pala iek, katar o mai purano llik kai o mai terno. Kana o Jesus dikkla kai achilo samo vou ta e diskinia kai achilia po maskaral,

¹⁰ ortosailo ta puchla la —Chei ¿kai talen gola kai dosarena tut? ¿Niko ni dosarel tut?

¹¹ Voi ppenda: —Ea Gazda niko ni dosarda man. O Jesus ppenda lake: —Ni me ni dosarau tut; llatar ta na cher ios bilachipe.

O Jesus, o villelo e suetoko

¹² O Jesus pale dia orba e llenenge, ta ppenda lenge: —Me sem o villelo e suetoko; ko pachal ande ma, ni ka llal ando truñariko ta ka avel le o villelo e zivotoko.

¹³ Ondaka e fariseura ppende leke: —Tu de orba isto tutar: Gola orbe inai chache.

¹⁴ O Jesus ppenda lenge: —Te dau orbe chache isto me mandar, so ppenau si o chachipe, soke llanau katar avilem ta i kai llau; a tumen ni llanen le.

¹⁵ Tumen krisisaren sar krisisaren e manusa. Me ni krisisarau nika;

¹⁶ a te krisisarava, mi kris si chachuni, soke inai sem korkorre, soke o Dad kai bichalda man, i vou krisisarel manchar.

¹⁷ Ande tumaro zakono ppenel kai dui llene te dena isto iek orba gua si chachipe.

¹⁸ Isto me dau orba lachi me mandar, ta o Dad kai bichalda man, i vou del orba lachi mandar.

¹⁹ Von puchle le: —¿Kai talo cho dad? —O Jesus ppenda lenge: —Tumen ni pinllaren man, ta ni pinllaren me Dade; te pinllardena man, pinllardena i me Dade.

²⁰ O Jesus ppenda gala alava kana sikavela ando cher e Devleko kote kai guruvena e love kai dena e Devleke. Ta niko ni ppangla le soke ni ios ni aviloa leko llive.

“Kai me llau, tumen nasti llan”

²¹ O Jesus ppenda lenge pale: —Me llautar, ta ka roden man, A ka meren ande tumaro bilachape, kote kai me llau tumen nasti llan.

²² Ondaka e judiura ttode te ppenen: —¿So, ka mundarel isto vou pe, soke ppenel: Kote kai me ka llau tumen nasti llan?

²³ O Jesus ppenda lenge: —Tumen sen e ppuviake, me sem katar o miloso; tumen sen gale suetoko, me inai sem gale suetoko.

²⁴ Goleke ppendem tumenge kai ka meren ande tumaro bilachipe; soke te na pachana kai me sem, ande tumaro bilachipe ka meren.

²⁵ Ondaka puchle le —¿Ko san tu? O Jesus ppenda: —Me sem so mai anglal ppendem tumenge.

²⁶ Si man but ezgode te ppenau ta te krisiu tumendar, a gua kai bichalda man ppenel o chachipe, ta me so asundem letar, gua ppenau e suetoke.

²⁷ Ta von ni acharde kai dela lenge orba katar po Dad.

²⁸ Goleke ppenda lenge: —Kana ka vazden e Chave e manuseke, ondaka ka acharen kai me sem, ta kai niso ni cherau me mandar, soke so sikada man o Dad gua ppenau.

²⁹ Soke gua kai bichalda man si manchar; mo Dad ni mukla man korkorre, soke me suako llive cherau so si leke drago.

³⁰ Kana o Jesus ppenda gala ezgode, but llene pachaie ande le.

E chave e Devleke ta e esluge katar o bilachipe

³¹ O Jesus ppenda e judionenge kai pachaiea ande lete: —Te achena tumen ande mo alau, chache ka aven me disipulura;

³² ka pinllaren o chachipe, ta o chachipe ka braduil tumen.

³³ Von ppende leke: —Amen sam katar e vicha e Abraameki ta nikada ni sama esluge nikake; ¿sar tu ppene kai amen ka ava braduime?

³⁴ O Jesus ppenda lenge: —Chachimaia ppenau tumenge kai kogo cherel bilachipe, si esluga katar o bilachipe.

³⁵ Iek esluga ni achel ostade ande iek familia; a o chavo achel ostade ande familia.

³⁶ Goleke, te braduila tumen o Chavo, tumen ka aven de istina braduime.

³⁷ Llanau kai tumen sen katar e vicha e Abraameki; a tumen mangen te mundaren man, soke tumen ni pachaien ande me alava.

³⁸ Me ppenau so dikklem pasa mo Dad; isto gia, tumen ppenen so asunden pasa tumaro dad.

³⁹ Von ppende leke: —¡Amaro dad si o Abraam! O Jesus ppenda lenge: —Te avilena tumen chave e Abraameke, cherdena so cherda o Abraam.

⁴⁰ A akana mangen te mundaren man kana me ppendem tumenge o chachipe kai sikada man o Del. ¡O Abraam nikada ni cherda iek ezgoda gia!

⁴¹ Tumen cheren e buchi tumare dadeki. Von ppende leke: —¡Amen ni biandilam katar o kurvaluko; Iek Dad si amen, o Del!

⁴² O Jesus ppenda lenge: —Te aviloa tumaro dad o Del, tumen volisardena man, soke me avilem e Devletar. Ni avilem me mandar, o Del bichalda man.

⁴³ ¿Soke ni acharen so ppenau tumenge? Soke tumen nasti asunen me alava.

⁴⁴ Tumaro dad si o llavolo, ta so si leke drago gua si so tumen mangen te cheren. O llavolo suako llive mundarda, ta ni achilo ando chachipe, ta nikada ni ppenel o chachipe ta kana kojavel del orba prema so si vou soke si iek kojamno ta vou si o dad katar o kojaipe.

⁴⁵ A me kai ppenau o chachipe, tumen ni pachan.

⁴⁶ ¿Ko tumendar sai ppenel savo bilachipe cherau? A te ppenava o chachipe ¿soke tumen ni pachan man?

⁴⁷ Ko si e Devleko, asunel e Devleke alava; goleke tumen ni kamen te asunen len, soke ni sen e Devleke.

O Kristo saia mai anglal neko o Abraam

⁴⁸ Ondaka e judiura ppende e Jesuseke: —Amen ppendam sukar kai tu san samaritano, ta kai iek llavolo si ande tute.

⁴⁹ O Jesus ppenda lenge: —Ande mande inai o llavolo. Me dau liubao me Dade; a tumen ni den man liubao.

⁵⁰ Me ni rodau te den orba lachi mandar e llene; o Del si gua kai mangel le gia, a vou si gua kai krisil.

⁵¹ Chachimaia ppenau tumenge, kai ko kandela mo alau, ni ka merel.

⁵² E judiura ppende leke: —Akana llana kai o llavolo si ande tute. O Abraam ta sa e poraukura mule, a tu ppene: ‘Kogo kandel mo alau ni ka merel’.

⁵³ ¿So san tu mai baro neko amaro dad o Abraam? Vou mulo ta i e poraukura mule. ¿Ko misli kai san tu?

⁵⁴ O Jesus ppenda: —Te dau orba lache isto me mandar, gua ni mol mange niso. Mo Dad si kai del orba lachi mandar, isto gua kai tumen ppenen kai si tumaro Del.

⁵⁵ A tumen ni pinllaren le. Me pinllarau le; a te ppenava kai ni pinllarau le, avilema kojamno sargo tumen. A me pinllarau le ta kandau leko alau.

⁵⁶ O Abraam tumaro dad, veselisailo soke saia te dikkel mo llive; ta dikkla le ta veselisailo.

⁵⁷ E judiura ppende e Jesuseke: —Ni ios inai chuke ni pinda burs, ¿ta ppene kai dikklan e Abraame?

⁵⁸ O Jesus ppenda lenge: —Chachimaia ppenau tumenge; kai me sem mai anglal neko o Abraam.

⁵⁹ Ondaka lie peke barra te chuden ande lete; a o Jesus gurudilo ta likisto katar o cher e Devleko.