Juan 7 - Nuevo Testamento Romané 2007

E pplal e Jesuseke ni pachan ande le

¹ Mapalal katar gala ezgode o Jesus llala ande ppuv katar Galilea. Ta ni kamela te llal katar e Judea, soke e judiura mangena te mundaren le.

² Ta saia pase e eslava katar e cherorra kai cherdon katar e patra, iek eslava e judionengi,

³ ta leke pplal ppende leke: —Na achi kate; llatar ande ppuv katar Judea te dikken che disipulura e buchi kai chere.

⁴ Soke ko mangel te avel pinllardo, ni cherel niso po chorial. Te cherea gala ezgode, cher len angla sa o sueto.

⁵ Von ppende gala orbe soke ni von ni pachana ande lete.

⁶ O Jesus ppenda lenge: —Mo llive ni ios ni avilo, a tumenge suako llive kai avel si lacho.

⁷ O sueto nasti murzil pe tumende; a pe mande murzil, soke me sikavau bristomaia kai von cheren o bilachipe.

⁸ Llan tumen pe goia eslava; me ni llau, soke mo llive ni ios ni avilo.

⁹ Ppenda lenge gava, ta achilo ande ppuv katar e Galilea.

O Jesus pe eslava katar e cherorra kai cherdon e patrenchar.

¹⁰ Kana leke pplal lleletar, i o Jesus llelo pe eslava, ta llelo po chorial.

¹¹ E judiura rodena le pe eslava, ta ppenena: —¿Kai talo?

¹² Ta saurre dena leki orba. Nesave ppenena: “Lacho si”; ta aver ppenena: “Iok, kojavel e foro”

¹³ Ta niko ni dela leki orba angla e llene soke darana katar e judiura.

¹⁴ Kana nakklia dopas katar e eslava, o Jesus dia ando cher e Devleko ta sikavela.

¹⁵ E judiura chudinape ta ppenena: —¿Sar llanel gava pe gachin ezgode kana nikada ni sikilalen?

¹⁶ O Jesus ppenda lenge: —So sikavau inai mandar, so sikavau avel goletar kai bichalda man.

¹⁷ Kogo mangela te cherel e volia e Devleki, ka pinllarel dal si e Devleko so me sikavau, o dal me ikanau gava me mandar.

¹⁸ Kogo ppenel vareso vou petar, rodel te falil vou pe; a me samo mangau te den liubao me Dade kai bichalda man; goleke suako drom ppenau o chachipe.

¹⁹ “¿Ni dia tumen o Moises o zakono? a niko tumendar nikamel te kandel so ppenel o zakono. ¿A soke roden te mundaren man?”

²⁰ E llene ppende leke: —¡Ande tute si iek llavolo! ¿Ko rodel te mundarel tut?

²¹ O Jesus ppenda lenge: —Iek ezgoda cherdem ando sabado, ta saurre chudisailen.

²² De istina, o Moises dia tumen e sirkunsision (kai ni avili katar o Moises, avili katar e purane), a tumen sirkunsidin e muruse i ando sabado.

²³ Te lela o murus e sirkunsision ando sabado, te na bangaren e Moiseseko zakono, ¿soke joliaon pe mande kai ando sabado sastardem iekke llene?

²⁴ Na ttoven kris pe so tumen mislin kai gia si. Kana ka krisin cheren le chachimaia.

Ko si o Jesus

²⁵ Ondaka nesave llene katar o Jerusalem ppenena gia: —¿Inai gava gole kai roden te mundaren le?

²⁶ Dikken, sar del orba angla saurre, ta ni ppenen leke niso, ¿Sai avelpe kai i e sudura pachan kai de istina vou si o Mesias?

²⁷ A amen llana katar si gava; kana ka avel o Mesias, niko ni ka llanel katar avel.

²⁸ O Jesus saia ando cher e Devleko kana asunda gala orbe ta ando baro avazi ppenda: —¡Tumen mislin kai pinllaren man ta mislin kai llanen katar avau! Me ni avilem me mandar, a gua kai bichalda man si chachuno, ta gale tumen ni pinllaren.

²⁹ A me pinllarau le, soke letar avau, vou bichalda man.

³⁰ Ondaka mangena te ppanden le, ta niko ni ttoda o va pe lete, soke ni ios ni aviloia leko llive.

³¹ But llene pachaie ande lete, ta ppenena: —Kana ka avel o Mesias, ¿ka cherel mai but bare ezgode Devlikane neko gala kai cherel gava?

E fariseura mangen te ppanden e Jesuse

³² E fariseura asunde kai but llene ppenena gava letar; a von ta e mai preche popura bichalde e boñikura te ppanden e Jesuse.

³³ Ondaka o Jesus ppenda lenge: —Cherricha ios ka achau tumenchar, ta ka llautar golete kai bichalda man.

³⁴ Ka roden man ta ni ka malaven man soke kote kai me ka avau tumen nasti ka llan.

³⁵ Ondaka e judiura ppenena maskar pete: —¿Kai ka llal gava kai amen nasti ka malava le? ¿Ka llaltar kai e judiura kai si maskar e griegure, ta ka sikavel ande Gresia?

³⁶ ¿So si gava kai ppenda ‘Ka roden man, ta ni ka malaven man, soke kote kai me ka avau tumen nasti te llan’?

O pai o llundo

³⁷ Ando mai baro llive e eslavako, o Jesus ustilo ta ando baro avazi ppenda: Kogo si trusalo te avel mande.

³⁸ Kogo pachal ande mande, sar ppenel o Pisipe, letar ka ezvoril o pai o llundo.

³⁹ Gava ppenda katar o Duo kai ka len gola kai ka pachan ande lete; soke ni ios ni diaia o Duo, ta ni ios o Jesus ni saia blagosime.

E llene fuladon cheres o Jesus

⁴⁰ Neseve llene kai sea kote, kana asunde gala alava, ppende: —Chache si gava o porauko.

⁴¹ Aver ppenena: —Gava si o Mesias A aver ppenena: —Iok, soke o Mesias nasti te avel katar e Galilea.

⁴² Pisime si kai o Mesias si te avel katar e vicha Davideki, katar o foro kai ikkardol Belen, isto kotar katar saia i o David.

⁴³ Ta fulade sea saurre cheres o Jesus.

⁴⁴ Nesave llene lendar mangena te ppanden le, a niko ni ttoda o va pe lete.

⁴⁵ E boñikura katar o cher e Devleko avile kai e mai bare popura ta e fariseura, ta puchle len: —¿Soke ni anden e Jesuse?

⁴⁶ E boñikuria ppende —¡Nikada niko ni dia orba sargo gava!

⁴⁷ Ondaka e fariseura ppende lenge: —¿I tumen kojadilen?

⁴⁸ ¿A so; vareko katar amare sudura pachaia ande lete, o varesavo fariseo?

⁴⁹ Gala llene, kai ni pinllaren o zakono, von si proketime.

⁵⁰ O Nikodemo, o fariseo kai aviloa kai o Jesus iek drom, ppenda lenge:

⁵¹ —Amaro zakono ppenel kai nasti dosara nika te na asunaia mai anglal gole llene, te sai llana so cherda.

⁵² Ppende leke: —¿I tu san katar e ppuv e Galileaki? Chitisar ta dik kai katar e Galilea nikada ni likisto ni iek porauko.

E kurvichka

⁵³ Mapalal katar gala ezgode suako lleno llelotar kai po cher.