Juan 6 - Nuevo Testamento Romané 2007

O Jesus del te jal panch milie llenen

¹ Ondaka o Jesus llelotar pe o goia rig katar mora e Galileaki, katar e ppuv e Tiberiaki.

² Ta llana pala lete but llene, soke dikkena e bare ezgode Devlikane kai cherela e nasualenchar.

³ Ondaka o Jesus likisto pe iek burdo, ta beslo kote pe disipulonenchar.

⁴ Ta saia pase e Paskua e judionengi.

⁵ Kana o Jesus dikkla kai but llene avilea lete, ppenda e Felipeke: —¿Kai ka china marrno te jan pe gachin llene?

⁶ A vou ppenela gua te dikkel so ka ppenel o Felipe, soke o Jesus llanela so saia te cherel.

⁷ O Felipe ppenda leke: —Dui stotine denariura marrno ni resel ni te jan suako lleno po cherricha.

⁸ Ondaka o Andres, kai saia iek katar e disipulura ta i pplal katar Simon Pedro, ppenda lenge:

⁹ —Kate si iek minono kai si le panch marrne ta dui mache; a ¿so si gava gachine llenenge?

¹⁰ O Jesus ppenda leke: —Ppen saurrenge te besen. Kote saia but char, ta besle preko panch milie murusa.

¹¹ O Jesus lia gola marrne, ta kana dia fala e Devle, fulada pe disipulonenchar ta e disipulura fulade len e llenenchar kai besena. Ta isto gia cherde e machenchar ta dia len pe gachin von mangena

¹² Kana chalile, o Jesus ppenda pe disipulonenge: —Chiden e kotororra kai achile, te na jasaol niso.

¹³ Von kana chidie len, pperde lenchar desudui kotariche katar so achilaia katar e panch marrne.

¹⁴ Gola llene, kana dikkle e bari ezgoda Devlikani kai o Jesus cherdaia, ppende: —Chache si, kai gava si o porauko kai saia te avel ando sueto.

¹⁵ A kana o Jesus llangla kai mangena te len le pe zor te cheren le charo, pale llelotar po burdo, vou korkorre.

O Jesus ppirel pe mora

¹⁶ Kana peli e riat, e disipulura e Jesuseke fuliste kai e mora,

¹⁷ likiste ande iek llimia ta nakkena e mora karing o Kafarnaum. Ia pelia e riat a o Jesus ni aviloia lende.

¹⁸ Ta e mora divosaili soke ppurdela iek balau zurale.

¹⁹ Kana llele panch o sou kilometrura, dikkle kai o Jesus ppirela upral pe mora ta avela kai e llimia, ta von daraile.

²⁰ A o Jesus ppenda lenge: —¡Me sem, na daran!

²¹ Ondaka veselimaia lie le ande llimia, ta avile oma karing llana.

E llene roden e Jesuse

²² Ttiarinako, e llene kai sea pe o goia rig e mora dikkle kai e disipulura lleletar ande purvi llimia kai saia kote ta kai o Jesus ni lleloiatar lenchar.

²³ A aver llimie avilea kote katar o foro kai ikkardol Tiberias pasa o ttan kai jalea o marrno kana o Jesus diaia fala e Devle.

²⁴ Kana dikkle kai o Jesus ni saia kote ni leke disipulura, likiste ande llimie, ta lleletar ando foro kai ikkardol Kafarnaum te roden le.

Jesus, o marrno e zivotoko

²⁵ Kana e llene malade e Jesuse pe o goia rig e mora, puchle le: —Kovachi, ¿kana avilan karinga?

²⁶ O Jesus ppenda lenge: —Chachimaia ppenau tumenge kai tumen ni roden man pala e bare ezgode Devlikane kai cherdem, tumen roden man pala o marrno kai jalen ta chalilen.

²⁷ Na radisaren pala o jape kai jasaol, radisaren pala o jape kai inllarel karing o zivoto. Gava si o jape kai ka dau tumen me, o Chavo e manuseko, soke man esvirisarda o Dad, kai si o Del.

²⁸ Puchle le: —¿Sar morabi te chera e Devleki buchi?

²⁹ O Jesus ppenda lenge —Gaia si e Devleki buchi, te pachan ande gua kai vou bichalda.

³⁰ Ondaka puchle le: —¿Savi ezgoda Devlikani ka chere, te dikka ta te pacha tut? ¿Savi buchi chere?

³¹ Amare purane jale o mana po pusto, gia sar ppenel o Pisipe: ‘Dia len te ja marrno katar o miloso’.

³² O Jesus ppenda lenge: —Chachimaia ppenau tumenge kai o Moises ni dia tumen o marrno e milosoko, mo Dad del tumen o chacho marrno e milosoko.

³³ Soke e Devleko marrno si gua kai fulisto katar o miloso ta del o zivoto e sueto.

³⁴ Von ppende leke: —Gazda de amen suako llive gua marrno.

³⁵ O Jesus ppenda lenge: —Me sem o marrno e zivotoko. Ko avel mande, nikada ni ka avel bokkalo; ta ko pachal ande mande, nikada ni ka trusaol.

³⁶ A me ppendem tumenge, kai tumen dikken man ta ni pachan.

³⁷ Sogo del man o Dad, ka avel mande; ta kogo avel mande ni ka tradau le avri.

³⁸ Soke fulistem katar o miloso, na te cherau so me mangau, avilem te cherau so mangel gua kai bichalda man.

³⁹ Ta e volia katar gua kai bichalda man si te na jasarau ni iekke llene katar gola kai dia man; te sai vazdau len katar o meripe kana ka avel o son e suetoko.

⁴⁰ Soke e volia me Dadeki si gaia: Sa gola kai dikken e Chave, ta pachan ande lete, te avel len zivoto ostade a me ka cherau len te usten katar o meripe kana ka avel o son e suetoko.

⁴¹ Goleke e judiura jolaile lea, soke ppenela: “Me sem o marrno kai fulisto katar o miloso.”

⁴² Ta ppenena: —¿Inai gava o Jesus e Joseeko chavo, kai amen pinllara leke dade ta i leke da? ¿A sar ppenel kai vou fulisto katar o miloso?

⁴³ Ondaka o Jesus ppenda lenge: —Na den bilache orbe mandar maskar tumende.

⁴⁴ Niko nasti avel mande, te na anela le mo Dad kai bichalda man; ta me ka cherau te ustel katar o meripe kana ka avel o son e suetoko.

⁴⁵ Ande lila kai e poraukura pisisarde ppenel: ‘O Del ka sikavel saurren’ Goleke suako lleno kai asunda e Dade, ta sikilo letar ka avel mande.

⁴⁶ “Inai kai vareko dikkla e Dade; samo gua kai avel e Devletar dikkla le.

⁴⁷ Chachimaia ppenau tumenge, kogo pachal ande mande, si le zivoto ostade.

⁴⁸ Me sem o marrno e zivotoko.

⁴⁹ Tumare purane jale o mana po pusto, ta mule;

⁵⁰ a me dau orba katar o marrno kai fulisto e milosotar; kogo jal letar, ni merel.

⁵¹ Me sem o marrno llundo kai fulisto katar o miloso; kogo jala katar gava marrno ka zivil ostade. A o marrno kai me ka dau si mo mas, kai me ka dau pala o zivoto e suetoke.”

⁵² Ondaka e judiura ttode te janpe maskar pete: —¿Sar sai del amen po mas te ja le?

⁵³ O Jesus ppenda: —Chachimaia ppenau tumenge, te na jan o mas katar o Chavo e manuseko ta te na piena leko rat, ni ka avel tumen zivoto ande tumende.

⁵⁴ Ta kogo jal mo mas ta piel mo rat, si le zivoto ostade; ta me ka cherau le te ustel katar o meripe kana ka avel o son e suetoko.

⁵⁵ Soke mo mas si o chachuno jape, ta mo rat o chachuno pipe.

⁵⁶ Kogo jala mo mas ta piela mo rat, ande mande si ta i me ande lete.

⁵⁷ Gia sar bichalda man o Dad ta me ziviu letar, isto gia gua ka pravarelpe mandar, i vou ka zivil mandar.

⁵⁸ Gava si o marrno kai fulisto katar o miloso. Inai sargo o mana kai jale tumare purane ta mule; kogo ka jal katar gava marrno, ka zivil ostade.

⁵⁹ O Jesus ppenda gala alava ande kkanlliri e judionengi kai saia ando Kafarnaum.

E alava ostade zivotoke

⁶⁰ Kana asunde e Jesuse but katar e disipulura ppende: —Pparo alau si gava: ¿Ko sai pachal gala ezgode?

⁶¹ Kana o Jesus llangla kai dena orba bilache letar, puchla len: —¿Gala alava peraven tumaro pachape?

⁶² ¿A so avelape te dikklena man o Chavo e manuseko te likel kote kai saia omanglal?

⁶³ O duo si kai del o zivoto; o mas ni blazil nisoke. E alava kai me ppendem si duo ta i zivoto.

⁶⁴ A nesave tumendar ni pachan. Soke o Jesus llanela mai anglal ko sea gola kai ni pachana, ta ko saia leko dusmano.

⁶⁵ Ta i ppenda: —Goleke ppendem tumenge kai niko nasti avel mande te na mukela le mo Dad.

⁶⁶ Sar kotar but katar leke disipulura mukle le, ta ni llana ios lea.

⁶⁷ Ondaka o Jesus puchla e desuduien: —¿Mangen te llantar i tumen?

⁶⁸ O Simon Pedro ppenda: —Gazda ¿Kate ka lla? Che alava si zivoto ostade.

⁶⁹ Amen pachaiam ta llana kai tu san o Santo e Devleko.

⁷⁰ O Jesus ppenda lenge: —¿A ni esvirisardem me tumen e desuduien, ta iek katar tumendar si iek llavolo?

⁷¹ Gava ppenela katar o Judas Iskariote, chavo e Simonoko, soke gava saia leko dusmano, ta i saia iek katar e desudui.