Juan 4 - Nuevo Testamento Romané 2007

O Jesus ta e diskinia katar e Samaria

¹ E fariseure llangle kai o Jesus cherela ta kristila ios mai but disipulura neko o Juan

² (A o Jesus ni kristila, samo leke disipulura)

³ Kana o Jesus llanglale, llelotar katar e Judea ta avilo pale ande ppuv katar e Galilea.

⁴ Ta saia te nakkel ande Samaria.

⁵ Ta avilo kai iek foro katar e ppuv e Samariaki kai ikkardola Sikar, pasa e umal kai o Jakob dia pe chave e Josee.

⁶ Kote saia o bunari e Santiagoko. Ondaka kai o Jesus, chinio e drometar, beslo pasa o bunari, ta saia desudui e ttiarinake.

⁷ Ta avili iek diskinia katar e Samaria te ikanel pai, ta Jesus ppenda lake: —De man te piau.

⁸ A leke disipulura llele ando foro te chinen fiso te jan.

⁹ A goia diskinia ppenda e Jesuseke: —¿Sar tu, kai san katar e Judea, mange mandar te pie pai, a sem iek diskinia katar e Samaria? Voi ppenda gua soke e judiura ta e samaritanura ni denpe orba.

¹⁰ O Jesus penda lake: —Te llanglana so del o Del, ta ko mangel tutar pai, tu mangea letar, ta vou dela tut o pai o llundo.

¹¹ E diskinia ppenda leke: —Gazda, inai tut soia te ikane o pai ta o bunari si baro: ¿Katar ka ikane o pai o llundo?

¹² O Jakob mukla amenge, kai sam katar leki vicha, gava bunari katar pila vou leke chave ta leke stoka. ¿So san tu mai baro neko vou?

¹³ O Jesus ppenda lake: —Kogo ka piel katar gava pai, pale ka trusaol;

¹⁴ a gua kai ka piel katar o pai kai me ka dau le, nikada ni ka trusaol. Soke o pai kai me ka dau le ka ezvoril ta ka del le zivoto ostade.

¹⁵ E diskinia ppenda leke: —Bre, de man katar gua pai, te na avau ios trusali ta te na avau ios karinga ta ikanau la.

¹⁶ O Jesus ppenda lake: —Lla ta ikkar che rome ta bolde karinga.

¹⁷ E diskinia ppenda: —Inai man rom. O Jesus ppenda lake: —Sukar ppendam kai inai tut rom;

¹⁸ soke panch roma sea tut, a gava kai si pala tute inai cho rom. O chachipe ppendam.

¹⁹ Kana voi asunda gava, ppenda leke: —Misliu kai tu san porauko.

²⁰ Amare purane, e samaritanuria, blagosisarde pe gava burdo; a tumen e judiura ppenen kai trubul te blagosil ando Jerusalem.

²¹ O Jesus ppenda lake: —Pacha man, kai avel o llive, kai ni pe gava burdo ni ando Jerusalem ni ka blagosisaren e Dade.

²² Tumen blagosin so ni llanen; a amen llana ka blagosisara, soke o braduipe avel katar e judiura.

²³ A avel o llive, ta akana si, kana e llene chachune ka blagosin e Dade ando Duo ta ando chachipe; soke gia mangel o Dad te blagosin le gola llene.

²⁴ O Del si Duo, ta gola kai blagosin le morabi ando Duo ta ando chachipe te blagosin le.

²⁵ E diskinia ppenda leke: —Llanau kai si te avel o Mesias (gava si o Kristo), kana vou ka avel ka bristol amenge sa gala ezgode.

²⁶ O Jesus ppenda lake: —Gua sem me, kai del orba tuia.

²⁷ Ondaka avile leke disipulura, ta chudisaile soke dela orba iekke diskiniaia. A ni iek lendar ni puchla le so mangela voi, o katar so dela orba laia.

²⁸ E diskinia mukla po bardako ta lleli ando foro, ta ppendale saurrenge:

²⁹ —Aven te dikken iekke llene kai ppenda mange sa sogo cherdem. ¿Sai avel gava o Mesias?

³⁰ Ondaka likiste katar o foro, ta avile kai o Jesus.

³¹ A leke disipulura molinape leke: —Kovachi, ja vareso.

³² Vou ppenda lenge: —Man si man iek jape, kai tumen ni pinllaren.

³³ Ondaka e disipulura ttode te ppenen iek avereke: —¿Sai avel kai ande leke vareso te jal?

³⁴ O Jesus ppenda lenge: —Mo jape si te cherau e volia goleki kai bichalda man, ta te getosarau leki buchi.

³⁵ Tumen ppenen: ‘Trubul star chon te avel e chidimake’; a me ppenau tumenge dikken po vostano, soke si reslo te sai chidiniaol.

³⁶ Ta gua kai chidel pochindiniaol leke, ta chidel septelie ostade zivotoke, te sai o simichari veselilpe golea kai chidel e septelie.

³⁷ Soke de istina si kana ppenen ‘Iek si gua kai ttovel e simicha ande ppuv, a o gua si kai chidel e septelie’.

³⁸ Me bichalden tumen te chiden e septelie ande so tumen ni radisarden; aver si gola kai radisarde, a tumen lien lengo chari.

³⁹ A but samaritanura katar gua foro pachaie ando Jesus pala e alava gole diskiniaki, soke voi ppenela: “Ppenda mange sa sogo cherdem”

⁴⁰ Goleke kana avile e samaritanura, molisaile leke te achel lenchar. Ta vou achilo kote dui llive,

⁴¹ ta mai but llene pachaie ande lete pala e Jesuseke alava,

⁴² ta ppenena gole diskiniake: —Akana amen pacha, na samo pala che alava soke isto amen asundam le, ta llana kai de istina vou si kai braduil e sueto.

O Jesus sastarel e chaurre katar iek sudo baro

⁴³ Nakkle dui llive ta o Jesus llelotar katar e ppuv katar e Samaria ta avilo ande ppuv katar e Galilea.

⁴⁴ Soke isto vou ppendaia, iekke porauko ni blagosin le ande leki ppuv.

⁴⁵ Kana avilo ande Galilea, e llene kai sea kotar lie le sukar, soke i von llelea pe llivesa katar e Paskua ando Jerusalem, ta dikkle e ezgode kai vou cherdaia.

⁴⁶ O Jesus avilo pale ando foro kai ikkardol Kana, kote kai cherdaia o pai mol. Ta saia kote iek sudo baro e charoko kai leko chaurro saia nasualo ando foro kai ikkardol Kafarnaum.

⁴⁷ Kana o sudo asunda kai o Jesus aviloia katar e Judea ande Galilea, avilo lete, ta molilape leke te llal te sastarel leke chaurre, soke saia po meripe.

⁴⁸ O Jesus ppenda leke: —Tumen ni pachaiena te na dikklena e bare ezgode Devlikane.

⁴⁹ A o sudo ppenda leke: —Lla, soke mo chaurro ka merel.

⁵⁰ Ondaka o Jesus ppenda: —Irisao chere soke cho chaurro zivil. A vou pachaia ando alau kai ppendaia leke o Jesus, ta llelotar.

⁵¹ Ta kana avilo kai po cher, leke esluge avile lete ta ppende leke: —¡Cho chaurro zivil!

⁵² Vou puchla len kana ttodaia te sastol leko chaurro, ta ppende leke: —Arachi ande iek e lliveseko liape letar e muka.

⁵³ Ondaka o gua lleno acharda kai saia kana o Jesus ppendaia leke: “Cho chaurro zivil”; a vou ta sa leko porodo pachaie ando Jesus.

⁵⁴ Gaia sai e duito bari ezgoda Devlikani kai cherdaia o Jesus kana avilo pale katar e Judea ande Galilea.