Juan 3 - Nuevo Testamento Romané 2007

O Jesus ta o Nikodemo

¹ Saia iek lleno katar e fariseura kai ikkardola Nikodemo, kai saia but baro maskar e judiura.

² Vou avilo iek riat kai o Jesus, ta ppenda leke: —Kovachi, llana kai avilan e Devletar te sikave, soke niko nasti cherel bi e Devleko e bare ezgode Devlikane kai tu chere.

³ O Jesus ppenda leke: —Chachimaia ppenau chuke kai kogo ni biandola pale, nasti ka dikkel e charoina e Devleki.

⁴ O Nikodemo puchla le: —¿Sar iek lleno ande po ppuripe sai biandol pale? ¿sai del o duito drom ande pe dako lli?

⁵ O Jesus ppenda leke: —Chachimaia ppenau chuke kai kogo ni biandola e paietar ta i e Duotar, nasti ka del ande charoina e Devleki.

⁶ So si masetar, mas si; a so si biando e Duotar, duo si.

⁷ Na chudisao kai ppenau chuke: ‘Sa trubun te biandon pale’.

⁸ E balau ppurdel katar mangel, ta tu asune la kana ppurdel, a ni llane katar avel ni kai llal. Isto gia si sa gola kai biandon e Duotar.

⁹ Pale o Nikodemo puchla le: —¿Sar sai avelape gava?

¹⁰ O Jesus ppenda leke: —¿Tu sikave ando Israel, ta ni llane gala ezgode?

¹¹ Chachimaia ppenau chuke kai amen ppena so llana, ta i ppena so dikklam; a tumen ni pachan amen.

¹² Kana me ppenau tumenge e ezgode e ppuviake ni pachan man, ¿sar ka pachan te ppenava tumenge katar e ezgode e milosoke?

¹³ “Niko ni avilo katar o miloso, samo gua kai fulisto katar o miloso; e Manuseko chavo.

¹⁴ Ta gia sar o Moises vazdia e sape po pusto, isto gia o Chavo e manuseko si te avel vazdino upre,

¹⁵ gia suako lleno kai pachal ande mande te avel le zivoto ostade.

O volipe e Devleko

¹⁶ “Soke pe gachin volisarda o Del e sueto, kai dia pe edine Chave, gia kogo pachal ande lete, te na jasaol, ta te avel le zivoto ostade.

¹⁷ Soke o Del ni bichalda pe Chave ando sueto te proketil e sueto, bichalda le te braduil e sueto.

¹⁸ “Kogo pachal ande Devleko Chavo, inai proketime; a gua kai ni pachal, proketime si, soke ni pachaia ando anau katar o edino Chavo e Devleko.

¹⁹ Gola kai ni pachan proketime si, soke kana avilo o villelo ando sueto, von cherena ezgode bilache, ta von volisarde mai but o truñariko neko e villelo.

²⁰ Sa gola llene kai cheren o bilachipe, murzin po villelo, ta ni aven kai o villelo, te na dikkon lenge bilache ezgode kai cheren.

²¹ A kogo cherel o lachipe, avel kai o villelo te sai dikkol kai cherel e Devleke ezgode.”

O Juan kai kristil pale del orba katar o Jesus

²² Mapalal o Jesus llelo pe disipulonenchar ande ppuv katar e Judea, ta achilo kote ta kristila.

²³ Ta i o Juan kristila ando foro kai ikkardol Enon, pasa o foro kai ikkardol Salim, soke kote saia but pai; ta avena ta kristinape.

²⁴ Soke ni ios ni ppanglea e Juane.

²⁵ Ondaka e disipulura e Juaneke ttode te janpe iekke judioia cheres o zakono katar o chistope,

²⁶ ta avile kai o Juan ta ppende leke: —Kovachi, o lleno kai saia tuia pe o goia rig katar o Jordan kaki orba tu dea, etalo kristisarel, ta saurre aven lete.

²⁷ O Juan ppenda lenge: —Nika nasti avel le niso te na dela le o Del.

²⁸ Isto tumen llanen kai me ppendem kai me ni sem o Mesias, me sem o bichaldo angla lete.

²⁹ Goleke, pe iek biau ko zinilpe si o chavo ta o mai lacho amal e chaveko veselilpe samo kai asunel leko avazi. Isto gia veselo sem akana, soke o Mesias si kate.

³⁰ Vou trubul te bariol, a me te chiknivau.

Ko avel upral

³¹ “Gua kai avel upral si pe saurre. A gua kai si katar e ppuv, ppuviako si, ta e ezgode e ppuviake ppenel. A ko avel e milosotar si pe saurre,

³² ta ppenel so dikkla ta asunda; ta niko ni pachal le.

³³ A vareko te pachal le, llanel kai o Del si chachuno;

³⁴ soke gole kai bichalda o Del, e Devleke alava ppenel; soke o Del ni del po Duo po cherricha.

³⁵ Soke o Dad volil pe Chave, ta ttoda sa e ezgode ande leke va.

³⁶ Gua kai pachal ande Devleko Chavo si le zivoto ostade; A gua kai ni kamel te pachal ando Chavo ni ka dikkel o zivoto, ta e joli e Devleki si pe lete.”