Juan 21 - Nuevo Testamento Romané 2007

O Jesus sikadol pasa e mora e Tiberiaki

¹ Mapalal katar gala ezgode o Jesus sikadol pale pe disipulonenge pasa e mora e Tiberiaki; ta sikadilo gia:

² Sea kote o Simon Pedro, o Tomas kai ikkarenale o Jemelo, o Natanael kai saia katar e Kana e Galileaki, e chave e Zebedeoke ta i dui ios katar leke disipulura.

³ O Simon Pedro ppenda lenge: —Llau te ikanau machen. Von ppende leke: —I amen lla tuia Ondaka llele ta likiste ande iek llimia; A goia riat ni ikande niso.

⁴ Kana lela te llivosaol o Jesus sikadilo pasa e mora, A e disipulura ni llanena kai saia vou.

⁵ O Jesus puchla len: —Chavalen, ¿si tumen mache? Von ppende: —Iok

⁶ O Jesus ppenda lenge: —Chuden e mreza pe rig e chachi katar e llimia ta ka ikanen mache. Von chudie e mreza ta mapalal nasti ikanela pala e but mache kai istarde.

⁷ Ondaka o disipulo gole kai o Jesus volila ppenda e Pedroke: —¡Gua si o Gazda! Samo asunda o Simon Pedro kai saia o Jesus ttoda pe patave (soke ikandaialen petar) ta chudiape ande mora.

⁸ Ogola disipulura aviletar ande llimia ta chirdena e mreza e machenchar soke e ppuv ni saia dur kotar.

⁹ Kana avile pe ppuv dikkle kai sea angara ppabarde iek macho upral ta i marrno.

¹⁰ O Jesus ppenda lenge: —Anen katar e mache kai istarden.

¹¹ O Simon Pedro likisto ta ikanda e mreza pe ppuv pperdi bare machenchar, stotina ta pinda ta trin; sea but mache ta e mreza ni putaili.

¹² O Jesus ppenda lenge: —Aven te jan. Ni iek katar e disipulura ni tromana te puchen le ¿Tu ko san? Soke llanena kai saia o Gazda.

¹³ Mapalal o Jesus lia o marrno ta dia len; isto gia sar dia len macho.

¹⁴ Gaia saia e trito drom kai sikadilo pe disipulonenge sar kana ustilo katar o meripe.

Arak me bakren

¹⁵ Kana jale o Jesus puchla e Simono Pedro: —Simon chavo e Jonaseko, ¿tu voli man mai but neko von? O Pedro ppenda leke: —Ea Gazda, tu llane kai me voliu tut. O Jesus ppenda leke. —Arak me bakren.

¹⁶ Pale puchla le e duito droma: —Simon chavo e Jonaseko, ¿tu voli man? O Pedro ppenda leke. —Ea Gazda, tu llane kai voliu tut. O Jesus ppenda leke: —Arak me bakren.

¹⁷ E trito drom pale puchla le: —Simon chavo e Jonaseko, ¿tu voli man? O Pedro tristosailo soke puchla le trin droma dal volisarel le ta ppenda leke: —Gazda, tu llane sa; tu llane kai voliu tut. O Jesus ppenda leke: —Arak me bakren.

¹⁸ Chachimaia ppenau chuke kana sana mai terno ttovea pe tute che patave ta llaia kai mangea; A kana ka ave ppuro, ka inzare che va ta aver ka ttovel pe tute che patave ta ka inllarel tut kote kai tu ni kame.

¹⁹ Gua ppendale te sai llanel sar saia te merel o Pedro ta sar saia te blagosil e Devle. Mapalal ppenda leke: —¡Aide pala mande!

O disipulo kai o Jesus volila

²⁰ Kana o Pedro boldinailo dikkla kai avela o disipulo kai o Jesus volila but, isto gua kai pe sinia inziloa pasa lete ta puchlaia le: “Gazda, ¿ko si gua kai ka ppukavel tut?”

²¹ Kana o Pedro dikkla le, puchla e Jesuse: —Gazda, ¿a galea so ka avelpe?

²² O Jesus ppenda leke: —Te mangau te achel lligo ni ka iriuman, ¿ni chitilpe chuke? Tu aide pala mande.

²³ Goleke gava alau barilo maskar e pplal kai gua disipulo ni saia te merel. A o Jesus ni ppenda kai ni ka merel. So ppenda o Jesus saia: “Te mangava te achel ¿chuke ni chitilpe?”

²⁴ Gava si isto gua disipulo kai ppenel gala ezgode ta i kai pisisarda len. Ta amen llana kai ppenel o chachipe.

²⁵ O Jesus cherda ios but ezgode kai te pisisailea iek po iek, me misliuman kai ni reslea ando sueto ni e lila kai te pisinape. Amen.