Juan 20 - Nuevo Testamento Romané 2007

E Jesuseko llundipe

¹ Ando purvo llive katar e efta e Maria Magdalena lleli but rano ando truñariko, kai o limori; ta dikkla kai ni saia o barr katar o udar e limoreko.

² Ta avili prastindo kai o Simon Pedro ta i kai o gua disipulo gole kai o Jesus volila, ta ppenda lenge: —¡Inllarde katar o limori e Jesuse ta ni llana kai ttode le!

³ O Pedro ta o gua disipulo lleletar kai o limori.

⁴ E dui prastena; A o gua disipulo prastaia mai sigardo neko o Pedro ta avilo mai oma kai o limori.

⁵ Ta bangilo te dikkel ta dikkla o chiti A ni dia andre.

⁶ Mapalal avilo o Simon Pedro, ta dia ando limori. I vou dikkla o chiti;

⁷ ta i o chiti kai sai pe Jesuseko soro ni saia e chitea saia ulime pe aver rig.

⁸ Ondaka i o gua disipulo dia andre, gua kai aviloa mai anglal kai o limori, ta i vou dikkla ta pachaia.

⁹ Soke ni ios ni achardea so ppenela o Pisipe, kai trubulale te ustel katar o meripe.

¹⁰ Ta gala disipulura lleletar chere.

O Jesus avel kai e Maria Magdalena

¹¹ E Maria achili avri pasa e limori ta rovela. Ta rovindo bangili te dikkel ando limori,

¹² ta dikkla duie suechonen ande parne patave kai besena kote kai saia e Jesuseki esnaga; iek kote kai saia o soro a o gua kai sea e porrne.

¹³ E suechura puchle la: —Chei, ¿soke rove? Voi ppenda lenge: —Soke inllarde me Gazda ta ni llanau kai ttode le.

¹⁴ Samo ppenda gava boldinaili ta dikkla kote e Jesuse, A ni llanela kai saia vou.

¹⁵ O Jesus puchla la: —Chei, ¿soke rove? ¿Ka rode? Voi mislila kai saia gua kai arakkela o ttan ta ppenda leke: —Te inllardan le tu, ppen mange kai ttodan le, ta me ka anau le.

¹⁶ Ondaka o Jesus ppenda lake: —¡Maria! A voi boldinaili ta ppenda leke ando ebreo —¡Rabuni! (gua alau si “gua kai sikavel”).

¹⁷ O Jesus ppenda lake: —Na dodisar man soke ni ios ni avilem kai mo Dad; Lla kai me pplal ta ppen lenge kai llau kai mo Dad, tumaro Dad, kai mo Del, tumaro Del.

¹⁸ Ondaka e Maria Magdalena lleli te ppenel e disipulonenge kai dikklaia e Jesuse ta i so ppendaia lake o Jesus.

O Jesus sikadol pedisipulonenge

¹⁹ Kana peli e riat isto katar gua llive kurko, e disipulura besena po stali ta e udara sea ppangle soke darana katar e judiura, avilo o Jesus, ttodape po maskaral ta ppenda lenge: —¡Pas tumenge!

²⁰ Kana ppenda gava sikada lenge pe va ta pe rig e pasuareki. Ta e disipulura veselisaile kai dikkena e Gazda.

²¹ Ondaka O Jesus pale ppenda lenge: —¡Pas tumenge! Gia sar bichalda man o Dad, gia me bichalau tumen.

²² Ta ppurdia pe lende ta ppenda: —Len o Santo Duo.

²³ Golengo bilachipe kai ka prostisaren ka aven prostime; a golen kai ni ka prostisaren, ka achen bi prostime.

O Tomas dikkel e Jesuse llundo

²⁴ O Tomas iek katar e desudui kai ikkarena le o Jemelo, ni saia lenchar kana aviloa o Jesus.

²⁵ Ta ppende leke ogola disipulura: —Dikklam e Gazda A o Tomas: —Te na dikkava pe leke va kote kai sea e kafrina, ta i te ttovava mo nai po ttan e kafrinengo ta mo va ande leko pasuaro, ni ka pachau.

²⁶ Ojto llive mapalal pale sea e disipulo andre ta lenchar saia o Tomas. Ondaka e udara sea ppangle ta o Jesus avilo ta dia andre; ttodape po maskaral ta ppenda lenge: —¡Pas tumenge!

²⁷ Mapalal ppenda e Tomaseke: —Ttou kate cho nai ta dik me va; an cho va ta ttoule ande mo pasuaro. Na achi bipachamako; ¡pacha!

²⁸ Ondaka o Tomas urkisarda —¡Gazda murno, Del murno!

²⁹ O Jesus ppenda leke: —¿Pacha soke dikklan man? ¡Blagosime gola kai ni dikkle ta pachaie!

Pala so si gava lil

³⁰ O Jesus cherda but aver ezgode angla pe disipulura kai inai pisime ande gava lil.

³¹ A gala avava pisisaile te pachan tumen kai o Jesus si o Mesias, e Devleko Chavo, ta te pachana te avel tumen zivoto ostade ande leko anau.