Juan 2 - Nuevo Testamento Romané 2007

O biau ande Galilea

¹ Pala e trin llive cherde iek biau ando foro kai ikkardola Kana katar e ppuv e Galileaki. Kote saia e Jesuseki dei,

² ta o Jesus ta leke disipulura sea ikkarde pe gua biau.

³ Ta kana trubula e mol, e dei e Jesuseki ppenda leke: —Inai len mol

⁴ O Jesus ppenda lake: —Chei ¿so si chuke? Ni ios ni avilo mo llive.

⁵ A voi ppenda e eslugenge: —Cheren sa so vou ka ppenel tumenge.

⁶ Sea kote sou piria barrustune kai andre saia o pai kai e judiura cherena lea o zakono katar o chistope. Ande suako iek resena dui o trin bardakuria.

⁷ O Jesus ppenda e eslugenge: —Peren gala piria pai. Ta pperde len,

⁸ ondaka o Jesus ppenda lenge: —Akana ikanen katar e piri, ta inllaren kai o lleno kai gazdaril po biau. Ta von inllarde leke.

⁹ Kana o gazda e biaveko pila o pai kai cherdilo mol, vou ni llanela katar saia; a e esluge kai ikanena o pai llanena katar saia, ondaka o lleno kai gazdarila po biau ikkarda e chave kai zinilape,

¹⁰ ta ppenda leke: —Suako lleno ttovel mai anglal e mai lachi mol, ta kana e llene pien goia mol, ondaka ttoven o goia mol, a tu muklan e mai lachi mol llik akana.

¹¹ Gaia si e purvo drom kai o Jesus cherda iek bari ezgoda Devlikani ando foro kai ikkardola Kana katar e ppuv e Galileaki, ta golea sikada pi zor, a leke disipulura pachaie ande lete.

¹² Mapalal lleletar ando Kafarnaum, vou leki dei, leke pplal ta leke disipulura; ta achile kote nesave llivesa.

O Jesus chistosarel o cher e Devleko

¹³ Kana saia pase e Paskua e judionengi; o Jesus llelotar ando Jerusalem.

¹⁴ Ta malada ando cher e Devleko golen kai bichinena guruven, bakren ta guluburia, ta i golen kai pparruvena e love ta besena kote ta cherena po rado.

¹⁵ Kana o Jesus dikkla so cherena, cherda peke e solenchar iek bicho ta tradia len katar o cher e Devleko sa gole llenen, golen kai andea pe bakren ta e guruven. Ta tradia golenge kai pparruvena e love ta boldia lenge stalia.

¹⁶ Ta ppenda golen kai bichinena guluburia; —¡Ikanen gava katar! ¡Na cheren me Dadeko Cher iek duchano!

¹⁷ Ondaka leke disipulura diepe golli katar o Pisipe kai ppenel: “O volipe kai si man pala cho cher ppabarel man sargo e iag”

¹⁸ Ta e judiura puchle le: —¿Sikau amenge katar le e zor te gazdari pe gala ezgode?

¹⁹ Ta o Jesus ppenda: —Peraven gava cher e Devleko, ta ande trin llive me pale ka vazdaule.

²⁰ Ondaka e judiura ppende leke: —Ande saranda ta sou burs vazdinailo gava cher e Devleko; ¿a tu ande trin llive mange vazdele?

²¹ A o Jesus dela orba isto katar pi esnaga, kai si o cher e Devleko.

²² Goleke, kana ustilo katar o meripe, leke disipulura die pe golli kai vou ppendaia gava; ta pachaie ando Pisipe, ta ando alau kai ppendaia o Jesus.

O Jesus llanela so mislinape e manusa

²³ Kana o Jesus saia ando Jerusalem ande llivesa katar e Paskua, but llene pachaie ande leko anau kana dikkena e ezgode kai vou cherela.

²⁴ A isto e Jesuse ni saia le vera ande lende, soke pinllarela saurren,

²⁵ ta ni trubulale te ppenel leke niko cheres nika, soke vou llanela so mislinape e manusa.