Juan 16 - Nuevo Testamento Romané 2007

¹ “Me ppenau tumenge gala ezgode te na jasaren tumaro pachape ande ma.

² Ka traden tumen katar e kkanllira e judionenge: Ta avel o llive kana vareko ka mundarel tumen ta ka mislil kai cherel pe Devleko.

³ Ka cheren gola ezgode soke ni pinllaren me Dade ni man.

⁴ Ppenau tumenge gava, te sai kana ka avel o llive, te den tumen golli kai me ppendemle tumenge. “Ni ppendem tumenge gala ezgode omanglal soke sema tumenchar.

E buchi kai cherel o Santo Duo

⁵ A akana llautar golete kai bichalda man, a niko tumendar ni puchel man kai llau;

⁶ a tumaro lio tristosailo soke ppendem tumenge gala ezgode.

⁷ Me ppenau tumenge o chachipe: Mai lache si tumenge te llautar. Soke te na llavatar, gua kai ka del tumen zor ni ka avel tumende; a te llelemtar, ka bichalaule tumenge.

⁸ Kana vou ka avel ka sikavel e sueto ko si bilacho, ko si lacho, a ko si krisime e Devletar.

⁹ Ko si bilacho: Gua kai ni pachal ande mande;

¹⁰ ko ni cherda o bilachipe: me, ka llautar kai mo Dad, ta tumen ni ka dikken man ios;

¹¹ ko si krisime e Devletar: Gua kai gazdaril pe gava sueto, dosalo si.

¹² “Si man but ezgode ios te ppenau tumenge, A akana ni ka acharen len.

¹³ Kana ka avel o Duo e chachimako, vou ka inllarel tumen kai sa o chachipe; soke ni ka del orba vou petar, A ka ppenel so ka asunel, te llanen e ezgode kai si te aven.

¹⁴ Vou ka blagosil man, soke ka lel katar so si murno ta ka cherel te llanenle.

¹⁵ Sogo si me Dade si murno; goleke ppendem tumenge kai o Duo ka lel katar so si murno ta ka cherel te llanenle.

¹⁶ “Cherricha ios, ta tumen ni ka dikken man, ta cherricha ios pale ka dikken man.”

O tristope ka cherdol veselia

¹⁷ Ondaka nesave katar e disipulura ttode te ppenen iek avereke: —¿So si gava kai ppenel amenge: cherricha ios ni ka dikken man, ta cherricha ios pale ka dikken man soke llautar kai o Dad?

¹⁸ ¿So si gua ‘cherricha ios’? Ni achara so del orba.

¹⁹ O Jesus llanela kai mangena te puchen le ta ppenda lenge: —Me ppendem tumenge kai cherricha ios ta ni ka dikken man, ta cherricha ios pale ka dikken man. ¿Gava puchen tumen iek avereke?

²⁰ Chachimaia ppenau tumenge kai tumen ka roven ta ka aven tristome, a o sueto ka veselilpe. A kana ka aven tristome, tumaro tristope ka cherdol veselia.

²¹ E diskinia kana bianel, dukkal la soke avilo lako llive; A mapalal kana bianel iekke minone, bristarelpe katar e dukka pala e veselia kai biandilo iek murus ando sueto.

²² I tumen akana sen tristome; A pale ka dikkau tumen, ondaka tumaro lio ka pperdol veselimatar, veselia kai niko ni ka lel tumendar.

²³ “Gua llive ni ka puchen man niso. Chachimaia ppenau tumenge kai o Dad ka del tumen sogo mangena ande mo anau.

²⁴ Llik akana niso ni manglen ande mo anau; mangen, ta ka len, te avel tumari veselia pperdi.

O Jesukristo dobisarda e sueto

²⁵ “Gala ezgode ppendem tumenge e paramichenchar; a avel o llive kana ni ka dau orba ios paramichenchar, bristo ka ppenau tumenge cheres mo Dad.

²⁶ Gua llive ka mangen ande mo anau; ta me ni ka ppenau kai ka moliuman e Dadetar pala tumende,

²⁷ soke isto o Dad volil tumen. Volil tumen soke tumen volil man, ta pachaien kai avilem e Dadetar.

²⁸ Avilem e Dadetar ando sueto, akana mukau e sueto ta llautar kai o Dad.”

²⁹ Ondaka e disipulura ppende leke: —Akana tu de orba bristomaia, inai paramichenchar.

³⁰ Akana amen achara kai llane sogo si e ezgode, ta ni trubul niko te puchel tut. Goleke amen pacha kai avilan e Devletar.

³¹ O Jesus ppenda lenge: —¿De istina akana pachan?

³² O vreme avel, ta akana avilo o vreme kai tumen ka aven fulade suako lleno pe pi rig ta ka muken man korkorre. A ni sem korkorre, soke o Dad si manchar.

³³ Sa gala ezgode ppendemlem tumenge te avel tumen pas ande mande. Ando sueto ka avel tumen brige, A vazden tumari vera soke me dobisardem e sueto.