Juan 15 - Nuevo Testamento Romané 2007

O chachuno kas drakkengo.

¹ “Me sem o chachuno kas drakkengo, a mo Dad si ko arakkel le te bariol.

² Iek krango kai ni del drak, chinel le; a gua kai del drak chistol le te del mai but drak.

³ Tumen akana sen chiste pala e alava kai me ppendem tumenge.

⁴ Achen ande mande gia sar me achau ande tumende. O krango nasti del drak vou petar te na avela po kas e drakkengo; isto gia tumen te na achena ande mande.

⁵ “Me sem o kas drakkengo a tumen e krangura. Gua kai achel ande mande a me ande lete, gava del but drak; soke bi murno tumen nasti cheren niso.

⁶ Gua kai ni achel manchar ka chudau le avri sargo krango, ta ka sukol sargo krangura kai chiden len pe iek ttan ta chuden len ande iag te ppabon.

⁷ “Te achen ande mande, a me alava ande tumende, sogo te mangena ka dau tumen.

⁸ Ande gava sikadol me Dadeko blagosipe, te den but drak gia te aven me disipulura.

⁹ Me voliu tumen gia sar mo Dad volil man; achen ande mo volipe.

¹⁰ Te kandena so ppenen me zakonura, ka achen ande mo volipe, gia sar me kandau so ppenen me Dadeke zakonura ta achau ande leko volipe.

¹¹ “Gia dau orba tumenge te veselin tumen manchar, ta tumari veselia te avel pperdi.

¹² Gava si murno zakono. Te volisaren tumen iek avere, gia sar me volisardem tumen.

¹³ O volipe mai baro si, o manus kai del po zivoto pala pe amal.

¹⁴ Tumen sen me amal, te cherden so ppenau tumenge.

¹⁵ Ni ka ikkarau tumen ios esluga, soke o esluga ni llanel so cherel leko gazda. Me ikkarau tumen amal, soke sikadem tumenge suako ezgoda kai asundem me Dadetar.

¹⁶ Tumen ni esvirisaden man, me esvirisardem tumen, ta ttodem tumen te den ta te inllaren but drak, ta tumari drak te achel. Sogo ka mangen me Dadetar ande mo anau, vou ka del tumen.

¹⁷ Gava mangau te cheren: Te volisaren tumen iek avere.

O sueto ka murzil pe tumende

¹⁸ “Te murzisarela o sueto pe tumende, llanen kai pe mande murzisarda mai anglal.

¹⁹ Te avilena e suetoke, o sueto volisardaia tumen sar volil so si leko. A me esvirisardem tumen katar o sueto, goleke o sueto murzil pe tumende, soke ni sen e suetoke.

²⁰ Den tumen golli o alau kai me ppendem tumenge: ‘O esluga inai mai baro neko po gazda.’ Gia sar llele pala mande, isto gia ka llan pala tumende; a te cherde so ppenau, i tumaro alau ka kanden.

²¹ Sa gava ka cheren tumenge pala mo anau, soke o sueto ni pinllaren gole kai bichalda man.

²² “Von ni avena dosale te na avilema me te dau lenge orba. A akana inai len so te ppenen pala po bilachipe;

²³ soke gola kai murzin pe mande, i pe mo Dad murzin.

²⁴ Ni avilaia len bilachipe, te na cherdema e bucha maskar lende, kai niko ni cherda omanglal; A dikkle gala ezgode kai cherdem ta murzin pe mande ta i pe mo Dad.

²⁵ A gava avilape te sai cherdol so si pisime pe lengo zakono: ‘Pala niso murzisarde pe mande’

²⁶ “A kana ka avel o gua kai ka del tumen zor, gole kai me ka bichalau tumenge me Dadetar, o Duo e chachimako kai avel e Dadetar, vou ka ppenel mandar.

²⁷ Ta i tumen ka ppenen mandar, soke sena manchar mai anglal.