Juan 14 - Nuevo Testamento Romané 2007

O Jesus si o drom te lla kai o Dad

¹ “Te na tristolpe tumaro lio. Pachan ando Del, pachan i ande mande.

² Ande me Dadeko cher si but ttana; te na avilaia gia, ppendemale tumenge, ka llau te lacharau ttan tumenge.

³ A te llelemtar ta te lachardem ttan tumenge, pale ka avau te inllarau tumen manchar, te aven kote kai ka me ka avau.

⁴ Tumen pinllaren o drom kai inllarel kote kai me llau.”

⁵ O Tomas ppenda e Jesuseke: —Gazda, ni llana kai lla, ¿sar ka pinllara o drom?

⁶ O Jesus ppenda leke: —Me sem o drom, o chachipe ta o zivoto; niko ni llal kai o Dad bi murno.

⁷ Te pinllaren man, i me Dade ka pinllaren; ta akana pinllaren le ta dikken le.

⁸ O Felipe ppenda leke: —Gazda, sikau amenge e Dade, ta golea si amenge dosta.

⁹ O Jesus ppenda leke: —Felipe, gachin cherel kai sem tumenchar, ¿ta ni pinllardan man? Kogo dikkla man, dikkla e Dade; ¿soke ppene: Sikau amenge e Dade?

¹⁰ ¿Ni pacha kai me sem ando Dad a o Dad si ande mande? E alava kai me ppenau tumenge, ni ppenau len me mandar. O Dad kai zivil ande mande vou cherel e bucha.

¹¹ Pachan man kai me sem ando Dad a o Dad si ande mande; a te na, pachan man isto pala e ezgode kai cherau.

¹² Chachimaia ppenau tumenge kai kogo pachal ande ma, e ezgode kai me cherau i vou ka cherel len; ta ios mai bare ka cherel len, soke me llautar kai o Dad.

¹³ Ta sogo tumen mangena e Dadetar ande mo anau, ka cherau le, te sai avel o Dad blagosime.

¹⁴ Te mangena vareso ande mo anau, ka cherau le.

O Duo e chachimako

¹⁵ “Te volina man, cheren so ppenen me zakonura.

¹⁶ Me ka moliuman e Dadeke ta vou ka del tumen aver kai ka del tumen zor te avel tumenchar suako llive:

¹⁷ o Duo e chachimako, gole kai o sueto nasti lel, soke ni dikkel le, ta ni pinllarel le; A tumen pinllaren le, soke zivil tumenchar ta i ka avel tumenchar.

¹⁸ “Ni ka mukau tumen bidadeko; ka avau tumenchar.

¹⁹ Cherricha ios, ta o sueto ni ka dikkel man ios; A tumen ka dikken man, ta ka zivin soke me ziviu.

²⁰ Gua llive tumen ka llanen kai me sem ande mo Dad, a tumen ande mande, ta me ande tumende.

²¹ Gua kai si le me zakonura ta cheren len, gua si kai volil man. Ta mo Dad ka volil le, ta i me ka voliu le ta ka sikavau leke sar sem.”

²² O Judas (na o Iskariote) puchla le: —Gazda, ¿soke ka sikado amenge a e suetoke iok?

²³ O Jesus ppenda leke: —Gua kai volil man cherel so ppenau; ta mo Dad ka volil le, ta mo Dad ta me ka ava lete ta ka zivisara ande lete.

²⁴ Gua kai ni volil man, ni cherel so ppenau. O alau kai asunden inai murno, e Dadeko si kai bichalda man.

²⁵ “Ppenau tumenge gala ezgode akana kai sem tumenchar;

²⁶ A o Santo Duo kai o Dad ka bichalel ande mo anau, vou ka sikavel tumen sogo si e ezgode ta ka cherel te den tumen golli sa so ppendem tumenge.

²⁷ “E pas mukau tumenge. Murni pas dau tumen; ni dau la tumenge gia sar del la o sueto. Te na tristolpe tumaro lio, na daran.

²⁸ Asunden kai me ppendem tumenge kai ka llautar ta kai ka avau tumende. Te volisardena man veselisailena te llanen kai llautar kai o Dad, soke o Dad si mai baro mandar.

²⁹ Akana ppenaule tumenge te sai pachan kana ka avenpe gala ezgode.

³⁰ “Ni ka dau but orba tumenchar, soke avel gua kai gazdaril pe gava sueto. Lea inai man niso,

³¹ morabi te cherdol gia, te sai llanel o sueto kai me voliu e Dade, ta kai cherau so bichaldan man. “Usten. Aventar katar