Juan 13 - Nuevo Testamento Romané 2007

O Jesus jalavel e disipulonenge porrne

¹ Achela cherricha llivesa te avel Paskua, ta o Jesus llanela kai aviloa leko llive te llaltar katar gava sueto kai po Dad. Vou volisarda pe disipulonen kai sea ando sueto ta volisarda len llik kai o son.

² O llavolo ttoda ando lio e Judaseko, chavo e Simonoko Iskariote, te ppukavel e Jesuse,

³ a o Jesus llanela kai o Del ttodaia sa e ezgode tala leke va ta kai o Del bichalda le ta kai saia te llaltar kai o Del,

⁴ ustilo katar e sinia, ikanda po gertachi ta ppangla pe po maskar iek piskiri.

⁵ Mapalal ttoda pai ande iek tepsia ta ttoda te jalavel e disipulonenge porrne, ta te koslen len e piskirea.

⁶ Kana avilo kai o Simon Pedro te jalavel leke porrne, o Simon Pedro ppenda leke: —Gazda, ¿tu ka jalave me porrne?

⁷ O Jesus ppenda leke: —Akana ni achare so cherau, a mapalal ka achare.

⁸ O Pedro ppenda leke: —¡Nikada ni ka mukau tut te jalave me porrne! O Jesus ppenda leke: —Te na jalavau len, ni ka ave katar murne llene.

⁹ O Simon Pedro ppenda leke: —¡Te si gia, na jalau samo me porrne, jalau me va ta i mo soro!

¹⁰ O Jesus ppenda leke: —Ko si jalado trubul te jalavel samo pe porrne, soke si jalado. A tumen sen jalade, A inai saurre jalade.

¹¹ Ta ppenda: “Inai jalade saurre”, soke llanela ko saia te ppukavel le.

¹² Mapalal kana jalada lenge porrne, pale lia po gertachi, beslo pale pe sinia ta ppenda lenge: —¿Llanen so si gua kai cherdem?

¹³ Tumen ikkaren man Kovachi ta Gazda; sukar ppenen, soke gua sem.

¹⁴ A me, o Kovachi ta o Gazda, jaladem tumare porrne, goleke i tumen si te jalaven tumare porrne iek avereke.

¹⁵ Me cherdem gava, te cherenle i tumen.

¹⁶ Chachimaia ppenau tumenge kai o esluga inai mai baro neko leko gazda, ni o bichaldo mai baro goletar kai bichalda le.

¹⁷ Te acharen gala ezgode, blagosime ka aven te cherenalen.

¹⁸ “Ni ppenaule pala sa tumende; me llanau ka esvirisardem. A si te cherdol so si pisime: ‘Gua kai jal manchar marrno, vazdinailo pe mande.’

¹⁹ Ppenaule tumenge akana, gia kana ka avelpe gaia ezgoda, te pachan kai me sem.

²⁰ Chachimaia ppenau tumenge kai kogo ka lel gole kai bichalau, man lel; ta kogo lel man, lel gole kai bichalda man.”

Iek tumendar ka ppukavel man

²¹ Kana o Jesus ppenda lenge gala orbe, tristosailo duotar ta ppenda lenge bristomaia: —Chachimaia ppenau tumenge kai iek tumendar ka ppukavel man.

²² Ondaka e disipulura ttode te dikken iek pe aver, ta ni llanena katar savo lleno dela orba.

²³ Iek lendar, gole kai o Jesus volila but, saia inzardo pasa o Jesus kana von jana,

²⁴ galeke o Simon Pedro cherda te puchel katar savo lleno dela orba.

²⁵ Vou, kai inzola pasa o Jesus, puchla le: —Gazda, ¿ko si gua lleno?

²⁶ O Jesus ppenda leke: —Gole kai me ka dau o marrno chingo, gua si. Ta chingarda o marrno ta diale kai o Judas, chavo Simonoko Iskariote.

²⁷ Ta kana jala o marrno, o llavolo dia ande leko lio. Ondaka o Jesus ppenda leke: —So si te chere, cherle mai oma.

²⁸ A niko lendar kai besena pe sinia ni acharda soke ppendaia gava.

²⁹ Soke o Judas inllarela e love, nesave mislina kai o Jesus ppendaia leke te chinel fiso kai trubula len e Paskuake, o te del vareso e chorren.

³⁰ Kana o Judas jala, llelotar, ta pelia e riat.

E prokestia nevi

³¹ Kana o Judas llelotar, o Jesus ppenda: —Akana o Chavo e manuseko si blagosime, ta o blagosipe e Devleki sikadol ande le.

³² A te sikavel o Chavo e manuseko e Devleko blagosipe, i o Del ka sikavel e Chaveko blagosipe; ta ka cherel le oma.

³³ Chavalen, ni ka avau tumenchar but vreme. Tumen ka roden man, A isto gua kai ppendem e judionenge, ppenaule akana tumenge: Tumen, nasti llan kote kai me ka llau.

³⁴ Iek nevo zakono dau tumen: Te volin tumen iek avereke. Isto gia sar me voliu tumen, volisaren tumen, iek avereke.

³⁵ Cheres gava, saurre ka llanen kai tumen sen me disipulura, te volisarden iek avere.

O Jesus ppenel kai o Pedro ka ppenel kai ni pinllarel le.

³⁶ O Simon Pedro puchla e Jesuse: —Gazda, ¿kai lla? —Kote kai me llau nasti lla pala mande akana; mapalal ka lla pala mande.

³⁷ O Pedro ppenda leke: —Gazda, ¿soke nasti llau pala tute akana? ¡Mo zivoto ka dau pala tute!

³⁸ O Jesus ppenda leke: —¿De istina cho zivoto dea pala mande? Chachimaia ppenau chuke: Ni ka basel o basno, a tu ka ppene trin droma kai ni pinllare man.