Juan 12 - Nuevo Testamento Romané 2007

Iek diskinia chudel meriso po Jesus

¹ Achena sou llive te avel e Paskua ta o Jesus avilo ande Betania, kote kai zivila o Lasaro, gua kai vou llungadaia le katar o meripe.

² Kote cherde e Jesuseke iek pachiu; e Marta ttoda e sinia a o Lasaro saia iek katar e llene kai besela pe sinia ta jala lea.

³ E Maria lia cherricha meriso, kai saia but kuch, ta ttoda pe Jesukristoke porrne ta kosla len pe balenchar. Ta sago o cher kkandela ando meriso.

⁴ Ondaka Judas Iskariote, iek katar leke disipulura kai saia te ppukavel e Jesuse ppenda:

⁵ —¿Soke ni bichindinailo gava meriso pe so mol o rado iekke burseko ta te pomozilpe gole lovenchar e llenen kai si chorre?

⁶ A o Judas ni ppenda gava soke saia leke zao katar e chorre, gua ppendale soke saia chor, ta lete saia e anbava kai ttodena e love ta chorela peke so ttovena andre.

⁷ O Jesus ppenda leke: —Mukla, soke voi cherda gava pala o llive me limoreke.

⁸ Soke e chorre ka aven tumenchar suako llive, a me iok.

But katar e judiura pachana.

⁹ But katar e judiura llangle kai o Jesus saia ande Betania ta avile, na samo pala o Jesus, avile te dikken e Lasaro gole kai o Jesus llungadaia katar o meripe.

¹⁰ Ondaka e mai preche popura chinade te mundaren i e Lasaro,

¹¹ soke cheres lete but katar e judiura avenatar ta pachana ando Jesus.

O Jesus del ando Jerusalem

¹² Ttiarinako but llene kai avilea pe Paskua llangle kai o Jesus avelatar ando Jerusalem.

¹³ Ondaka lie peke krangura katar e palmere ta lleletar angla lete, ta urkina: —¡Hosana! ¡Blagosime gua kai avel ande Devleko anau, o Charo Israeleko!

¹⁴ O Jesus malada iek magarcho ta likisto pe lete, sar ppenel ando Pisipe:

¹⁵ “Na dara, chei e Sioneki; cho Charo avel, pe iek magarcho”

¹⁶ Leke disipulura ni acharde gala ezgode; a kana o Jesus blagosisailo, llangle kai sa gala ezgode kai cherde leke, sea pisime ando Pisipe.

¹⁷ E llene kai sea e Jesusea kana ikkarda e Lasaro katar o limori ta llungada le, ppenena so dikkle.

¹⁸ Goleke e llene avile angla lete, soke asundea kai o Jesus cherdaia gaia ezgoda.

¹⁹ A e fariseura ppenena iek avereke: —Dikken gia amen ni ka dobi niso galea. Dikken ¡sa o sueto llaltar pala lete!

Nesave griegura roden e Jesuse

²⁰ Andar gola kai llelea ando Jerusalem te blagosisaren pe Paskua, sea nesave griegura.

²¹ Gala avile pasa o Felipe, kai saia katar e Betsaida e Galileaki, ta molisaile leke: —Gazda, manga te dikka e Jesuse.

²² O Felipe llelo kai o Andres ta ppenda leke gava, mapalal e dui avile kai o Jesus ta ppende leke gaia ezgoda.

²³ O Jesus ppenda lenge: —Avilo o llive te avel blagosime o Chavo e manuseko.

²⁴ Chachimaia ppenau tumenge, e simicha katar o lliu te na perela pe ppuv ta te na merela, achela korkorre; a te merela, ka del but kuchorra.

²⁵ O lleno kai volil po zivoto, ka jasarel le; a o lleno kai ni volil po zivoto ande gava sueto ka zivil ando zivoto ostade.

²⁶ Gua kai mangel te avel mo esluga, morabi te llal pala mande; ta kai go te avava me, kote ka avel mo esluga. Kogo llal pala ma, mo Dad ka falil le.

O Jesus ppenel kai si te merel

²⁷ “¡Akana sem but tristome! ¿A so ka ppenau? ¿Ka ppenau, Dade: ‘braduisar man akana’? ¡A goleke avilem pe gava llive!

²⁸ Dade, blagosisar cho Anau.” Ondaka iek avazi avilo e milosotar kai ppenela: “Blagosisardem le, ta pale ka blagosiu le”

²⁹ E llene kai sea kote ppenena kai so asundilo saia germipe; ta nesave ppenena: —Iek suecho dia orba.

³⁰ O Jesus ppenda lenge: —Ni asundila pala mande o avazi, a cheres tumende.

³¹ Akana avili e kris pe gava sueto, a o llavolo tradiniaol avri.

³² A me kana ka avau vazdino katar e ppuv, ka anau tumen isto me mande.

³³ Ta ppenela gava te sai acharen sar saia te merel.

³⁴ E llene ppende leke: —Amen asundam e zakonotar kai o Mesias zivil ostade. ¿Sar ppene tu kai o Chavo e manuseko si te vazdinaol? ¿Ko si gava o Chavo e manuseko?

³⁵ O Jesus ppenda lenge: —O villelo cherricha ios si tumenchar. Llan kana si tumenchar o villelo te na perel pe tumende o truñariko; soke ko llal ando truñariko ni llanel kai llal.

³⁶ Pachan ando villelo akana kai o villelo si tumenchar, te aven e villeloke. Kana ppenda gala ezgode o Jesus llelotar ta gurudilo lendar.

Soke e judiura ni pachana

³⁷ O Jesus cherda but bare ezgode, ta von ni pachana ande lete;

³⁸ soke saia te cherdol so ppendaia o porauko Isaias: “Devla, ¿ko pachaia ande amaro alau? ¿Kake sikadilo e Devleko va?”

³⁹ Goleke nasti pachana soke o Isaias ppenda:

⁴⁰ “O Del korrada lenge akka ta zuriarda lengo lio, te na dikken te na acharen; te na keimpe, a me te sastarau len.”

⁴¹ O Isaias ppenda gava kana dikkla e Jesuseki dragostia, ta ppendaia cheres lete.

⁴² Ta but judiura pachaie ando Jesus, ta i but katar e gazda e foroke, a ni ppenenale pala e fariseura, te na aven tradine katar e kkanllira e judionengi.

⁴³ Soke mai but volina e murusengi dragostia neko e Devleki dragostia.

O Jesus avilo te braduil e sueto

⁴⁴ O Jesus ppenda ando baro avazi: “Kogo pachal ande mande, ni pachal samo ande mande; pachal i ande gua kai bichalda man.

⁴⁵ Kogo dikkel man, dikkel gole kai bichalda man.

⁴⁶ Me, o villelo, avilem ando sueto te sai suako lleno kai pachal ande mande te na achen ando truñariko.

⁴⁷ Gua kai asunel me alava ta ni cherel len, ni ttovau pe lete kris; soke ni avilem te ttovau kris po sueto, me avilem te braduiu e sueto.

⁴⁸ Gua kai ni kamel te guruvel me alava, si le ko te ttovel pe lete e kris; o alau kai me ppendem, vou ka ttovel pe lete e kris ando llive mai anglal.

⁴⁹ Soke ni dau orba me mandar; o Dad, kai bichalda man, vou ppenda mange so si man te ppenau, ta so si man te sikavau.

⁵⁰ A me llanau kai leko zakono si zivoto ostade. Goleke so ppenau me, o Dad ppenda mange te ppenaule.”