Juan 11 - Nuevo Testamento Romané 2007

O meripe e Lasaroko

¹ Iek lleno kai ikkardola Lasaro saia nasualo, ta vou saia katar e Betania o foro e Mariako ta e Martako kai sea leke pea.

² Goia Maria kai lako pplal saia o Lasaro, saia goia kai jaladaia e Jesukristo e merisoia, ta koslaia leke porrne pe balenchar.

³ Ta e dui ppea bichalde te ppenen e Jesuseke: —Gazda, cho amal kai voli si nasuailo.

⁴ O Jesus, kana asunda gava, ppenda: —Gava nasualipe inai merimako, Gava nasualipe si te sikadol e zor e Devlekita ta i leke Chaveki.

⁵ Ta o Jesus volila e Marta, lake pea ta e Lasaro,

⁶ kana ppende leke kai o Lasaro saia nasualo, achilo kote kai saia, dui llive ios.

⁷ Mapalal ppenda e disipulonenge: —Aven pale ande Judea.

⁸ A leke disipulura ppende leke: —Kovachi, e judiura mangena te mundaren tut e barrenchar, ¿a tu pale mange lla incha?

⁹ O Jesus ppenda lenge: —¿Inai e llivese desudui saiata? Ko llal ollivesea, ni perel soke dikkel o villelo gale suetoko;

¹⁰ a ko llal orachaia, perel, soke inai villelo.

¹¹ Mapalal katar gala orbe, ppenda lenge: —Amaro amal o Lasaro sovel, a me ka llau te llungavau le.

¹² E disipulura ppende leke: —Gazda, te sovela, ka sastol.

¹³ A so ppenela lenge o Jesus saia kai o Lasaro muloia, a von mislina kai dela lenge orba katar e lindri kana o manus sovel.

¹⁴ Ondaka o Jesus ppenda lenge bristomaia: —O Lasaro mulo.

¹⁵ Ta veseliu man kai me ni sema kote, pala tumende, te sai pachan. Akana aven lete.

¹⁶ Ondaka o Tomas, kai ppenena leke Didimo, ppenda e disipulonenge: —Aven i amen te mera lea.

O Jesus, o llundipe ta o zivoto

¹⁷ Kana avilo o Jesus, malada kai cherela star llive sar kana o Lasaro saia ando limori.

¹⁸ Betania saia pasa o Jerusalem preko trin kilometrura;

¹⁹ ta but katar e judiura avilea kai e Marta ta i e Maria te den len zor cheres lengo pplal.

²⁰ Kana e Marta asunda kai avela o Jesus, lleli te malavel le; a e Maria achili ando cher.

²¹ Ondaka e Marta ppenda e Jesuseke: —Gazda, te avilana kate, mo pplal ni muloa.

²² Ta me llanau kai sogo ka mange e Devletar ka del tut.

²³ O Jesus ppenda lake: —Cho pplal pale ka zivil.

²⁴ E Marta ppenda leke: —Ea, me llanau kai vou pale ka zivil kana ka usten e mule ando llive mai anglal.

²⁵ Ondaka o Jesus ppenda lake: —Me sem o llundipe ta o zivoto. Ko pachal ande mande, i te avela mulo, ka zivil;

²⁶ ta i kogo zivil ta pachal ande mande, nikada ni ka merel. ¿Pacha gava?

²⁷ Voi ppenda leke: —Ea, me pachau kai tu san o Mesias, o Chavo e Devleko kai saia te avel ando sueto.

O Jesus rovel pala o Lasaro

²⁸ Kana ppenda gava, e Marta lleli te ikkarel pe ppea e Maria, ta ppenda lake po chorial: —O Kovachi si kate ta ikkarel tut.

²⁹ Kana e Maria asunda gava ustili oma, ta avili lete.

³⁰ O Jesus ni resloia te del ando forichi; vou saia po ttan kai e Marta maladaia le.

³¹ Kana e judiura kai sea ando cher ta denala la zor, dikkle kai e Maria ustilia oma ta likistia, llele pala late soke mislina kai llala kai o limori te rovel.

³² Kana e Maria avili kote kai saia o Jesus, dia changa angla leke porrne, ta ppenda leke: —Gazda, te avilana kate, mo pplal ni muloa.

³³ O Jesus kana dikkla kai e Maria rovela ta i e judiura kai avile laia rovena, izdraia ando duo ta tristosailo,

³⁴ ta puchla len: —¿Kai ttoden le? Von ppende leke: —Aide ta dik, Gazda.

³⁵ Ta o Jesus rovda.

³⁶ Ondaka e judiura ppende: —¡Dikken sar volila le!

³⁷ Ta nesave lendar ppenena: —Gava, kai putarda e korreke akka, ¿ni sai cherdaia o Lasaro te na merel?

E Lasaroko llundipe

³⁸ O Jesus but tristome, avilo kai o limori. Kai saia ande iek anadipe ta iek pechina ucharela le.

³⁹ O Jesus ppenda: —Ikanen e pechina. E Marta, e ppei goleke kai muloa, ppenda leke: —Gazda, kkandel soke cheren stare llive kai mulo.

⁴⁰ O Jesus ppenda lake: —¿Ni ppendem chuke kai te pachaia, ka dikke e zor e Devleki?

⁴¹ Ondaka ikande e pechina, ta o Jesus vazdia pe akka upre ta ppenda: —Dade, dau tut fala soke asundan man.

⁴² Me llanau kai tu suako drom asune man, a ppendem le pala o sueto kai si kate, te pachan kai tu bichaldan man.

⁴³ Ta kana ppenda gava, urkisarda: —¡Lasaro, like avri!

⁴⁴ A o Lasaro kai muloia, likisto, ta leke va ta i leke porrne sea ppangle e dorienchar, ta leko soro saia ulime iekke chitea. Ta o Jesus ppenda lenge: —Putaren le ta muken le te llaltar.

Mangen te ppanden e Jesuse

⁴⁵ A but llene katar e judiura kai avilea e Mariaia pachaie, soke dikkle so cherdaia o Jesus.

⁴⁶ A nesave llene llele kai e fariseura, ta ppende lenge so cherdaia o Jesus.

⁴⁷ Ondaka e fariseura ta e mai preche popura chidie e kris, ta ppende: —¿So ka chera? Gava lleno cherel but bare ezgode.

⁴⁸ Te mukaia le, sa ka pachan ande lete, ta ka aven e romanura ta ka zatrisaren amaro cher e Devleko ta amari ppuv.

⁴⁹ A iek lleno lendar, kai ikkardola Kaifas kai saia o mai baro popo gua burs, ppenda lenge: —Tumen ni llanen niso,

⁵⁰ ta ni mislin kai mai lache tumenge te merel samo iek lleno pala o foro, a na te zatrilpe sa amari ppuv.

⁵¹ A o Kaifas ni ppenda gaia orba vou petar, soke gua burs vou saia o mai baro popo, ta kana ppenda kai o Jesus saia te merel pala e ppuv vou ppanda iek porouka;

⁵² ta inai kai o Jesus saia te merel samo pala e judiura, vou mulo i pala sa e chave e devleke kai si ando sueto.

⁵³ Sar kotar die pe orba te mundaren e Jesuse.

⁵⁴ Ta o Jesus llala po chorial katar e judiura, goleke llelotar katar e ppuv e Judeaki ta llelo pasa o pusto ande iek foro kai ikkardola Efrain, ta kote achilo pe disipulonenchar.

⁵⁵ Saia pase e Paskua, ta but llene katar e forura llelea ando Jerusalem te sai cistonpe prema o zakono katar o jaladipe mai anglal te avel e Paskua.

⁵⁶ Ta rodena e Jesuse ta puchena iek avereke ando cher e Devleko: —¿So mislin tumen? ¿Ka avel pe eslava o iok?

⁵⁷ E fariseura ta e mai preche popura ppende kai te llanela vareko kai saia o Jesus te ppukavel le te sai ppande le.