Juan 10 - Nuevo Testamento Romané 2007

O chobano ta e bakre

¹ Ondaka o Jesus ppenda lenge: “Chachimaia ppenau tumenge kai kogo ni del katar o udar e rindoko, gua si chorano ta kochkari.

² A gua kai del katar o udar e rindoko, gua si chobano e bakrengo.

³ Ta o lleno kai arakkel o udar putarel leke, ta o chobano ikkarel suakone bakre pe po anau; ta e bakre asunen leko avazi; ta ikanel len katar o rindo,

⁴ ta kana ikanel saurren, llal angla lende ta e bakre llan pala lete soke pinllaren leko avazi.

⁵ A von ni ka llan pala iek lleno kai ni pinllaren, ta ka nasen letar soke ni pinllaren leko avazi.”

⁶ Gaia paramichi ppenda lenge o Jesus, a von ni acharde e orba kai dela lenge.

O Jesus, o lacho chobano

⁷ O Jesus pale ttoda te ppenel lenge: “Chachimaia ppenau tumenge: Me sem o udar e bakrengo.

⁸ Sa gola kai avile mai anglal mandar, sea chorane ta kochkaria a e bakre ni asunde len.

⁹ Me sem o udar: Ko nakkel mandar, ka avel braduime. Ta ka avel sargo iek bakro kai del andre ta likel, ta malavel char.

¹⁰ “A o chor avel samo te vazdel, te mundarel ta i te zatrisarel; a me avilem te avel tumen but zivoto.

¹¹ Me sem o lacho chobano. O lacho chobano po zivoto del pala e bakre;

¹² A o lleno kai radil samo te pochinen leke, kana dikkel kai avel o ruv mukel e bakren ta nasel, soke vou inai o chobano, ta inai leke e bakre. A o ruv lel peke bakren ta cherel len te fuladon.

¹³ A gua lleno nasel soke chererle samo pala e love, ta ni chitilpe leke e bakren.

¹⁴ “Me sem o lacho chobano, ta pinllarau me bakren, ta me bakre pinllaren man,

¹⁵ gia sar pinllarel man mo Dad ta me pinllarau le; ta ttovau mo zivoto pala e bakre.

¹⁶ Si man aver bakre kai inai katar gava rindo; i golen si te anau; von ka asunen mo avazi ta ka avel samo iek stoka, ta samo iek chobano.

¹⁷ “Mo Dad volil man soke me dau mo zivoto te sai avel mange dino o zivoto pale.

¹⁸ Niko ni lel mandar mo zivoto, soke isto me mandar dau le. Soke mange si dino te dau le ta i mange si dino te lau le pale. Gala si e alava kai ppenda mange mo Dad te cherau.”

¹⁹ Kana e judiura asunde gala alava, pale jalepe maskar pete.

²⁰ But llene lendar ppenena gia: —¿Soke asunen le kana iek llavolo si ande lete ta dilailo?

²¹ A aver ppenena: —Iek lleno kai si ande lete iek llavolo nasti ppenel gala alava. ¿Sai iek llavolo sastarel e akka iekke korreke?

Me bakre asunen mo avazi

²² Ando Jerusalem cherena e eslava katar o cher e Devleko. Ta saia o viendea,

²³ ta o Jesus llala ando cher e Devleko katar o udar kai ikkardola Salomon.

²⁴ Truisarde le e judiura ta ppende leke: —¿Pe gachin ios ka diliare amen? Te san tu o Mesias, ppen le amenge.

²⁵ O Jesus ppenda lenge: —Me ppendemle tumenge, ta ni pachan. E bucha kai me cherau ando anau me Dadeko si kai den orba isto mandar;

²⁶ A tumen ni pachan, soke ni sen katar me bakre sar ppendema tumenge.

²⁷ Me bakre asunen mo avazi, ta me pinllarau len, a von llan pala mande.

²⁸ Me dau len zivoto ostade, ta nikada ni ka meren, ta niko ni ka lel len katar mo va.

²⁹ Mo Dad kai dia len mange, si o mai baro, ta niko nasti lel len katar me Dadeko va.

³⁰ Me ta mo Dad sam iek.

³¹ Ondaka e judiura pale lie peke barra te chuden ande lete,

³² A o Jesus ppenda lenge: —Me sikadem tumenge but lache bucha me Dadeke; ¿katar savi lendar mangen te chuden e barrenchar ande ma?

³³ E judiura ppende: —Ni ka chuda e barrenchar ande tute pala nisavi lachi buchi kai cherdan, amen ka chuda barra ande tute soke che alavenchar kuslan e Devle; soke tu kai san manus chere tut o Del.

³⁴ O Jesus ppenda lenge: —Ande tumaro zakono si pisime: ‘Me ppendem kai tumen sen dela.’

³⁵ Amen llana kai so si pisime ando zakono nasti ppagol, ta o Del ikkarda dela golen kai avila lende leko alau.

³⁶ A me kai o Del bichalda man ando sueto, ¿sar tumen ppenen mange kai kojavau soke ppendem o Chavo e Devleko sem?

³⁷ Te na cherava e bucha me Dadeke, na pachan man.

³⁸ A te cherava len, ta te na pachana man, pachan ande ezgode kai cherau, te sai llanen kai o Dad si ande mande, ta me sem ando Dad.

³⁹ Pale mangena te ppanden le, a o Jesus naslo lendar.

⁴⁰ Ta o Jesus pale llelotar pe o goia rig o Jordan, ta achilo po ttan kai o Juan kristila.

⁴¹ A but llene avena lete, ta ppenena: —Chache si, kai o Juan ni cherda ni iek bari ezgoda Devlikani, a sa so ppendaia katar gava lleno, saia o chachipe.

⁴² Ta kote, but llene pachaie ande lete.