Juan 1 - Nuevo Testamento Romané 2007

¹ Mai anglal saia o Alau, ta o Alau saia e Devlea ta o Alau saia o Del.

² Vou saia mai anglal e Devlea.

³ Sa e ezgode letar cherdile, a bi leko niso katar so si cherdo ni cherdiloia.

⁴ Ande le saia o zivoto, ta o zivoto saia o villelo e manusengo.

⁵ O villelo ando truñariko klichil, ta o truñariko nasti mundarda le.

⁶ Saia iek manus bichaldo e Devletar, kai ikkardola Juan.

⁷ Vou avilo pala e orba e chachi, te sai del e orba e chachi katar o villelo, te sai pachan ande le sa e manusa pala e orba kai vou dela.

⁸ Vou ni saia o villelo, vou avilo te sai del orba chachi katar o villelo.

⁹ O villelo chachuno kai kletosarel suakone llene avela pe gava sueto.

¹⁰ Ando sueto saia, ta o sueto letar cherdilo; a o sueto ni llangla ko saia vou.

¹¹ Pala piro avilo, a leke ni lie le.

¹² A sa golen kai lie le, golen kai pachan ande leko anau dia len e dragostia te sai cherdon chave e Devleke.

¹³ Von ni biandile katar e volia e maseki, ni rateki, ni e manuseki, von biandile e Devletar.

¹⁴ Ta gua Alau cherdilo manus, ta inzarda pi chara maskar amende, pperdo volipe ta chachipe; ta dikklam leki dragostia, dragostia sar o edino Chavo e Devleko.

¹⁵ O Juan dia orba chachi letar kana ppenda: Gava si kai me ppenava letar: “Kai avel pala mande, kai si mai anglal mandar, soke saia mai anglal mandar.”

¹⁶ Soke saurre liam katar leko barvalipe ta katar leko chachipe,

¹⁷ soke o zakono diale katar o Moises, a o volipe ta o chachipe avile katar o Jesukristo.

¹⁸ E Devle niko ni dikkla le nikada; o edino Chavo, kai si lea, vou diale te pinllardo.

Alava katar o Juan kai kristil

¹⁹ Gaia si e orba e chachi katar o Juan, kana e judiura bichalde katar o Jerusalem poponen ta levituria te puchen le: —¿Tu, ko san?

²⁰ Ta chachimaia ppenda lenge: —Me ni sem o Mesias.

²¹ Pale puchle le: —¿Ko san tu, o Elias? O Juan ppenda lenge: —Inai sem o Elias —¿A ko san tu, o porauko? O Juan ppenda: —Iok

²² Ppende leke: —¿A ko san? Si te ppena vareso golenge kai bichalde amen. ¿Ppen amenge ko san tu?

²³ O Juan ppenda: —Me sem o avazi katar iek lleno kai urkil po pusto: ‘Ortosaren e Gazdako drom,’ gia sar ppenda o porauko Isaias.

²⁴ A gola llene kai sea bichalde te den orba e Juanea, sea katar fariseura.

²⁵ Ta puchle le: —¿Soke kristisare, kana tu inai san o Kristo, ni o Elias, ni o porauko?

²⁶ O Juan ppenda lenge: —Me kristiu tumen e paiea, a maskar tumende si iek kai tumen ni pinllaren.

²⁷ Gava si gua kai avel mapalal mandar, me ni sem lacho ni te putarau o kavisi leke miniengo.

²⁸ Gala ezgode nakkle ande Betania, pe goia rig katar o Jordan, kote kai o Juan kristila.

E Devleko Bakro

²⁹ Ttiarinako o Juan dikkla kai o Jesus avela lete, ta ppenda: “¡Etalo kote e Devleko Bakro, kai ikanel o bilachipe e suetotar!

³⁰ Letar dava orba kana ppendem: ‘Pala mande avel iek lleno kai si mai baro mandar, soke vou zivila mai anglal te biandivau me.’

³¹ Ta ni me ni pinllarava le; goleke avilem te kristisarau e paiea, te sai pinllarel le o Israel”.

³² Ta o Juan ppenda: “Dikklem kai o Duo fuliela katar o miloso sargo iek gulubo, ta achilo upral pe lete.

³³ Me ni pinllarava le; A gua kai bichalda man te kristisarau e paiea, ppenda mange ‘Pe gua kai ka dikke kai fuliel o Duo ta kai achel pe lete, gua si kai kristisarel e Santone Duoa.’

³⁴ Ta me dikklem le, ta ppenau kai vou si e Devleko Chavo.”

E purve disipulura

³⁵ Ttiarinako pale saia o Juan, ta dui katar leke disipulura.

³⁶ Ta kana dikkla kai o Jesus llala kotar, ppenda: “¡Etalo kote e Devleko Bakro!”

³⁷ E dui disipulura e Juaneke kana asunde so ppenda o Juan lleletar pala o Jesus.

³⁸ Kana o Jesus boldinailo, ta dikkla kai llele pala lete, ppenda lenge: —¿So roden? Von ppende: —Kovachi, ¿kai zivi?

³⁹ O Jesus ppenda lenge: —Aven te dikken. Von llele ta dikkle kai zivila, ta achile lea gua llive.

⁴⁰ O Andres, pplal katar o Simon Pedro, saia iek katar e dui kai asundea e Juane, ta kai llele pala o Jesus.

⁴¹ O Andres mai anglal llelo te rodel pe pplale e Simono, ta ppenda leke: —Maladam e Mesiase (Mesias si “Kristo”).

⁴² Ta anda le kai o Jesus. Ta o Jesus dikkla pe lete, ta ppenda: —Tu san o Simono, chavo e Juaneko; tu ka ikkardo Sefas, Sefas si Pedro

O Jesus ikkarel e Felipe ta e Natanaele

⁴³ Ttiarinako mangla o Jesus te llal ande ppuv e Galileaki; malada e Felipe ta ppenda leke: —Aide pala ma.

⁴⁴ O Felipe saia katar e Betsaida, o foro e Andreseko ta e Pedroko.

⁴⁵ O Felipe malada e Natanaele ta ppenda leke: —Maladam gole kai o Moises pisisisarda letar ande lila e zakonoke, ta kai i e poraukura pisisarde letar: O Jesus, o chavo e Joseeko, katar o Nazaret.

⁴⁶ O Natanael ppenda leke: —¿Sai liklel varesavo lachipe katar o Nazaret? O Felipe ppenda leke: —Aide ta dik.

⁴⁷ Kana o Jesus dikkla kai o Natanael avela karing lete, ppenda letar: —¡Etalo kote avel iek chachuno lleno katar o Israel, kai ande lete inai kojaipe!

⁴⁸ O Natanael ppenda leke: —¿Katar pinllare man? O Jesus ppenda leke: —Mai anglal te ikkarel tut o Felipe, kana sana telal katar e simochina, dikklem tut.

⁴⁹ O Natanael ppenda leke: —¡Kovachi, tu san e Devleko Chavo! ¡Tu san o Charo e Israeleko!

⁵⁰ O Jesus ppenda leke: —¿Soke ppendem chuke “Dikklem tut telal katar e simochina” pacha? Ezgode mai bare galendar ka dikke.

⁵¹ Ta i ppenda leke: —Chachimaia ppenau tumenge kai katar angle ka dikken o miloso putardo ta e Devleke suechura kai liklen ta fulien upral pe manuseko Chavo.