Galatas 5 - Nuevo Testamento Romané 2007

O Jesus cherda te ava mukliarde

¹ O Kristo mukliarda amen te na ava esluge, goleke llan orta ande gua mukliardipe ta na cherdon pale esluge.

² Asunen man. Me o Pablo, ppenau tumenge kai te cherden prema o zakono katar e sirkunsision, ni ka trubul tumenge nisoke o Kristo.

³ Pale ka ppenau suakone lleneke kai mangel te sirkunsidilpe; morabi te cherel sa so ppenel o zakono.

⁴ Tumen kai mangen te aven llinde chache soke cheren so ppenel o zakono, durilen katar o Kristo, ta fuladilen katar o volipe e Devleko.

⁵ A amen adurichara e Duoia te resa te ava llinde chache cheres o pachape.

⁶ Soke cheres o Kristo Jesus, akana ni mol nisoke te cherdan o te na cherdan e sirkunsision. So mol akana si o pachape kai radil cheres o volipe.

⁷ Tumen llana po lacho drom. ¿Ko achada tumaro pachape ando chachipe?

⁸ Gua ni cherdale o Del, soke vou ikkarda tumen.

⁹ “Cherricha levadura cherel te ppukkol sa o marrno”

¹⁰ A man si e vera ando Del kai ni ka pparruven tumaro mislo. A o Del ka ttovel ande patnia gole kai mangel te muril tumen, ni chitilpe ko avela.

¹¹ A me pplalalen, te diema tumenge orba kai e sirkunsision mol la e judiura ni rodiea te mundaren man; ta te avilia goia mi orba ni cherdaia burkania maskar lende e viasta katar o krusto e Kristoko.

¹² A gola llene kai ppenen kai morabi te cheren tumenge e sirkunsision, mai sukar avela te chinen petar sa goia rig.

O volipe si sa o zakono

¹³ Pplalalen, tumen sen ikkarde te aven mukliarde. A cheres gua mukliardipe kai si tumen na cheren o bilachipe kai mangel tumari esnaga. So si te cheren si te radin iek avereke cheres o volipe.

¹⁴ Soke sa o zakono si ande iek kai ppenel gia: “Volisar avere sar voli tu tut.”

¹⁵ Arakken tumen soke te dandarden tumen ta te jalen iek avere, isto tumen ka zatrin tumen.

O zivoto prema o Duo e Devleko

¹⁶ Goleke ppenau tumenge: zivin prema o Duo, ta na roden te chaliaren e bilache ezgode kai mangel tumari esnaga.

¹⁷ Soke e mislura bilache inai prema o Duo, ta o Duo inai prema e bilache mislura. Iek avere ni kamen, ta goleke tumen nasti cheren sa so mangen.

¹⁸ A te sikada tumen o Duo, ondaka o zakono ni ka avel upral pe tumende.

¹⁹ Sa llana so cheren e llene kai llan pala e bilache ezgode kai mangel e esnaga: cheren o kurvaluko, cheren ezgode pogane ta bilache,

²⁰ blagosin avere delen ta drabaren. Si len joli, ni ttovenpe zanio nikaia, ta joliaon kana avere si le. Joliaon oma, cheren te avel joli, ta te fuladol suako llene pe pi rig.

²¹ Si lenge joli kana avere si, matarne, drago lenge te jan but ta cheren aver ezgode sargo gala. Ppenau tumenge, isto sar ppendem tumenge omanglal, e llene kai cheren gala ezgode ni ka aven ande charoina e Devleki.

²² A so cherel o Duo si: o volipe, e veselia, e pas, o terpipe, o pachivalipe, postenipe, e dragostia,

²³ te na avel istardipe ta te llanel o manus te achavel vou pe. Ni iek zakono nasti marelpe gale ezgodenchar.

²⁴ Ta e llene kai si katar o Kristo Jesus, mukle po krusto sa po bilachipe.

²⁵ Te zivi akana prema o Duo, muka te sikavel amen o Duo.

²⁶ Na istardiva ta na chera te avel murzania ni te avel joli maskar amende kana avere si le.