Galatas 4 - Nuevo Testamento Romané 2007

Akana ni sam esluge sam chave e Devleke

¹ So mangau te ppenau si, kai kana iek lleno kai si te achel leke sa so si leke dadeko ta si ternorro, gua lleno si sargo iek esluga makar avela o gazda katar sa.

² Si llene kai arakken le ta arakken leke ezgode, lligo ni ka ppenel leko dad kai avilo o vreme kai vou sai gazdaril.

³ Isto gia si amenchar: kana sama ternorre sama esluge katar e zakonura gale suetoke.

⁴ A kana avilo o vreme, o Del bichalda pe Chave kai biandilo katar iek diskinia ando zakono e Moiseseko,

⁵ te braduil amen katar o zakono ta te del amen e dragostia te ava chave e Devleke.

⁶ Ta soke akana sam leke chave, o Del bichalda ande amare lie pe Chaveko Duo kai ikkarel e Devle gia: “¡Abba! ¡Dade!”

⁷ Goleke akana ni san esluga, san e Devleko chavo. Ta soke san leko chavo leki volia si te le so ka mukel chuke.

⁸ Omanglal kana tumen ni pinllarena e Devle, sena esluge katar e dela kojamne.

⁹ A akana kai tumen pinllarden e Devle, o sai ppena, akana kai o Del pinllarda tumen, ¿soke muken te gazdarin pale pe tumende gola dela kojamne ta soke mangen te aven pale lenge esluge?

¹⁰ Tumen cheren eslave nesave llivesa chona ta bursa.

¹¹ ¡Si mange dar te na mol le niso o rado kai cherdem maskar tumende!

¹² Pplalalen, mangau tumendar te aven sargo me, soke me cherdilem sargo tumen. Tumen ni cherden mange nisavo bilachipe.

¹³ Tumen llanen kai e purvo drom kai diem tumenge orba katar e lachi viasta cherdemle soke sema nasualo.

¹⁴ Ta gua nasualipe avila iek zumadipe tumenge, soke ni muklen man korkorre pala mo nasualipe, tumen avilen manchar pachivale ¡Sargo kana me sema isto o Kristo Jesus!

¹⁵ ¿Kai tali e veselia kai saia tumen? Gia lache sena manchar kai sai ikandena tumare akka te den len mange.

¹⁶ A akana cherdilem tumaro dusmano samo soke ppenau tumenge o chachipe.

¹⁷ A gola kai mangen te pparruven e lachi viasta mangen te aven tumenchar, a lenge mislura si bilache. Von mangen te duriaven tumen amendar ta ondaka tumen te mangen te aven lenchar.

¹⁸ Sukar si te mange te ave avere llenenchar, ta te cherele lache misloia sa o vreme a na samo kana sem maskar tumende.

¹⁹ Chaurralen, pale dukkal man sargo kana dukkal iekke diskinia kana bianel, lligo ni ka aven sargo o Kristo.

²⁰ ¡Gia voliva te avau isto akana tumenchar te dau tumenge orba avere alavenchar, soke ni llanau so te misliu tumendar!

So si amenge e Agar ta e Sara

²¹ Tumen kai mangen te cheren so ppenel o zakono, ppenen mange iek ezgoda: ¿Nikada ni asunden so ppenel o zakono?

²² O zakono ppenel kai o Abraam avila le dui chaurre, iekkeki dei e Agar kai saia e esluga a ogoleki de saia e Sara romi e Abraameki.

²³ E eslugako chaurro biandilo prema e volia e manusengi. A o chaurro golako kai ni saia esluga biandilo te cherdol so ppenda o Del kana dia po alau.

²⁴ Gua avilape gia te llangliolpe iek ezgoda. E dui diskinie si sargo dui droma kai delpe o alau, iek saia o alau kai diape po burdo o Sinai, kai si sargo e Agar, goia kai saia e dei katar gua minono kai saia te avel esluga.

²⁵ Soke e Agar si sargo o burdo o Sinai kai si ande Arabia kai akana si sargo o Jerusalem, soke gua foro ta e llene ta lenge minone si esluge.

²⁶ A o Jerusalem kai si ando miloso inai esluga, ta amen sam lake chave.

²⁷ Soke ando Pisipe ppenel: “Veselisao diskinia kai inai tut minone; urkisar veselimatar, tu kai nikada ni llanglan e duk kana bianen, Soke e diskinia kai mukle la ka avel la mai but chaurre neko e diskinia kai si zinime.”

²⁸ Pplalalen, tumen sen sargo o Isaak, tumen sen e chave kai o Del ppenda kana dia po alau.

²⁹ A isto sargo ande gola llivesa kana o chavo kai biandilo prema e volia e manusengi murzila po chavo kai o Duo cherda te biandol, isto gia si akana.

³⁰ A ¿So ppenel o Pisipe? o Pisipe ppenel gia: “Trade avri e esluga ta lake chave, soke o chavo e eslugako nasti avel lea zanio so si te perel e chave katar e diskinia kai inai esluga.”

³¹ Goleke pplalalen, inai sam chave katar e esluga, sam chave katar goia kai inai esluga.