Galatas 2 - Nuevo Testamento Romané 2007

¹ Nakkle desustar burs ta llelem pale ando Jerusalem e Bernabea, ta inllardem manchar e Tito.

² Llelem soke o Del sikada mange kai saia te llau. Ta kote sikadem e llenen e lachi viasta kai ppenau e judionenge, ta sikadem e viasta i po chorial nesave llenenge kai gazdarina maskar lende te sai achardol kai so cherava o so cherdem, ni saia iek rado jasardo.

³ A ni o Tito, kai saia manchar ta kai saia griego, ni ttode le te cherel prema o zakono katar e sirkunsision.

⁴ Ta nesave llene kai cherenape pplal, ttodepe po chorial maskar amende te dikken o mukliardipe kai saia amen ando Kristo Jesus, ta te cheren amen pale esluge katar o zakono.

⁵ A nikada ni muklam te cheren pe piro, soke mangaia te achel tumenchar o chachipe katar e lachi viasta.

⁶ A e llene kai gazdarina mai but maskar lende ni ppende mange nisavi orba nevi (a mange ni chitilpe so sea von omanglal).

⁷ A von acharde kai o Del dia man o rado te ppenau e lachi viasta e llenenge kai inai judiura, isto sar dia e Pedro o rado te ppenel e lachi viasta e judionenge.

⁸ Soke isto o Del kai bichalda e Pedro te avel apostol maskar e judiura, bichalda i man te avau apostol maskar e llene kai inai judiura.

⁹ O Santiago o Pedro ta o Juan kai sea e mai bare ande kkanlliri, acharde kai o Del dia man gava rado gia sukar, ta die po va mande ta i kai o Bernabe te llangliolpe kai mangena te radi lenchar, ta avila lenge drago te radi amen maskar e llene kai inai judiura a von te radin maskar e judiura.

¹⁰ Samo mangle amendar te pomozi e chorren, a me ollikana ttovau sama gole ezgodake.

¹¹ A kana o Pedro llelo ande Antiokia diem pe lete, soke so cherela saia but bilacho.

¹² Soke mai anglal jala e llenenchar kai inai sea judiura a kana avile nesave llene kai bichalda len o Santiago, ondaka fuladilo lendar ta ni jala ios lenchar, soke darala katar e llene kai pachan but zurale ande sirkunsision.

¹³ Ta i ogola llene judiura kai pachana ando Jesus cherde pe leko ande leko kojaipe, pe gachin kai i o Bernabe cherda pe lengo.

¹⁴ Goleke kana dikklem kai ni cherena prema o chachipe katar e lachi viasta, ppendem e Pedroke angla sa e llene: “Tu, kai san judio, ta zivi sargo kana inai san judio; ¿soke chere e llenen kai inai judiura te zivin pe zor sargo kana sea judiura?”

Braduime cheres o Jesukristo

¹⁵ Amen biandilam judiura, ta inai sam bilache sargo gola kai inai judiura.

¹⁶ A llana kai niko inai llindo chacho soke cherel so ppenel o zakono, o manus si llindo chacho soke pachal ando Jesukristo. Goleke i amen pachaiam ando Jesukristo ta gia o Del llinel amen chache cheres gua pachape a na soke chera so ppenel o zakono. Soke niko ni ka avel llindo chacho soke cherel so ppenel o zakono.

¹⁷ Goleke i amen sam bilache soke roda te ava llinde chache cheres o Jesukristo sargo e llene kai inai judiura ¿a te si gia o Kristo cherel amen bilache? ¡Iok!

¹⁸ Te ppagau vareso ta mapalal te vazdaule pale, isto me sem o dosalo.

¹⁹ Soke cheres o zakono sem mulo e zakonoke te sai ziviu e Devleke a i me sem krustome e Kristoia.

²⁰ Ta akana ni ziviu me, o Kristo zivil ande mande. Ta o zivoto kai akana ziviu ande esnaga ziviule cheres o pachape kai si man ande Devleko Chavo kai volisarda man ta dia po zivoto pala ma.

²¹ Ni kamam te mukau pe iek rig o volipe e Devleko soke te avilema llindo cheres o zakono, samo gia muloia o Jesukristo.