Galatas 1 - Nuevo Testamento Romané 2007

O Pablo pisil e Galatasenge

¹ Me o Pablo ni sem bichaldo e manusendar ta ni sem ttodo lendar te cherau gaia buchi, isto o Jesukristo bichalda man, ta o Del o Dad kai cherda e Jesuse te ustel katar o meripe,

² me ta sa e pplal katar e kkanlliri kai si manchar bichala salami sa e llenenge katar e kkanllira kai si ande Galasia.

³ O Del amaro Dad ta o Gazda o Jesukristo, te del tumen katar po volipe ta katar pi pas.

⁴ O Jesukristo diape kurbano cheres amaro bilachipe, te braduil amen katar o bilachipe kai si akana ande gava sueto bilacho, soke gia mangla amaro Del ta Dad.

⁵ ¡Blagosime te avel o Del ostade! Gia te avelpe.

O Pablo chudilpe

⁶ Me chudisailem but tumendar soke durilen gia oma katar o Del kai ikkarda tumen ta sikada po volipe e Kristoia, a tumen akana pachaien ande aver viasta.

⁷ O chachipe si kai inai aver lachi viasta. So llalpe kote si kai aver llene ttoven aver mislura maskar tumende ta mangen te pparruven e lachi viasta e Jesukristoki.

⁸ A vareko te inllarela maskar tumende aver viasta kai inai sargo gaia kai amen ppendam tumenge, proketo te avel e Devletar, i te avava isto me o iek suecho katar o miloso.

⁹ Pale ka ppenaule tumenge: Vareko te ppenela tumenge aver viasta kai inai sargo goia kai lien, proketo te avel e Devletar.

¹⁰ Me ni rodau te avau drago e llenenge, me rodau te avau drago e Devleke. Ni rodau te achau lacho e manusenchar. ¡Te rodiema te achau lacho e manusenchar, ni avilema iek esluga e Kristoko!

¹¹ Pplalalen, mangau te llanen iek ezgoda: E lachi viasta kai me ppenau tumenge ni cherdala nisavo manus.

¹² Ni liemla ta ni sikilemla katar ni iek manus, isto o Jesukristo sikadala mange.

¹³ Tumen asunden so cherava omanglal kana pachava sargo e judiura ta sar llava silnomaia te marau e llenen kai sea katar e kkanlliri e Devleke ta sar mangava te zatriu la.

¹⁴ Cherava sa so cherena e judiura ta i mai but neko e llene kai sea ande me burs, soke kandava sa e zakonura amare puranenge.

¹⁵ A o Del volisarda man pe gachin kai esvirisarda man kana me ni sema ni biando ta ikkarda man soke o Del si but lacho,

¹⁶ ta sikada mange ko saia leko Chavo te inllarau leki viasta maskar e llene kai inai judiura.

¹⁷ Ta ni llelem ando Jerusalem kai e llene kai sea apostolura mai anglal neko me. Me sigardem te avau ande Arabia ta mapalal irisailem ando Damasko.

O Pablo ta ogola apostolura

¹⁸ Nakkle trin burs ta mapalal llelem ando Jerusalem te pinllarau e Pedro ta achilem lea desupanch llive.

¹⁹ A ni dikklem ni iekke katar ogola apostolura samo e Santiago o pplal e Gazdako.

²⁰ Angla o Del ppenau kai so pisiu tumenge si o chachipe.

²¹ Mapalal llelem karing e ppuv katar e Siria ta e Silisia.

²² A e llene kai sea katar e kkanlliri e Kristoki ande Judea ni dikklea man nikada.

²³ Von samo asundea kai omanglal rodava te mundarau len, a akana isto me ppenau goia lachi viasta kai omanglal mangava te zatriu.

²⁴ Ta blagosina e Devle pala so cherda o Del manchar.