Filipenses 4 - Nuevo Testamento Romané 2007

¹ Goleke ppalalen, gachin zeliu te dikkau tumen ta voliu tumen; tumen sen mi veselia ta mo chari, llan isto gia ande zor kai del tumen o Del.

² Mangau katar e Evodia ta katar e Sintike te avel len iek mislo sargo ppiorra ando Gazda.

³ A tu kai san mo chacho amal ando rado, mangau tutar te pomozi gale ppiorren, soke von radisarde manchar ta ppende e lachi viasta, ta i o Klemente ta ogola llene kai radisarde manchar. Lenge anava si pisime ande lila e zivotoke.

Sa so trubul te cheren

⁴ Veselin tumen ando Del suako llive. Pale ppenau tumenge: ¡Veselin tumen!

⁵ Sa e llene te acharen kai tumen sen postene. O Gazda si pase.

⁶ Na brigin tumen katar niso, molintumen ta ppenen sa tumare brige e Devleke; mangen letar ta den le fala.

⁷ Ta o Del ka del tumen pi pas kai si gia bari kai o sueto nasti acharel la, ta goia pas ka arakkel tumaro lio ta tumare mislura cheres o Kristo Jesus.

⁸ Pplalalen, mislin tumen ande sa so si chachuno, so si le liubao, so si chacho ta lacho, so si posteno, sogo si pinllardo kai si lacho, sogo si lachipe kai cherel te chudi tut, mislin tumen ande sogo prilichil letar te avel blagosime.

⁹ Cheren sa so sikadem tumen; cheren sa so dikklen kai me cherdem ta so asunden kai me ppendem. Ta o Del kai del amen pi pas, ka avel tumenchar.

O Pablo del fala e llenen kai zivin ando Filipos

¹⁰ Sem but veselo ando Gazda soke dien tumen golli mandar pale. Me ni ppenau kai bristrailen mandar, soke llanau kai ni diape tumenge o vreme te pomozin man.

¹¹ Ni ppenaule soke trubul man vareso, soke sikilem te veseliu man sogo te avela man.

¹² Llanau so si te zivi ando chorripe, ta llanau so si te zivi i ando barvalipe.

¹³ Sai nakkau varesavo bilachipe soke o Kristo del man e zor.

¹⁴ A tumen cherden sukar kai sena manchar ande me nuzde.

¹⁵ Kana llelemtar katar e Masedonia ta iakom ppenava e lachi viasta, samo tumen, e llene katar e kkanlliri katar o Filipos, sena gola kai pomozisarden man.

¹⁶ Soke kana sema i ande Tesalonika mai but katar iek drom tumen bichalden mange so trubula man.

¹⁷ Me ni ppenau te na den man niso; so me mangau si te avel tumen mai but angla o Del.

¹⁸ O Epafrodito dia mande sa so bichalden mange, ta akana si man mai but neko so trubula man. O pomozipe kai dien man saia mange sargo o meriso ta o taimano kai kkandel sukar, iek ezgoda dini e Devleke ta o Del lel la dragostimaia.

¹⁹ Goleke, o Del ka del tumen sa so trubul tumen, katar po glamno barvalipe kai si ando Kristo Jesus.

²⁰ ¡Te avel blagosime ostade amaro Del ta i Dad! Gia te avelpe.

²¹ Ppenen e llenenge kai si amare pplal ando Kristo ta sa e llenenge kai si katar o foro e Devleko kai bichalau lenge salami. E pplal kai si manchar bichalen tumenge salami.

²² Ta i bichalen lenge salami sa e llene kai si katar o santo foro, ta mai but e llene kai radin e kralioke katar e romanura.

²³ O Gazda o Jesukristo te blagosil tumen ta te del tumen po volipe.