Filipenses 2 - Nuevo Testamento Romané 2007

Te ava sargo o Kristo

¹ Te cherda tumen o Kristo te den zor averen, te cherda tumen o volipe te den veselia averen, te si saurrengo lio ande iek Duo, te si ande tumaro lio e zalba pala aver llene,

² cheren te avel mi veselia pperdi, zivin sa ande iek mislo, aven saurre ande iek ttan pala o volipe, pala iek duo, ta pala iek ezgoda.

³ Na cheren niso ande joli ni pala o baripe, cherenle prostimaia, ta suako lleno te dikkel avere mai baro neko vou pe.

⁴ Niko te na rodel o lachipe samo vou peke, morabi te rodel o lachipe i ogolenge.

⁵ Morabi te avel tumen isto o mislo e Kristoko,

⁶ O Kristo saia sargo o Del, Ta makar saia sar o Del ni kamla te avel leki zor ande goia ezgoda

⁷ Ta mukla pe iek rig vou pe ta cherdilo sargo iek esluga. Ta cherdilo sargo sa e manusa ta sikadilo sargo varesavo manus,

⁸ Ta kana saia sargo iek manus kandia e Devle, llik kai o meripe, llik kana mulo po krusto.

⁹ Goleke o Del dia le o mai baro baripe ta o anau mai glamno katar sa e anava,

¹⁰ ta angla gua anau kai si dino e Jesuseke, te sai den changenchar saurre ando miloso, pe ppuv ta telal tala e ppuv

¹¹ ta te llanen saurre kai o Jesukristo si Gazda, te avel blagosime o Del o Dad.

Sar morabi te ava

¹² Goleke pplalorralen, isto gia sar kandien man sa o vreme kana sema pasa tumende, pachan man ios mai but akana kai sem dur. Cheren te avel chachuno tumaro braduipe liubaimaia;

¹³ soke o Del ttovel ande tumaro lio te mangen te cheren o lachipe ta isto vou pomozil tumen te cheren le.

¹⁴ Sogo cherena, na murmalin ta na jan tumen,

¹⁵ te na ppenel tumendar niko kai sen dosale, ta si te aven chave e Devleke ta te aven chiste maskar gala llene bilache. Maskar lende tumen klichin sargo cheraia ando sueto,

¹⁶ pachan ande orba zivotoki. Ta kana ka avel o Kristo, me ka cherau baripe ande tumende, soke e patnia kai nakklem ta o rado kai cherdem die iek lacho chari.

¹⁷ I te avel dino mo meripe tumenge te getolpe so tumen si te den e Devle pala tumaro pachape, me veseliu man sa tumenchar.

¹⁸ Veselin tumen i tumen manchar.

O Timoteo

¹⁹ Aduricharau te cherel o Jesus o Gazda te bichalau tumenge e Timoteo, ta ka veseliu man but kana ka asunau tumendar vareso.

²⁰ Vou si o lleno kai mai but brigilpe pala tumende ta chachimaia mangel tumenge o lachipe;

²¹ saurre mangen te cheren o lachipe samo von peke, a ni cheren so mangel o Jesukristo.

²² A tumen akana llanen sar si vou ta llanen kai vou llelo manchar te ppena e lachi viasta ta pomozisarda man sargo kana saia mo chavo.

²³ Mangau te bichalau le tumende, a mai anglal morabi te llanau dal ka achau ios ande rubie;

²⁴ a si man e vera ando Del kai ka avau tumenchar oma.

²⁵ Mangau te bichalau tumenge i e pplale o Epafrodito, vou radil manchar, isto tumen bichaldena le mande kana trubula man ko te pomozil man.

²⁶ Vou zelil te avel tumenchar, ta si leke but briga soke tumen llanglen kai vou saia nasualo.

²⁷ Ta chachimaia saia nasualo, ta maka merel; a e Devleke avila zalba letar ta i mandar, te na avel mange ios mai but zalba.

²⁸ Goleke bichalau le tumende oma te veselin tumen kai ka dikken le pale ta te na avau gia tristome.

²⁹ Len le tumende sa e veselimaia sargo pplal ando Gazda ta volisaren e llenen kai si sargo vou,

³⁰ soke saia po meripe cheres o Kristo. Ttoda po zivoto po meripe ta maka merel, soke pomozisarda man ande so tumen nasti pomozina man soke sena dur.