Filipenses 1 - Nuevo Testamento Romané 2007

Salami

¹ Me o Pablo ta o Timoteo, esluge katar o Kristo Jesus, sa e llenenge kai si ando foro o Filipos ta kai pachan ando Jesus ta gazdarin ande kkanlliri ta gola kai pomozin len:

² Manga katar o Del amaro Dad ta amaro Gazda o Jesukristo, te del tumen volipe ta pas.

O Pablo del fala ta molilpe pala e llene kai pachan

³ Suako drom kai dau man golli tumendar dau fala me Devle;

⁴ ta suako drom kana moliuman, mangau veselimaia pala sa tumende;

⁵ soke tumen pomozisarden kana e lachi viasta lia te llal angle llik akana.

⁶ Me llanau kai o Del cherda iek rado but lacho tumenchar ta ka lacharel le ios lligo ni ka irilpe o Jesukristo.

⁷ Orta si te misliu man gia tumendar, soke tumen sen andre ande mo lio ta soke saurre sen manchar ande gava rado volimako kai dia man o Del, ta kana sema ande rubie ta llelem te dau orba angla e sudura ta te chacharau e lachi viasta.

⁸ O Del llanel pe gachin voliu tumen e volimaia kai del man o Kristo Jesus.

⁹ Kana moliuman mangau te cherdol ios mai baro tumaro volipe, ta te del tumen o Del bizaipe ta te cherel tumen te acharen,

¹⁰ te sai llanen te esvirin so si mai lacho, ta gia tumaro zivoto te avel chisto ta te na aven ando bilachipe kana ka irilpe o Kristo;

¹¹ soke tumen ka cheren o lachipe kai del tumen o Jesukristo, te sai avel bariardo ta blagosime o Del.

¹² Pplalalen, mangau te llanen kai e ezgode kai me nakklem pomozisarde te ppendol e lachi viasta.

¹³ Soke mo ppandipe cherda te asundol e viasta e Kristoki maskar e sudura romanura ta maskar sa e llene.

¹⁴ Ta kana e pplal dikkle kai sem ppanglo, but lendar lie zor te inllaren e viasta bi darako ta si len mai but vera ando Gazda.

¹⁵ Chachimaia nesave llene den orba e Kristoki jolinatar, soke mangen te aven mai but neko me, a aver llene cherenle lachimaia.

¹⁶ Nesave den e orba e Kristoki soke si len volipe, soke llanen kai o Del ttoda man te arakkau e lachi viasta;

¹⁷ a aver llene dikken samo von peke, ta inai chache, ta akana kai sem ande rubie mangen te cheren mange ios nuzde.

¹⁸ A ¿so si? Sargo avela, chachimaia o kojaimaia, den e Kristoki orba; ta gua veselil man. Ta ios mai but ka veseliu man,

¹⁹ soke llanau kai golea ka braduiu man, soke tumen molisailen pala ma ta soke o Duo e Jesukristoko pomozil man.

²⁰ Uzdiu man ta pachau chachimaia kai o Del ni ka mukel man ando lallao, llanau kai akana, sargo suako drom, ka sikadol e suetoke o baripe e Kristoko pe mande, ziviva o merava.

²¹ Soke o Kristo si mo zivoto, a te merau, mange si chari.

²² A te ziviva ande gaia esnaga ta te cherava but lachipe ni llanau so ka esviriu.

²³ Ni llanau savi katar e dui ezgode ka cherau: volisardema te merau ta te avau e Kristoia, ta gua avela mange drago mai but;

²⁴ a i mai preche si te ziviu cheres tumende.

²⁵ Ta sar me pachau goia ezgoda, llanau kai ka achau tumenchar te pomoziu tumen te llan angle ta te avel tumen mai but veselia ande tumaro pachape.

²⁶ Ta gia ka avau pale maskar tumende ta ka cherau te avel tumen mai but baripe ando Kristo Jesus.

O zivoto prema e lachi viasta

²⁷ Samo mangau tumendar te trudin tumen te zivin prema e lachi viasta e Kristoki. Llava o ni llava te dikkau tumen, mangau te asunau kai tumen llan orta ta ande iek mislo ta kai radin zanio pala o pachape ande lachi viasta,

²⁸ ta te na daran katar tumare dusmanura. Golea ka llangliolpe kai von ka zatrinpe ta i kai tumen ka braduin tumen. Ta gua avel e Devletar.

²⁹ Ta sen blagosime e Kristotar, soke sai pachan ande le ta sai nakken patnia pala le.

³⁰ Tumen ta me isto goia nuzda si amen. Tumen dikklen sar nakklem e nuzde. Ta akana asunden sar nakkau len pale.