Filemon 1 - Nuevo Testamento Romané 2007

Salami

¹ Me o Pablo ppanglo katar o Kristo Jesus ta o pplal o Timoteo bichala salami chuke Filemon kai pomozi amen ande gaia buchi.

² Ta e kkanllirake kai chidiniaol ande cho cher, ta i e ppiorrake e Apiake ta e Arkipoke, amaro pplal ande gava rado.

³ O Del kai si amaro Dad, ta o Gazda o Jesukristo te den tumen po volipe ta pi pas.

O Pablo molilpe pala o Filemon

⁴ Suako drom kana moliuman dau man golli tutar Filemon, ta dau fala me Devle cheres tu.

⁵ Soke ppende mange katar o volipe ta o pachape kai si tut pala o Gazda o Jesukristo ta i pala sa e llene kai si katar o foro santo.

⁶ Ta mangau e Devletar te lla angle che pachamaia ta te pinllare sa o lachipe kai sai chera pala o volipe kai si amen pala o Kristo.

⁷ Sem but veselo katar cho volipe. Soke tu pplala pperdan volipe o lio e llenengo kai si katar o foro e Devleko.

O Pablo del orba pala o Onesimo

⁸ Goleke i te avela man o gazdaripe ando anau e Kristoko te ppenau chuke so morabi te chere,

⁹ si mange mai sukar te mangaule tutar ando anau katar o volipe. Akana me o Plablo kai sem ppuro ta sem ppanglo cheres o Kristo Jesus,

¹⁰ mangau tutar te chere iek sebapi me chaurreke o Onesimo, kai akana sem sargo leko dad soke me ppendem leke e lachi viasta kate ande rubie.

¹¹ Omanglal o Onesimo saia chuke iek esluga bilacho, a akana trubul tut ta i man.

¹² Bichalau le chuke pale: vou si sargo mo chaurro.

¹³ Mange avilaia drago vou te achiloia kate manchar, te sai pomozil man po ttan chiro so me sem ppanglo cheres e lachi viasta.

¹⁴ A me ni kamam te cherau niso kai inai prema chi volia, ta te sai chere mangau gua sebapi tu tutar ta te na cherele pe zor.

¹⁵ Sai avelpe kai o Onesimo durilo tutar nesavo vreme te sai akana avel tuia ta nikada te na llaltar,

¹⁶ ta akana te na avel sargo iek esluga, te avel mai but neko iek esluga: te avel, sargo iek pplal kai voli. Me voliu le but, a tu morabi te voli le ios mai but, na samo sargo iekke manuse; morabi te voli le i sargo iekke pplale ando Gazda.

¹⁷ Goleke te sem chuke iek pplal ando pachape, le le sargo te le isto man.

¹⁸ A Te cherda chuke varesavo bilachipe o Onesimo, o te si chuke vareso unllile, me ka pochinaule.

¹⁹ Me o Pablo pisiu gala ezgode me vastea: Me ka pochinau. A saia te na pochinau chuke niso soke tu san mange unllile cho zivoto.

²⁰ Ea pplala, mangau tutar gava sebapi pala o volipe e Gazdako; cher te avel man gaia dragostia ande mo lio sar sam pplal ando Kristo.

²¹ Pisiu chuke soke llanau kai san iek lleno kai kande, ta llanau kai ka chere ios mai but neko so mangau tutar.

²² Ta lachar mange iek ttan kai te sovau; soke aduricharau te asunel o Del tumaro molipe kai cheren pala ma, ta te likau katar o ppandipe te llau te dikkau tumen.

Salami

²³ Bichalel chuke salami o Epafras kai si manchar ando ppandipe cheres o Kristo Jesus,

²⁴ ta i o Markos bichalel chuke salami, ta i o Aristarko ta o Demas ta o Lukas, von si kai pomozin man ande gaia buchi.

²⁵ O Gazda o Jesukristo te del tumen po volipe.