Efesios 6 - Nuevo Testamento Romané 2007

Chavalen, chaurre ta dada

¹ Chaurralen, kanden tumare daden gia sar si drago e Gazdake; soke gaia si iek ezgoda chachi.

² O purvo zakono kai del blagosipe si gava: “De liubao che dade ta i che da,

³ te sai llal chuke sukar ta te zivi but bursa pe ppuv.”

⁴ Ta tumen kai sen dada, na cheren tumare chaurren te joliaon, mai sukar sikaven len ando bizaipe kai mangel o Gazda.

Esluge ta gazde

⁵ Esluge, kanden e llenen kai kate pe ppuv si tumare gazde. Den len liubao, cherenle postenimaia ta tumaro lio te avel chacho lenchar. Cherenle sargo kana tumen radin e Kristoke.

⁶ Radin lenge, na samo kana von dikken pe tumende, te sai achen lache angla lende, mai sukar si te cherenle sargo esluge e Kristoke ta cheren chachimaia e volia e Devleki.

⁷ Cheren tumaro rado vrenimaia sargo iek rado e Gazdake a na e manusenge.

⁸ Soke morabi te llanen kai o Gazda ka del saurren prema o lachipe kai cherde ni chitilpe o sea esluge o ni sea esluge.

⁹ Ta i tumen gazde, morabi te den liubao tumare eslugen ta na te daraven len. Soke o Gazda lengo ta i tumaro si ando miloso ta angla le niko inai mai lacho iek averetar.

¹⁰ Ta akana pplalalen, roden te zuriaon ando Gazda ta ande leki zor.

¹¹ Arakken tumen, len e patave sastrune kai o Del dia tumen, te sai aven zurale ta te terpin kana ka avel pe tumende o kojaipe e llavoloko.

¹² Soke ni mara amen manusenchar kai si sargo amen, amen mara amen duonenchar kai si zurale ta bilache kai si katar o miloso, kai von gazdarin ta charoin po sueto katar o truñariko kai si truial amendar.

¹³ Goleke len sa e patave sastrune kai o Del dia tumen, te sai terpin ando llive bilacho, ta kana ka aven lacharde sukar, te achen zurale.

¹⁴ Goleke achen zurale, furiade e chachimaia.

¹⁵ Llan vrenimaia te ppenen e lachi viasta katar e pas.

¹⁶ Ta ttoven angla tumende o pachape te mundaren sa e fleche ppabarde kai chudel ande tumende o llavolo.

¹⁷ O braduipe te avel e challi sastruni te arakkel tumaro soro, ta e alava e Devleke te avel o jarni kai del tumen o Santo Duo.

¹⁸ Molintumen suako llive ta mangen e Devletar ando Duo. Ttoven sama ta na jasaren tumari zor, ta molintumen pala sa o foro santo.

¹⁹ Ta molintumen i pala ma, te sai del man o Del e alava kai morabi te ppenau, ta te del man e zor, ta gia te sai sikavau e lachi viasta kai saia gurudini.

²⁰ O Del bichalda man te sikavau gaia lachi viasta, ta goleke sem ppanglo akana. Mangen e Devletar te del man zor te ppenau bi darako e lachi viasta.

²¹ Bichalau tumenge e Tikiko amaro pplal; amen voli le but ta radil chachimaia e Kristoke, vou ka ppenel tumenge sar sem me ta so cherau.

²² Goleke, bichalau le tumende te ppenel tumenge sar sam amen, ta gia te del tumen zor.

²³ O Del kai si o Dad, ta o Gazda o Jesukristo, te del e pplalen pas, volipe, ta pachape;

²⁴ o Del te blagosil sa e llenen kai volin e Jesukristo, ta kai lengo volipe ni merel, gia te avelpe.