Efesios 5 - Nuevo Testamento Romané 2007

¹ Tumen sen chave e Devleke ta vou volil tumen, goleke morabi te aven prema lete.

² Morabi te volin saurren isto gia sar o Kristo volisarda amen ta diape pala amende te merel, sargo so si dino, sargo kurbano kai kkandel sukar e Devleke.

³ Tumen morabi te zivin sargo llene katar o foro santo, goleke morabi te na den orba katar o kurvaluko, ni katar nisavi ezgoda pogani, ni katar e llia e lovengi.

⁴ Na ppenen pogane alava, ni alava bilache, ni orbe dile, soke gala ezgode inai lache tumenge, mai sukar si te blagosin e Devle.

⁵ Tumen llanen gaia ezgoda kai kogo cherel kurvaluko, o cherel ezgode pogane, o mukela te inllarel le e llia e lovengi, (kai si sargo kana vou blagosil avere devlen), kogo cherela gala ezgode nasti avel le iek ttan ande charoina e Kristoki ta e Devleki.

Zivin ando villelo e Kristoko

⁶ Niko te na kojavel tumen alavenchar kai si chuche, soke isto pala gala ezgode o Del dukkavel gole llenen kai ni kanden le.

⁷ Goleke, te na avel tumen ni iek posla lenchar.

⁸ Tumen omanglal zivina ando truñariko, a akana kai sen e Gazdake zivin ando villelo, goleke morabi te zivin sargo llene kai si e villeloke,

⁹ soke o Duo del suako ezgoda lachi, del volipe, iek zivoto orta, ta o chachipe.

¹⁰ Goleke mislin tumen so si drago e Gazdake.

¹¹ Na ttoven tumen ande iek ttan e llenenchar kai cheren o bilachipe ta kai si katar o truñariko; mai sukar ttoven o truñariko ando villelo.

¹² Soke lallao si i te da orba katar e ezgode kai von cheren po chorial.

¹³ A kana sa e ezgode sikadon po villelo, o villelo cherel te dikkol suako ezgoda.

¹⁴ Goleke iek lleno pisisarda gia: “Llungado tu kai sove; uste katar o meripe, ta o Kristo ka ttovel pe tu po villelo.”

¹⁵ Goleke, arakken tumen ta na zivin dilimaia, soke sar morabi te zivin si bizaimaia.

¹⁶ Ttoven sama so cheren, soke gala llivesa si bilache.

¹⁷ Na cheren e ezgode dilimaia; morabi te acharen savi si e volia e Gazdaki.

¹⁸ Na maton, soke e mol inllarel kai o bilachipe; mai sukar pperdon katar o Santo Duo.

¹⁹ Kana ka chidiniaon, llilaben salmura ta llilia duoke, llilaben ta blagosin sa tumare liea e Gazda.

²⁰ Den fala suako llive e Devle ta Dad pala suako ezgoda ando anau katar amaro Gazda o Jesukristo.

Sar morabi te zivin e llene kai pachan ando Kristo maskar pi familia

²¹ Den liubao iek avere, cherenle pala o Jesukristo.

²² E romia morabi te den liubao pe romen sargo e Gazda.

²³ Soke o rom si o soro e romiako, gia sar o Kristo si o soro e kkanllirako ta e kkanlliri si leki esnaga ta vou si lako Braduimari.

²⁴ Gia sar e kkanlliri del liubao e Kristo, isto gia e romia morabi te den liubao pe romen pe suako ezgoda.

²⁵ Romalen, volin tumare romien gia sar o Kristo volisarda e kkanllira ta dia po zivoto pala la.

²⁶ Ta kana jalada la ando pai ta ande alava, chistosarda la ta cherda la santa.

²⁷ Te sai sikavel isto vou peke iek kkanlliri sukar, te na avel makkli ni gorchome ta te na avel la ni iek katar gala ezgode te avel santa ta bi dosaki.

²⁸ Isto gia e llene kai si zinime morabi te volin pe romien sargo pe esnaga. Ko volil pe romia volil isto vou pe.

²⁹ Soke niko ni murzin pe pi esnaga; volil la ta del la te jal ta arakkel la, isto gia si sar cherel o Kristo e kkanlliraia,

³⁰ soke voi si leki esnaga ta amen sam katar goia esnaga.

³¹ Gia ppenel so si pisime: “Goleke, o manus ka mukel pe dade ta pe da, te sai avel ande iek ttan pe romiaia, ta e dui ka aven sargo iek mas.”

³² Kate sikadol gia baro si so mangela te cherel o Del, a gala ezgode sea gurudine, ta ppende si cheres o Kristo ta e kkanlliri.

³³ Goleke suako lleno tumendar morabi te volil pe romia sargo isto vou pe, ta suako romi morabi te del liubao pe rome.