Efesios 4 - Nuevo Testamento Romané 2007

Na muken o volipe maskar tumende

¹ Goleke me kai sem ppanglo cheres o Gazda, mangau tumendar te zivin sar morabi te zivin e llene kai si ikkarde e Devletar, gia sar sen tumen ikkarde.

² Te aven proste ta lache ta te terpin iek avere volimaia;

³ Trudin tumen te aven ande iek ttan cheres e pas kai chidel saurren tumen o Santo Duo,

⁴ samo iek esnaga ta samo iek Duo gia sar o Del ikkarda tumen ande iek pachape.

⁵ Samo iek Gazda, iek pachape, ta samo iek kristope;

⁶ samo iek Del kai si o Dad saurrengo kai si upral pe sa ta radil saurrenchar ta si ande sa.

⁷ A suakone llene amendar o Kristo dia amen so vou mangla te del amen.

⁸ Goleke o Pisipe ppenel gia: “Kana likisto ando miloso inllarda pea e ppanglen, ta dia e manusen o bizaipe te llanen so te cheren.”

⁹ ¿A so mangen te ppenen gola alava kai “likisto”? Gola alava ppenen kai mai anglal fulisto pe gaia ppuv.

¹⁰ Ta gua kai fulisto si isto gua kai likisto mai upre katar o miloso, te sai pperel sa.

¹¹ Ta isto vou si kai dia nesave llenen te aven apostolura, averen te aven poraukura, averen te ppenen e lachi viasta, ta averen te aven chobanura, averen te aven gola kai sikaven.

¹² Gia lacharda e llenen katar o foro santo te cheren iek buchi te sai bariaven e kkanlliri e Kristoki

¹³ lligo ni ka resa saurre te ava ande iek ttan ando pachape ta te llana katar o Chavo e Devleko, te ava llene gotove gia sar si o Kristo.

¹⁴ Ta ni ka ava sargo minone kai but oma pparruven po mislo ta kai pala varesavi orba muken te kojaven len e llene llangle kai si pperde kojaipe.

¹⁵ Goleke morabi ando volipe te ppena o chachipe, ta te bariva karing o Kristo kai si o soro e esnagako.

¹⁶ Ta pala o Kristo sa esnaga ttodol pe po ttan; ta kana sa e esnaga radil pe po ttan, bariol ta lachardol ando volipe; ta kana suako kotor lako radil sukar, sa voi bariol ta vazdiniaol ando volipe.

O nevo zivoto ando Kristo

¹⁷ Gava si so ppenau tumenge te cheren ando anau e Gazdako: te na zivin sargo e llene kai ni pinllaren e Devle ta zivin prema pe dile mislura

¹⁸ ta ni acharen niso. Von ni veselinpe ando zivoto kai del o Del, ta ni acharen soke lengo lio kai si zuralo ni mukel len te acharen.

¹⁹ Goleke lengo lio zurailo ta diepe ando kurvaluko ta cheren suako ezgode bilache ta pogani.

²⁰ A tumen ni pinllarden e Kristo te zivin gia,

²¹ soke chachimaia tumen asunden e orba cheres lete ta sikilen te zivin sar vou mangel prema o chachipe kai si ando Jesus.

²² A cheres sar zivina omanglal, chuden tumendar gua purano manus kai murisailo pala pe bilache mislura.

²³ Morabi te aven neve ando duo tumare mislura

²⁴ ta te furiadon katar o nevo manus cherdo prema o Del te achardol kai tumaro zivoto si Devlikano ta kai llan pala o chachipe.

Sar morabi te zivi akana

²⁵ Goleke na kojaven ios, mai sukar si te ppenel suako lleno o chachipe iek avereke, soke saurre sam katar iek esnaga.

²⁶ Te joliaona, na cheren o bilachipe; tumari joli te na avel pe tumende sorro llive.

²⁷ Na den ttan e llavolo.

²⁸ Gua kai vazdela te na vazdel ios ta te ttovelpe te radil ta te cherel iek lacho rado pe vastenchar, te sai avel le vareso te del e llenen kai trubul len.

²⁹ Na ppenen brusne alava, mai sukar ppenen ezgode lache te sai bariaven o pachape averengo.

³⁰ Na cheren te tristolpe o Santo Duo e Devleko, soke cherda te achardol kai sen leke ando llive kana vou ka braduil tumen.

³¹ Muken o tristope, na joliaon na urkin ta na kusen averen, ta muken o bilachipe.

³² Morabi te aven lache ta postene iek averea, ta maskar tumende prostin tumen gia sar o Del prostisarda tumen ando Kristo.