Efesios 1 - Nuevo Testamento Romané 2007

¹ O Pablo, apostol e Jesukristoko pala e volia e Devleki, del salami gole llenenge kai si katar o foro santo kai si ando Efeso kai pachan ta si ande iek ttan e Kristoia.

² O Del kai si amaro Dad ta amaro Gazda o Jesukristo, te ttovel pe tumende po volipe ta pi pas.

O Pablo blagosil e Devle pala o braduipe

³ Blagosime te avel o Del kai si o Dad amare Gazdako o Jesukristo, soke ando Kristo blagosisarda amen ando miloso katar sa o blagosipe duoko.

⁴ O Del esvirisarda amen ando Kristo mai anglal te cherel e ppuv, te sai ava sante ta bi dosake angla le pala po volipe.

⁵ Vou chinadaia amenge te lel amen sargo pe chaurren pala o Jesukristo, soke gia chinadale ande po volipe.

⁶ O Del cherda sa gava te sai blagosi le pala po baro volipe, ta blagosisarda amen pala po chaurro kai volil.

⁷ Ando Kristo, fala katar leko rat kai perada, si amen braduipe ta o prostipe katar o bilachipe. Soke o Del bariarda pe amende po baro barvalipe volimako,

⁸ ta dia amen te achara ta i dia amen baro bizaipe,

⁹ ta dia amen te pinllara so saia gurudino katar leki volia, katar so vou mangel te cherel. Vou ande po volipe mangla te cheren ando Kristo gaia volia.

¹⁰ Kana ka avel o vreme ka cherel so vou mangel ta ka chidel sa e ezgode katar o miloso ta i katar e ppuv, ta angla lende ka ttovel e Kristo te gazdaril.

¹¹ Ando Kristo o Del esvirisarda amen mai anglal te sai avel amen leko barvalipe, gia sar manglale isto o Del ta sa so cherel, cherel le sar vou mangel.

¹² Ta vou mangla mai anglal amen te ttova amaro pachape ando Kristo, te sai saurre blagosi leki zor e bari.

¹³ Ta fala e Kristoke, i tumen asunden e orba chachuni, katar e lachi viasta katar leko braduipe, ta tumen lien gava pachape, ta i lien o Santo Duo kai ppendaia kai ka del tumen.

¹⁴ O Duo kai lien si te llanen kai o alau kai o Del dia tumen ka cherel le kana ka braduil sa e llenen kai sam katar leko foro, te sai saurre blagosi leki zor e bari.

O Pablo molilpe pala e llene kai pachan

¹⁵ Goleke, sar me llanau kai si tumen pachape ando Gazda o Jesus ta si tumen volipe pala sa o foro santo,

¹⁶ ni achau te dau fala e Devle cheres tumende, ta dau man golli tumendar kana moliuman.

¹⁷ Mangau katar o Del amare Gazdako o Jesukristo, o Dad o baro, te del tumen po Duo te sai aven bizai, te sai pinllaren le chachimaia.

¹⁸ Mangau e Devletar te putarel tumaro mislo te sai llanen savo si o braduipe kai sen ikkarde, gia baro si o barvalipe kai ka del o Del pe foro kai si santo.

¹⁹ Ta gia bari si leki zor kai radil ande amende kai pacha. Gaia zor si isto goia kai o Del sikadaia bare zoriaia

²⁰ kana vazdia e Jesuse katar o meripe ta cherda le te besel pe pi rig e chachi ando miloso,

²¹ ta ttoda le upral pe suako zor, pe suako gazdaripe, pe suako birovi duonengo, ta pe suako anau kai sai ppendol pe gaia ppuv ta i pe o goia e nevi ppuv kai si te avel.

²² Ttoda sa e ezgode telal tala e porrne e Kristoke ta ttoda le te avel o soro e kkanllirako.

²³ Soke e kkanlliri si e esnaga e Kristoki, ta letar lel sa so trubul la, soke o Kristo si kai pperel la katar sa so trubul la, ta e kkanlliri achel pperdi.