Ebreos 9 - Nuevo Testamento Romané 2007

E kurbanura purane

¹ E purve alava ppenena sar saia te blagosin e Devle ande leki chara kai si pe ppuv.

² Soke goia chara kai vazdinaili saia la lako purvo ttan kai ikkardol o Ttan Santo, kote saia o kandelabro ta o stali kai ttovena e marrne kai sea chinade e Devleke.

³ Palal pala gua chiti saia o duito Ttan kai ikkardol Santisimo;

⁴ kote saia o altar sunakuno kai ppabarena o taimano ta o bauli katar e alava kai saia mardo ando sunakai. Ta andre ando bauli saia iek bralli sunakuni kai andre saia o mana, ta ando bauli saia i e rovli e Aaronoki kai dia e lulunlla, ta e dui kotora barrustune katar o zakono.

⁵ Upral po bauli cherdea dui suechura kai pe ppakkenchar ucharena o kapako katar o bauli. A akana ni trubul te da orba katar suako ezgoda kai saia kote.

⁶ Gia sea ttode sa gola ezgode ta e popura dena suako drom ando purvo ttan e charako te cheren pi buchi ta te blagosin.

⁷ A po duito ttan dela samo o mai Baro Popo, ta samo iek drom ando burs; ta kana dela, saia te inllarel o rat katar e kurbanura ta te del le cheres pete ta cheres o bilachipe kai cherela o foro ta kai ni acharenale.

⁸ Galea o Santo Duo cherel amen te llana kai kana saia e chara e Devleki o drom kai inllarel kai o ttan Santisimo kai ni saia putardo varekake.

⁹ Sa gala ezgode cherdile te sai sikaven amen so si mai baro akana; soke so si dino ta e kurbanura kai den e Devleke nasti cheren e manusen te acharenpe bi dosako samo soke cheren gua blagosipe.

O chachuno kurbano

¹⁰ Gala ezgode si samo katar o jape ta o pipe ta nesave zakonura e jaladimake, a gala ezgode nasti pparruven amaro zivoto. Gala alava si ttodine samo lligo ni ka avel o vreme kai o Del ka pparruvel len.

O nevo kurbano

¹¹ A o Kristo avilo ta akana vou si o mai Baro Popo, ta fala leke si amen sa gala ezgode. E chara e Devleki kai vou cherel bi buchi popoki, si mai lachi ta mai orta ta inai cherdi e manusendar; goleke goia chara e Devleki inai gale ppuviaki.

¹² O Kristo dia ande chara e Devleki, na te sikavel o rat katar e busne ta katar e guruva, vou nakklo isto pire ratea iek drom ta lia amenge o braduipe katar o bilachipe ostade.

¹³ Istina si kai o rat katar e guruva ta katar e busnia ta o prajo kai achel katar e guruvmi kai ppabardol po altar, lelpe ta ttodol pe llene kai si pokalime, ta achen sante ta jalaven len avrial.

¹⁴ A te si gaia ezgoda gia, ¡Pe gachin mai but ka avel le zor o rat e Kristoko! Soke katar o Duo kai zivil ostade, o Kristo dia isto vou pe kurbano e Devleke bi dosako, ta leko rat jalavel amen ta Del amen pachape kai sam prostime te sai radi e Devleke kai si llundo.

O nevo alau

¹⁵ Goleke o Jesukristo cherel te da ande iek neve alava e Devlea. Soke o Jesukristo mulo te sai o Del prostil o bilachipe kai cherde e manusa kana sea pe purve alava, ta vou cherda golen kai o Del ikkarda te len o barvalipe ostade soke o Del dialen po alau.

¹⁶ Te kanden e alava kai iek lleno mukla, morabi mai anglal te llangliolpe kai gua lleno mulo.

¹⁷ Soke nasti kanden e alava kai mukel iek lleno kana gua lleno zivil, samo sai kanden len kana gua lleno si mulo.

¹⁸ Goleke i e purve alava sea ratea.

¹⁹ O Moises ppenda sa e alava e zakonoke sa e foroke; mapalal lia e bal e bakreke makkle ando lolipe ta iek krango katar o isopo, ta makklalen ando rat e guruvengo ta e busnengo amime e paiea, ta makkla o lil katar o zakono ta i sa e foro.

²⁰ Ondaka ppenda lenge: “Gava si o rat kai chacharel e alava kai o Del dia tumen.”

²¹ Ta o Moises makkla e ratea i e chara e Devleki ta sa e ezgode kai si e blagosimake.

²² Soke o zakono ppenel kai preko sa e ezgode morabi te aven jalade e ratea; ta inai prostipe katar o bilachipe te na chordola o rat.

²³ Goleke trubul gola kurbanura te sai jalaven gola ezgode soke cherdelen prema e ezgode kai si ando miloso; ta e ezgode kai si ando miloso trubul len mai lache kurbanura neko gola.

²⁴ Soke o Kristo ni dia ande goia chara e Devleki cherdi e manusendar, kai samo dikkola sargo e chachuni chara, vou dia isto ando miloso, ta kote sikadol angla o Del te sai molilpe cheres amende.

²⁵ Ta ni dia te delpe kurbano but droma, gia sar cherel le o popo suako burs kai del ande chara e Devleki te del iek rat kai inai leko.

²⁶ Te cherdaia isto gia o Kristo, vou saia te merel but droma sar kana o Del cherda e ppuv. A o chachipe si kai akana kai si o son katar o vreme, o Kristo avilo iek drom ta ostade ta diape isto vou pe kurbano te sai lel o bilachipe.

²⁷ Isto gia sar sa e manusa morabi te meren iek drom ta mapalal ka avel e kris,

²⁸ isto gia o Kristo diape iek drom te lel o bilachipe katar but llene. Ta mapalal vou ka avel pale, ta ni ka avel le ni iek posla e bilachimaia, vou ka avel te braduil golen kai aduricharen le.