Ebreos 8 - Nuevo Testamento Romané 2007

E neve alava

¹ E mai bari orba kai da kate si kai gia baro si amaro Baro Popo, kai beslo ando miloso pe rig e chachi e Devleki ande leki charoina,

² ta sar si popo, cherel pi buchi ande chachuni chara e Devleki kai cherdala o Gazda a na e manusa.

³ Suako mai Baro Popo si ttodo te sikavel e Devleke so si dino ta i e kurbanura, goleke i e Kristo morabi te avel le so te del.

⁴ Te aviloia vou pe ppuv ni aviloia popo, soke kate si popura kai sikaven e Devleke so si dino gia sar mangel o zakono e Moiseseko.

⁵ A gala popura sikaven pi buchi ande iek chara e Devleki kai si samo e senke katar so si ando miloso. Ta amen llana kai gola ezgode inai chachune, soke kana o Moises mangela te vazdel e chara e Devleki, o Del ppenda leke: “ttou sama ta cherla sa prema e chara kai sikadem chuke po burdo.”

⁶ A amaro mai Baro Popo lia iek buchi popoki ios mai lachi, ta cheres lete achilam pe iek orba mai lachi ta adurichara mai lache ezgode.

E orba purani

⁷ Soke te avilaia orta e orba kai achilama omanglal, ni trubusardaia te acha pe iek nevi orba.

⁸ Soke o Del ni malada orta gole llenen, ta ppenda: “O Gazda ppenel: Ka avel o llive kai ka achau pe iek nevi orba e foroia katar o Israel ta i e Judaia.

⁹ Pe gaia orba kai achilen akana ni ka avel sargo o goia orba kai achilema lenge puranenchar, kana istardem len katar o va te ikanau len katar o Ejipto; ta sar von ni kandie mo alau, me muklem len, ppenel o Gazda.

¹⁰ Goleke kana ka nakken gola llivesa ka achau pe gava alau e foroia katar o Israel gaia ka avel e orba ppenel o Gazda: Ka ttovau me zakonura ande lenge mislura ta ka pisiulen ande lengo lio. Me ka avau lengo Del ta von ka aven mo foro.

¹¹ Ni ka trubul te sikavel iek avere, o iek pplal pe pplale te sai pinllaren e Gazda, soke saurre ka pinllaren man, katar o mai minono ta llik kai o mai baro.

¹² Me ka prostiu lengo bilachipe ta nikada ios ni ka dau man golli katar lengo bilachipe.”

¹³ Kana o Del del orba katar iek nevo alau gua si soke o gua alau achilo purano; ta so si purano ta ppuriol, leko meripe si pase.