Ebreos 5 - Nuevo Testamento Romané 2007

¹ Suako mai Baro Popo si esvirime maskar e manusa ta ttodo te pomozil e manusen pe so si dino e Devleke ta pe kurbanura te sai o Del prostil len.

² Ta sar i vou si kovlo soke si manus, sai avel leke zao katar e llene kai ni acharen ta i katar gola kai jasaile katar o drom;

³ ta cheres isto leko kovlipe i vou trubul te del kurbano katar po bilachipe ta i katar o bilachipe e foroko.

⁴ Ta niko nasti avel o mai Baro Popo samo soke vou mangel, soke o Del si kai ikkarel le ta del le goia dragostia gia sar cherdale e Aaronoia.

⁵ Isto gia o Kristo ni ttoda vou pe te avel o mai Baro Popo, o Del si kai dia le goia dragostia, soke o Del ppendaia leke: “Tu san mo chaurro; allive me sem cho Dad.”

⁶ Ta i pe aver rig ando Pisipe ppenel gia: “Tu sam popo ostade, isto sar saia o Melkisedek.”

⁷ Kana o Kristo zivila kate pe ppuv, rovda ta molisailo zurale ta mangla e Devletar te braduil le katar o meripe; a o Del asunda le soke vou saia chacho ta kandela le.

⁸ A vou saia o chavo e Devleko ta ande duk ta e patnia sikilo so si te kandel e Devle,

⁹ ta gia kana o Kristo cherda sa so o Del mangla letar, cherdilo o Braduimari kai del zivoto ostade sa golen kai kanden le.

¹⁰ Ta o Del ppenda kai vou si o mai Baro Popo gia sar saia o Melkisedek.

Te sikiva te bariva ando pachape

¹¹ Si amen but te ppena katar gaia ezgoda ta amenge si trudno te sikavala soke tumen ni acharen oma gala orbe.

¹² Dumut cherel kai tumen pachaien ande lachi viasta ta pala o vreme kai nakkla tumen saia te aven kovacha, a pale morabi te sikaven tumen e mai palune ezgode katar o Del. Ta pale cherdilen gia kovle kai trubul tumen te pien ttut sargo minone a na te jan jape zuralo.

¹³ A gola kai pien ttut si sargo minone kai ni llanen so si o lachipe ta o bilachipe.

¹⁴ A O jape zuralo si e barenge, golenge kai acharen so si o lachipe ta o bilachipe.