Ebreos 4 - Nuevo Testamento Romané 2007

¹ Ttoven sama, soke o Del dia po alau kai ka ava ande leko esmiro ta gua alau si amenge dino i allive, goleke morabi te arakka amen soke sai avelpe kai nesave tumendar nasti ka len gua esmiro.

² Soke amen asundam e lachi viasta, sargo von; a lenge ni blazisarda niso kai asunde goia orba, soke ni ttodepe ande iek ttan e llenenchar kai pachaie.

³ Goleke amen kai pachaiam, ka ava ande gua esmiro kai o Del ppenda: “Goleke jalem sovel ande mi joli kai ni ka den ande mo ttan katar mo esmiro.” A o Del getosardaia pi buchi sar kana cherda e ppuv;

⁴ Soke pe iek rig ando Pisipe ppenel gia katar o sabado: “O Del achilo esmiro katar sa po rado ando sabado.”

⁵ Ta pale ppenel ando Pisipe: “Ni ka den ande mo esmiro.”

⁶ A trubul te den ios llene ande gua ttan katar o esmiro, soke gola kai mai anglal lie gaia orba ni kandie.

⁷ Goleke o Del pale ttovel iek llive kai si akana, gia sar ppendaiale e Davidetar pala but vreme mai angle ando Pisipe gia sar ppendam tumenge: “Te asunena allive leko avazi na zuriaven tumaro lio.”

⁸ Soke o Josue te diaia o esmiro e llenen katar o Israel, o Del ni diaia orba katar aver llive.

⁹ Goleke o foro e Devleko aduricharel iek esmiro.

¹⁰ Soke gua kai del ando esmiro e Devleko katar po rado, gia sar o Del achilo esmiro katar piro rado.

¹¹ Goleke morabi te chera amenge zor te sai da ande gua esmiro, ta gia niko te na sikol katar gola llene kai ni pachaie.

¹² Soke e Devleke alava si len zivoto ta zor. Ta chinen mai but neko nisavo jarni kai si ostro pe dui riga, ta del chak andre katar amaro zivoto ta katar amaro duo, ta del gia andre kai kote dikkel bristomaia so manga te chera ta amare mislure dal si lache o bilache.

¹³ Niso katar so cherda o Del nasti gurudol letar; o Del dikkel suako ezgoda bristomaia, ta morabi te lachara amen lea pe suako ezgoda kai cherdam.

O Jesus, o popo posteno

¹⁴ O Jesus, o Chavo e Devleko, si amaro mai Baro Popo kai dia ando miloso. Goleke, morabi te ava zurale ando pachape kai liam.

¹⁵ Soke amaro mai Baro Popo si leke zao katar amaro kovlipe, soke isto vou saia zumado sargo amen; samo kai vou nikada ni cherda o bilachipe.

¹⁶ Goleke, kana ka trubul amen vareso, morabi te ava bi darako kai o Del, soke vou ka pomozil amen soke si lacho ta volil amen.