Ebreos 3 - Nuevo Testamento Romané 2007

O Jesus ta o Moises

¹ Goleke pplalalen, tumen kai sen katar o foro santo, kai sen ikkarde e Devletar te aven leke, ttoven sama ko si o Kristo Jesus, vou si o Apostol ta o mai Baro Popo, kai fala leke si amen gava pachape.

² Soke o Jesus saia chacho e Devlea, goleke ttoda le pe gaia buchi, gia sar o Moises saia chacho pe buchi kai o Del dia le te pomozil pe suako ezgoda leke foro.

³ A o Del dia mai but liubao e Jesuse neko e Moisese, isto gia sar iek lleno kai cherel iek cher den le mai but liubao neko isto e chere.

⁴ Suako cher morabi te avel cherdo varekatar; a o Del si kai cherda suako ezgoda kai si.

⁵ Goleke, o Moises sar saia esluga chacho e Devleko, pomozisarda leke foro isto gia sar ppenda leke te pomozil, ta leko rado saia te ppenel e alava kai o Del saia te ppenel mai angle.

⁶ A o Kristo, sar si o Chavo chacho po foro e Devleko, kai sam isto amen, te pachaia sa amare liea ando pachape ta ande veselia kai adurichara.

Ppenel amenge te ava chache

⁷ Goleke ppenel gia o Santo Duo ando Pisipe: “Te asunena allive e Devleko avazi

⁸ Na zuriaven tumaro lio sargo gola kai ni kamle te kanden ta zumavena e Devle po pusto.

⁹ Kote ttode man ando zumadipe tumare purane, i kana dikkle so me cherdem ande saranda burs.

¹⁰ Goleke jolailem gole vichaia, ta ppendem: ‘jasarde llan ande po lio, ta ni kamle te sikon me droma.’

¹¹ Goleke jalem sovel ande mi joli kai ni ka mukau len te den ando Kanaan te chinion katar po rado.”

¹² Pplalalen, arakken tumen te na avel ande ni iek lleno maskar tumende iek lio bilacho kai ni pachal ta te duriol katar o Del o llundo.

¹³ Goleke, den tumen zor iek avere suako llive, so achela gole “llivesetar” kai del orba ando Pisipe, te na kojavel nika tumendar o bilachipe ta tumaro lio te na cherdol iek lio kai ni kandel.

¹⁴ Si amen iek ttan e Kristoia te na jasardam o pachape, gua pachape kai saia amen mai anglal.

¹⁵ Goleke ppenel gia ando Pisipe: “te asunena allive e Devleko avazi, na zuriaven tumaro lio sargo gola llene kai ande gola llivesa zuriarde po lio te na kanden.”

¹⁶ ¿A ko sea gola llene kai zuriardea po lio ta ni kamle te kanden kana asundea e Devleko avazi? Gola si sa e llene kai o Moises ikandaia katar o Ejipto.

¹⁷ ¿Kaia saia joliariko o Del saranda burs? E llenechar kai cherde o bilachipe, ta lenge esnage achile mule po pusto.

¹⁸ Ta o Del jala lenge sovel, kai ni ka den ando Kanaan, gola alava sea golenge kai ni kandie.

¹⁹ Ta de istina von nasti nakkle ando Kanaan soke ni pachaie.