Ebreos 2 - Nuevo Testamento Romané 2007

Gia baro braduipe

¹ Goleke morabi te ttova mai but sama e alavenge kai asundam katar o braduipe te na duriva katar o drom e Devleko.

² A e orba kai ppende e suechura kai o Del bichalda saia zurali sargo zakono, ta gola kai cherde o bilachipe ta ni kandie gola alava lie e duk prema e ezgode kai cherde.

³ ¿A sar ka nasa amen te na ttodam sama katar gava braduipe kai si gia baro?

⁴ Ta o Del sikada amenge ande sa e bare ezgode Devlikane kai so ppenda si chachipe ta dia o Santo Duo kai e llene kai vou mangla.

O Jesus braduil amen

⁵ A o Del ni ttoda e suechonen te gazdarin pe ppuv kai amen ppena kai ka zivi mai angle.

⁶ Soke ando Pisipe ppenel gia: “¿So si o manus? ¿Soke de tut golli leke ta brigi tut cheres lete?

⁷ Cherdan le cherricha mai minono neko e suechura, dian le iek korona barimaki te gazdari; cherdan te gazdaril pe sa e ezgode kai cherdan.”

⁸ Goleke sar cherda le te gazdaril pe sa so cherda, o Del ni mukla niso te na achel avri katar leko gazdaripe. A amen ni dikklam te gazdaril pe sa e ezgode.

⁹ A akana dikka e Jesuse kai o Del cherda le cherricha mai minono neko e suechura samo cherricha vreme, kai si le e korona barimaki ta vou gazdaril pala o meripe kai nakkla. Ta o Del ande po volipe, mangla te llanel o Jesus so si o meripe pala o lachipe saurrengo:

¹⁰ Pala o Del si sa ezgode cherde ta sa ezgode si leke, soke o Del mangel sa leke chaurre te avel len iek ttan ande leko baripe. Goleke ande patnia saia te cherel e Jesuse chacho pala o lachipe saurrengo.

¹¹ Soke sa gola kai volin ta kanden e Devle si leke chave. Goleke o Chavo e Devleko ni lallal te ikkarel len pplal,

¹² kana ppenda ando Pisipe: “Ka dau orba chiri me pplalenge, ta ka llilabau chuke llilia Devlikane ando cher e Devleko.”

¹³ Ta i ppenel gia: “ka avel man vera ande lete.” Ta pale ppenel: “Kate sem e chaurrenchar kai o Del dia man.”

¹⁴ Gia, sar iek vicha si katar iek mas ta katar iek rat manuseko, isto gia o Jesus cherdilo mas ta rat manuseko, ta gia te sai dobil pe merimaia gole kai saia le e zor te sai mundarel, gava si o llavolo.

¹⁵ Ta pe merimaia mukliarda len katar o ppandipe sa golen kai pala e dar katar o meripe zivin sargo esluge sa po zivoto.

¹⁶ Soke chachimaia o Jesus ni avilo te pomozil e suechonen, vou avilo te pomozil e Abraameki vicha.

¹⁷ Ta te sai pomozil len saia te cherdol sargo von. Goleke soke cherdilo sargo amen, sai cherdilo o mai Baro Popo kai ande lete sai avel e manuse vera, soke si pperdo volipe te radil e Devleke, ta pala leko meripe cherda o Del te prostil amen katar amaro bilachipe.

¹⁸ Ta sar isto vou nakkla goia duk ta o llavolo zumavela le te sai cherel le te perel ando bilachipe, akana kana o llavolo zumavel amen, o Jesus sai pomozil saurren.