Ebreos 10 - Nuevo Testamento Romané 2007

O zakono sargo iek senka

¹ Soke o zakono e Moiseseko saia samo iek senka katar o lachipe kai saia te avel a na isto e ezgode kai saia te la. Goleke o zakono nasti cherel chache e llenen kai suako burs aven pasa o Del te den le isto gola kurbanura.

² A te avilaia istina kai o zakono sai jalavel len katar o bilachipe, von ni achardeape dosale ta muklea te den kurbanura.

³ A gala kurbanura samo blazil lenge te denpe golli katar po bilachipe suako burs.

⁴ Soke o rat katar e guruva ta katar e busne nasti ikanen o bilachipe.

O kurbano si o Kristo

⁵ Goleke o Kristo kana avilo pe gaia ppuv ppenda e Devleke: “Ni kame kurbanura ni so si dino, goleke dian man iek esnaga.

⁶ Soke chuke inai drago e kurbanura ni so si dino te lel o bilachipe.

⁷ Ondaka ppenden: ‘Kate sem, isto gia sar si pisime mandar ando Pisipe, te cherau so tu mange Devla.’ ”

⁸ Mai anglal ppenel kai o Del ni mangel ta inai leke drago e kurbanura ta niso katar so si dino katar e zivirinie, ni e kurbanura kai denpe te len o bilachipe, i kana si ezgode kai o zakono ppenel te den.

⁹ Ta mapalal ppenel: “Kate avau Devla te cherau so tu mange.” Vou si, kai ikanel e kurbanura purane ta ttovel pe lengo ttan iek nevo.

¹⁰ O Del esvirisarda amen soke o Jesukristo cherda so mangela o Del kana vou dia pi esnaga kurbano iek drom ta ostade.

¹¹ Suako popo cherel pi buchi suako llive ta sikavel suako llive isto gola kurbanura, i kana gola kurbanura nikada nasti len o bilachipe.

¹² A o Jesukristo sikada samo iek kurbano pala o bilachipe ostade, ta mapalal beslo pe chachi rig e Devleki.

¹³ Kote aduricharel lligo ni o Del ni ka ttovel leke dusmanonen telal tala leke porrne,

¹⁴ soke pala iek ezgoda kai dia cherda chache e llenen kai si esvirime e Devleke.

¹⁵ Ta o Santo Duo ppenel kai gaia orba si chachi kana ppenel:

¹⁶ “Pe alava kai ka achau lenchar kana ka nakken gola llivesa, ka aven gala, ppenel o Gazda: ka ttovau me zakonura ande lengo lio ta ka pisiulen ande lenge mislura.

¹⁷ Ta ni ka dau man ios golli katar lengo bilachipe.”

¹⁸ Goleke kana o bilachipe si prostime ni trubul te da ios kurbanura ni so si dino pala o bilachipe.

¹⁹ Ppalalen, goleke akana pala o rat e Kristoko sai da bi darako ando Ttan Santo.

²⁰ Soke kana o Jesus mulo putarda amenge o chiti ta sikada amenge o drom e zivotoko, a gua chiti si leki esnaga.

²¹ Si amen iek Baro Popo ttodo po cher e Devleko.

²² Goleke morabi te aven pasa o Del iekke chache liea ta iekke bare pachamaia, ta te aven jalade amare lie katar e mislura bilache ta te aven jalade i amare esnage iekke paiea kai si bristo.

²³ Ta morabi te ava zurale ta te pacha ande so adurichara, soke o Del ka cherel so ppenda kana dia po alau.

²⁴ Ta morabi te roda te pomozi iek avere te sai avel amen mai but volipe ta te chera o lachipe.

²⁵ Ta na muka te chidiniaiva, gia sar cheren nesave llene, mai sukar da amen zor iek avere; ta mai but kana dikka kai o llive e Devleko si mai pase.

²⁶ Soke te ttova amen te chera o bilachipe akana kai sikilam o chachipe, ondaka inai ios kurbano te delpe pala o bilachipe;

²⁷ Samo achel amen e dar katar e kris ta e bari iag kai ka zatril e Devleke dusmanonen.

²⁸ Kana vareko ni kandel o zakono e Moiseseko, ta te si dui o trin llene te ppukaven le, kote inai zalba ta gua lleno morabi te merel.

²⁹ ¿A ni acharen tumen kai mai bari duk morabi te len gola kai ttoven tala pe porrne e Devleke chave ta kai ni ttoven sama pe leko rat, ta gola kai kusen e Devleko Duo kai volil len? Gua rat kai si ande sovel kai jala o Del kai dia len o prostipe.

³⁰ Llana kai o Del ppenda: “Man si e buchi te chinau e kris; me ka pochinau.” Ta i ppenda: “O Gazda ka chinel e kris pe foroke.”

³¹ ¡Bari ezgoda si te pere ande va katar o Del o llundo!

³² Goleke den tumen golli katar o vreme o purano, kana tumen iakom lien o villelo ta terpisarden zoriaia e patnia katar iek maripe.

³³ Bute llenen tumendar tumare dusmanura kusle len ta i marde len angla e manusa, ta tumen nakklen duk pala so cherena lenchar.

³⁴ Ta i avila tumenge zao katar e llene kai sea ande rubie, ta veselimaia muklen te len tumendar tumare ezgode kai sea tumen, soke llanen kai ando miloso si tumen iek ezgoda but mai sukar ta kai ka achel ostade.

³⁵ Goleke na jasaren tumaro pachape, soke tumaro pachape ka anel tumenge iek baro chari.

³⁶ Morabi te avel tumen zor ande patnia, te sai cheren e volia e Devleki ta gia te sai len so vou ppenda kai ka del tumen kana dia po alau.

³⁷ Soke e Devleke alava ppenen gia: “Oma, but oma, ka avel ko si te avel. Ta ni ka aduricharel.

³⁸ O lleno kai si mange chacho pe suako ezgoda ta pachal ande mande ka zivil ostade; a te irilape palpale, ni ka avau veselo cheres lete.”

³⁹ A amen ni sam gole llenendar kai irinpe palpale ta llan kai po jasardipe, amen sam llene kai resa te la o braduipe soke pachaiam ando Del.