Ebreos 1 - Nuevo Testamento Romané 2007

O Del dia orba

¹ Cherel but burs palpale o Del dia orba but droma ta bute orbenchar amare puranenge katar e poraukura.

² Ta akana, ande llivesa kai si mai anglune so vou mangla te ppenel amenge ppendale leko Chavo, ta letar cherdile sa e ezgode kai si, ta cherdale te avel o Gazda pe sa e ezgode.

³ O Chavo sikavel amenge o baripe e Devleko, soke vou si isto sar si o Del ta si pe suako ezgoda, ta pe bare zoriaia cherel sa e ezgode te avel len zivoto; ta vou cherda te prostil amen o Del katar amaro bilachipe, ta mapalal llelo ando miloso ta beslo pe rig e chachi e Devleki, kote kai si leki charoina.

⁴ Ta vou cherdilo mai baro neko e suechura ta die le iek anau kai si mai baro neko lengo.

⁵ Soke nikada o Del ni ppenda iekke suechoke: “Tu san mo chaurro; Ta katar gava llive me sem cho dad.” Ta nikada ni ppenda iekke suechoke: “Me ka avau chuke sargo iek dad, ta vou ka avel mange sargo iek chaurro.”

⁶ Ta kana bichalda ande gaia ppuv pe Chaurre ppenda te cheren gia: “Sa me suechura te blagosin le.”

⁷ Ta i o Del kana del orba cheres e suechura ppenel: “Me suechura si e balau, ta me esluge si e esterliche.”

⁸ A kana del orba katar po Chaurro, ppenel: “Chi charoina Devla si ostade, ta si iek charoina chachimaki.

⁹ Volisardan o lachipe ta murzisardan po bilachipe; goleke esvirisarda tut o Del, chiro Del, ta pperda tut veselia: mai but neko e llenen kai san lenchar ande iek ttan.”

¹⁰ Ta i ppenel: “Tu Gazda, cherdan e ppuv mai anglal; isto tu cherdan o miloso.

¹¹ Sa gala ezgode ni ka aven ios, a tu ka ave ostade. Sa gala ezgode ka ppurion sargo e patave;

¹² ¡Ta ka bangare len sargo e patave, ta ka pparruve len sargo kana iek lleno ttovel aver patave pe pete! A tu san isto gua; a cho zivoto ni ka merel.”

¹³ O Del nikada ni ppenda ni iekke suechoke: “Bes pe mi chachi, lligo ni ka cherau che dusmanonen te aven telal katar che porrne.”

¹⁴ Soke sa e suechura si duura kai si esluge e Devleke: ta bichalel len te pomozin golen kai ka len o braduipe.