Apostole 8 - Nuevo Testamento Romané 2007

¹ O Saulo saia kote ta dikkela sar mundarena e Estebane ta ppenda kai saia sukar so cheren. Isto gua llive rodie but e llenen katar e kkanlliri kai si ando Jerusalem. Ta sa e llene kai pachana ando Jesus rispisaile ande Judea ta ande Samaria.

O Saulo rodel te mundarel e llenen katar e kkanlliri

² Nesave llene kai avila lenge zao prajosarde e Estebane ta rovde but pala le.

³ A o Saulo llala te rodel e llenen katar e kkanlliri, ta dela cher cherete ta ikanela terrindo llenen katar e chera e murusen ta e diskinien ta bichalela len ande rubie.

⁴ A e llene kai saia te llantar katar o Jerusalem ppenena e lachi viasta kai go llana.

⁵ O Felipe, iek lendar, llelo ando foro mai baro katar e Samaria ta dia orba e llenenge katar o Jesus.

⁶ E llene chidiniaona, ta sa asunena ta ttovena sama so ppenela o Felipe, soke dikkena e bare ezgode Devlikane kai cherela.

⁷ But llene kai sea ande lende duura bilache sastona, ta e duura likena lendar ta urkina; ta i but llene kai nasti ppirena ta i e bange sastona.

⁸ Sa gala ezgode cherde te avel but veselia ande gua foro.

⁹ A kote saia iek lleno kai ikkardola Simono, kai omanglal cherela chirimate ta kojadaia e llenen katar e Samaria ta ppenela kai vou si iek lleno but asundo.

¹⁰ Sa e llene, katar o minono llik kai o mai baro, ttovena leke but sama ta asunena le ta ppenena: “Gava si o lleno kai ppenen leke ‘e bari zor e Devleke.’ ”

¹¹ Ta ttovena leke sama soke kojadaia e llenen but vreme pe chirimatenchar.

¹² A kana o Felipe ppenda lenge e lachi viasta katar e charoina e Devleki ta katar o Jesukristo, e murus ta e diskinie kristisaile.

¹³ Ta isto o Simono pachaia ta kristisailo, ta llelo e Felipea, ta chudilape katar e bare ezgode Devlikane kai dikkela.

¹⁴ Kana e apostolura kai sea ando Jerusalem asunde kai e llene katar e Samaria pachaie ande alava e Devleke, bichalde incha e Pedro ta e Juane.

¹⁵ Kana avile, molisaile pala e llene kai pachan kai si katar e Samaria, te len o Santo Duo.

¹⁶ Soke ni ios ni aviloia o Santo Duo pe ni iek lendar; samo kristisailea ando anau e Gazdako o Jesus.

¹⁷ Ondaka o Pedro ta o Juan ttode pe va pe lende, ta gia lie o Santo Duo.

¹⁸ Kana o Simono dikkla kai o Santo Duo avela kana e apostolura ttovena pe va pe llene, ppenda kai ka del len love,

¹⁹ ta ppenda lenge: —Den i man goia zor, ta gia gola llene kai ka ttovau me va pe llene i von ka len o Santo Duo.

²⁰ Ondaka o Pedro ppenda leke: —¡Te ave proketo, tu ta i che love, soke manglan te chine e lovenchar so si dino llabe e Devletar!

²¹ Inai tutar gala ezgode, soke angla o Del cho lio inai chacho.

²² Muk o bilachipe kai chere, ta molisao e Devleke, te dikke dal ka prostil chuke so mangea te chere.

²³ Soke me dikkau kai san pperdo zalba ta o bilachipe istarda tut ppanglo.

²⁴ O Simono ppenda leke: —Molintumen e Devleke pala ma, te na nakkau gola ezgode kai ppenden mange.

²⁵ Kana llanatar katar e Samaria o Pedro ta o Juan ppende e llenenge sa so nakkle kana sea e Jesusea. Ta e apostolura ppende e lachi viasta ande but forichura kai si pasa e Samaria ta irisaile ando Jerusalem.

O Felipe ta o etiope

²⁶ Mapalal, iek suecho e Devleko ppenda e Felipeke: “Uste ta llatar ando sur, katar o drom kai llal katar o Jerusalem karing e Gasa.” Gava drom nakkel katar o pusto.

²⁷ O Felipe ustilo ta llelotar; ta e dromea maladilo iekke llenea kai saia katar e Etiopia. Le saia iek rado but glamno, vou saia o lleno kai llinel e love katar e diskinia kai gazdarila ando Etiopia, ta lleloia ando Jerusalem te blagosil e Devle.

²⁸ Kana irilape kai pi ppuv, ande po bordon chitila so pisisarda o porauko o Isaias.

²⁹ Ta o Duo ppenda e Felipeke: “Lla ta ttou tut pasa gua bordon.”

³⁰ Kana o Felipe avilo pase, asunda sar o etiope chitila so pisisarda o Isaias; ondaka puchla le: —¿Achare so chiti?

³¹ O etiope ppenda leke: —¿Sar ka acharau, kana inai ko te sikavel man? Ta mangla letar te likel ta te besel pasa le.

³² Ta gava saia o pisipe kai chitila: “Inllarde le sargo iekke bakre kai inllardol te mundaren le; Sargo iek bakro kai ni basel angla e llene kai chinen leke bal, ta gia ni putarda po mui.

³³ Ttode le ando lallao, ta ni chinde leke iek kris chachi; ¿Ko ka del orba katar leko porodo? Soke ikande leko zivoto katar e ppuv.”

³⁴ O etiope puchla e Felipe: —Ppen mange, ¿kaki orba del o porauko: del orba vou petar o katar aver lleno?

³⁵ Ondaka o Felipe, prema so chitila o etiope, ppenda leke e lachi viasta e Jesukristoki.

³⁶ Mapalal, kana nakkena pasa iek pai, o etiope ppenda: —Kate si pai, ¿si vareso te achavel man te na avau kristime?

³⁷ O Felipe ppenda; te pachaia sa che liea, sai. Vou ppenda: Me pachau kai o Jesukristo si e Devleko Chavo.

³⁸ Ondaka ppenda te achaven o bordon; ta e li dui fuliste ando pai, ta o Felipe kristisarda le.

³⁹ Kana likiste andar o pai, o Duo e Gazdako inllarda e Felipe, ta o etiope ni dikkla le ios; a llelo e dromea veselimaia.

⁴⁰ O Felipe avilo ando Asoto, ta llelo foro forote ta ppenela e lachi viasta, lligo ni avilo ande Sesarea.