Apostole 6 - Nuevo Testamento Romané 2007

Ttoven efta llenen te pomozin

¹ Ande gua vreme, sar e llene kai pachana ando Jesus cherdona mai but, e llene kai dena orba griego jolaile e llenenchar kai dena orba arameo, soke gola kai dena orba griego ppenena kai e llene kai pomozina suako llive bristenape katar lenge diskinie ppivle.

² E desudui apostolura chidie sa e llenen kai pachan ta ppende lenge: —Inai sukar amen te muka e orba e Devleki ta te ttova amen te fulava so si te pomozilpe maskar e llene.

³ Goleke, ppalalen, roden maskar tumende efta llenen te avel tumen vera ande lende, te aven bizai ta pperde katar o Santo Duo te da len gaia buchi.

⁴ A amen ka moli amen ta ka inllara e orba e Devleki.

⁵ Ta sa e llenenge avila drago gaia orba, ta esvirisarde e Estebane, iek lleno pperdo pachape ta Santo Duo, ta esvirisarde sove llenen ios; gala si lenge anava: o Felipe, o Prokoro, o Nikanor, o Timon, o Parmenas ta o Nikolas katar e Antiokia kai omanglal cherdiloa judio.

⁶ Mapalal inllarde len kote kai sea e apostolura, ta e apostolura molisaile ta ttode pe va pe lende.

⁷ E orba e Devleki sa mai bariola, ta sa mai but llene sea ando Jerusalem kai pachana. Ta i but popura judiura pachaie ando Jesus.

Ppanden e Estebane

⁸ O Esteban, pperdo katar o blagosipe ta e zor e Devleki, cherela bare ezgode Devlikane e llenenge katar o foro.

⁹ Nasave llene kai sea katar e kkanlliri e judionengi kai ikkardola Esluge kai Mukliarde len; ttodepe avere llenenchar katar o Sirene, katar e Alejandria, katar e Silisia ta katar e Asia, ttode te janpe e Estebanea;

¹⁰ a nasti dobina le, soke dela orba e bizaimaia kai dela le o Santo Duo.

¹¹ Ondaka pochinde nesave llenenge te ppenen kai asunde le kai ppenela alava bilache katar o Moises ta katar o Del.

¹² Ta gia divosarde e foro, e ppuren ta e kovachen katar o zakono; ta cheres gua jolaile e Estebanea ta ppangle le ta inllarde le kai e mai bari kris.

¹³ Ta i rodie llenen te kojaven, ta gola llene ppende gia: —Gava lleno sa o vreme del bilache orbe katar gava santo cher e Devleko ta i katar o zakono.

¹⁴ Ta asundam kai ppenela kai gua, o Jesus katar o Nazaret ka peravel o cher e Devleko ta kai ka pparruvel e zakonura kai mukla amenge o Moises.

¹⁵ E sudura ta sa e llene kai besena, kana dikkle e Estebane, dikkle kai leko mui saia sargo iekke suechoko.