Apostole 4 - Nuevo Testamento Romané 2007

O Pedro ta o Juan den orba e sudonenchar

¹ Kana o Pedro ta o Juan dena orba e llenenge, avile e popura ta lenchar o gazda katar e boñikura kai arakken o cher e Devleko ta i e saduseura.

² Von jolaile soke o Pedro ta o Juan sikavena e llenen ta ppenena kai e llene sai usten katar o meripe soke o Jesus cherdale ta kai goleke saia o chachipe.

³ Ondaka gola llene ppangle len ta sar nakklea but saiata ttode len ande rubie llik o goia ttiarin.

⁴ A but llene kai asundea e orba, pachaie; ta samo e murus kai pachaie, sea preko panch milie.

⁵ Ttiarinako chidinaile ando Jerusalem e gazda e judionenge, e ppure ta e kovacha e zakonoke.

⁶ Kote saia i o mai baro popo o Anas, o Kaifas, o Juan, o Alejandro ta sa e llene kai si katar e vicha e mai bare poponengi.

⁷ Ta ppende te anen lenge e Pedro ta e Juane, ta ttode len po maskaral lendar ta puchle len: —¿Save gazdarimaia, o ande kako anau cherden gala ezgode?

⁸ O Pedro pperdo katar o Santo Duo, ppenda lenge: —Gazda e foroke ta tumen e ppure katar o Israel:

⁹ tumen puchen amen katar o lachipe kai cherdam iekke nasualeke te llanen sar sastilo.

¹⁰ Angla tumende ppena ta angla sa o foro katar o Israel kai gava lleno kai si kate, sastilo ando anau e Jesukristoko katar o Nazaret, isto gole kai tumen krustosarden ta kai o Del cherda le te ustel katar o meripe.

¹¹ Gava Jesus si o barr kai tumen, e llene kai cheren chera, ni ttoden leke sama; ta akana cherdilo o barr mai preche te vazden e zidura.

¹² Ande nisavo aver inai braduipe, soke ande sa o sueto o Del dia amen samo iekke llene kai pala le sai ava braduime.

¹³ Kana e llene katar e kris e mai bari e judionengi dikkle kai o Pedro ta o Juan dena orba tromanimaia, chudisaile lendar soke llanena kai ni sea but llangle ta acharde kai sea disipulura e Jesuseke.

¹⁴ Ta nasti dosarena len katar niso soke kote pe porrne pasa lende saia o lleno kai sastiloia.

¹⁵ Ondaka e llene katar e bari kris ppende te ikanen le katar goia soba ta dena pe orba maskar pete,

¹⁶ ta ppenena: —¿So ka chera gale llenenchar? nasti ppena kai kojaven soke sa e llene ando Jerusalem dikkle gaia bari ezgoda Devlikani kai cherde.

¹⁷ Goleke na muka te llanenle ios llene. Morabi te darava len, ta gia ni ka den orba nikake katar e zor e Jesuseki.

¹⁸ Ondaka ikkarde len ta ppende lenge te na den ios orba ni te sikaven niso katar e zor e Jesuseki.

¹⁹ A o Pedro ta o Juan ppende lenge: —Ppenen amenge isto tumen dal si orta angla o Del te kanda mai anglal tumen neko e Devle.

²⁰ Amen nasti acha te ppena so dikklam ta so asundam.

²¹ E llene katar e bari kris darade len ta mukliarde len ta ni malade te sai maren len, soke sa e llene blagosina Devle pala e ezgode kai nakklea.

²² Ta i soke o lleno kai avilape lea goia bari ezgoda Devlikani sastimaki, saia leke mai but katar e saranda burs.

E llene kai pachan mangen vera ta zor

²³ Kana mukliarde e Pedro ta e Juane, llele te chidiniaon ogole apostolenchar ta ppende lenge sa so ppende e mai bare popura ta ppure.

²⁴ Ta kana e apostolura asunde len, saurre molisaile ande iek ttan ta ppende: “Gazda, tu kai cherdan o miloso, e ppuv, e mora ta sa so si ande lende,

²⁵ ta kai dian orba katar o Santo Duo ta katar o mui amare puraneko o David, cho esluga, kana ppenda: ‘¿Soke si burkania ande forura? ¿Soke mislinpe te cheren ezgode napoda?

²⁶ Chidinaile e charura ta e kraliura e suetoke cherdile sargo iek te marenpe e Gazdaia ta i e llenea kai esvirisardam: o Mesias.’

²⁷ “Chachipe si kai o Erodes ta o Ponsio Pilato chidinaile kate, ande gava foro e llenenchar kai inai judiura ta e foroia te aven dusmanura e Jesuseke, o santo esluga, kai esvirisardan te avel o Mesias.

²⁸ Gia von cherde sa so tu chinadana mai anglal te avelpe.

²⁹ Akana Gazda, dik sar daraven amen, ta cher che eslugen te ppenen chi orba bi darako.

³⁰ Sikau chi zor ta sastar e nasualen ta cher bare ezgode Devlikane ando anau katar cho santo esluga, o Jesus.”

³¹ Kana molisaile, o ttan kote kai sea chidine dermosailo ta sa achile pperde katar o Santo Duo, ta ppenena e porouka e Devleki bi darako.

Sa e ezgode sea saurrenge

³² But llene sea gola kai pachana ando Jesus ta saurre saia len iek mislo ta iek lio. Ta niko ni ppenela kai leke ezgode sea samo leke, von ppenena kai so saia len saia saurrengo.

³³ Ta e apostolura dena orba bare zoraia katar o Gazda o Jesus ta sar ustilo katar o meripe, ta o Del but blagosila saurren.

³⁴ Ta maskar lende ni saia ni iek lleno kai trubulale vareso, soke e llenen kai sea len umalia o chera, bichinena len, ta e love

³⁵ dena len kai e apostolura te fulavenlen maskar sa prema so trubula suakone llene.

³⁶ Iek levita kai ikkardola Jose, kai saia katar o Chipre kai e apostolura ttodea leko anau Bernabe, (kai gua si: “O chavo kai pomozil”)

³⁷ Gava lleno saia le iek umal, bichindala ta dia e love kai e apostolura.