Apostole 3 - Nuevo Testamento Romané 2007

O Pedro sastarel iekke bange

¹ Iek llive, o Pedro ta o Juan llele kai o cher e Devleko kana molinpe ande trin e lliveseke.

² Kote, ando cher e Devleko, saia iek lleno kai saia bango sar kana biandilo ta inllarena le pasa o udar kai ikkardol o Sukar te mangel esmola katar e llene kai nakkena andre ando cher e Devleko.

³ Kana o bango dikkla e Pedro ta e Juane kai lena te nakken ando cher e Devleko, mangla lendar esmola.

⁴ Von achile ta dikkle pe lete, ta o Pedro ppenda leke: —Dik pe amende.

⁵ Gua lleno ttoda sama, soke mislila kai ka den le vareso.

⁶ A o Pedro ppenda leke: —Inai man ni rup ni sunakai, a so si man dau tut: Ando anau e Jesukristoko katar o Nazaret, uste ta ppir.

⁷ Kana ppenda gola alava, o Pedro istarda le katar o va o chacho ta vazdia le, ondaka kote leke porrne istarde zor.

⁸ Ta o bango jutlo ta ttodape pe porrne ta ppirda; mapalal dia lenchar ando cher e Devleko ppirindo ta jutela ta blagosila e Devle.

⁹ Sa gola kai dikkle sar ppirela ta sar blagosila e Devle

¹⁰ chudisaile but ta daraile katar so avilape letar, soke pinllarena gole llene ta llanena kai isto vou saia gua kai besela te mangel esmola ando cher e Devleko po udar kai ikkardol o Sukar.

O Pedro del orba po udar kai ikkardol o Salomon

¹¹ O bango kai sastilo ni mukela e Pedro ta e Juane, ta sa e llene llele prastindo pe iek rig ando cher e Devleko kai ikkardol o udar katar o Salomon, kote kai sea von.

¹² Kana o Pedro dikkla len, ppenda lenge: “Israelitura ¿soke chudin tumen, ta soke dikken pe amende gia sargo kana isto amen cherdam gale llene te ppirel amare zoriaia o cheres o zao kai avila amenge letar?

¹³ O Del katar o Abraam katar o Isaak ta katar o Jakob, o Del amare puranengo dia len o mai baro baripe pe esluga e Jesuse, gole kai tumen dien le kai e sudura ta gole kai tumen ni kamlen, kana o Pilato mangela te mukliarel le.

¹⁴ Kana tumen saia te mangen te mukliaren gole llene kai si santo ta chacho, tumen manglen te mukliaren tumenge iekke llene kai mundarel.

¹⁵ Ta gia tumen mundarden gole llene kai inllarel amen kai o zivoto. A o Del cherda le te ustel katar o meripe, ta amen dikklam le.

¹⁶ So dia zor gale llene kai tumen dikken ta pinllaren, si o pachape ando Jesus. Ta gua pachape ando Jesus cherda te sastol katar po nasualipe, gia sar dikken sa tumen.

¹⁷ “Ppalalen, llanau kai ni tumen ta ni tumare llene kai gazdarin ni llangle so cherena kana mukle te mundaren e Jesuse.

¹⁸ A o Del mangla te cherdol gia te sai cherdol so ppendaia omanglal katar o mui sa pe poraukonengo kai leko Mesias saia te merel.

¹⁹ Goleke, irin tumen kai o Del ta muken tumaro bilachipe, te sai vou kosel tumaro bilachipe

²⁰ ta o Gazda te bichalel e Jesuse, kai si o Mesias kai saia chinado tumenge mai anglal.

²¹ A akana si mai preche te achel o Jesus ando miloso llik kana o Del ka ttovel suako ezgoda po ttan gia sar ppendale katar pe sante porauke kai zivisarde dumut palpale.

²² O Moises ppendale amare puranenge: ‘O Gazda tumaro Del ka cherel te likel maskar tumende iek porauko sargo me, kanden le pe sa so ka ppenel tumenge,

²³ soke varesavo lleno te na kandela gole porauko, ni ka avel ios katar amaro foro.’

²⁴ “Ta sa e poraukura, katar o Samuel llik angle, die orba katar gala llivesa.

²⁵ Tumen ka len so ppenda o Del katar e poraukura ta katar po alau kai dia amare puranenge kana ppenda e Abraameke: ‘Sa e viche e ppuvienge ka aven blagosime katar chi vicha.’

²⁶ Kana o Del cherda pe Chave te ustel katar o meripe, mai anglal bichalda le tumende te blagosil tumen ta te cherel suako lleno tumendar te mukel po bilachipe.”