Apostole 23 - Nuevo Testamento Romané 2007

¹ O Pablo dikkla pe lengi kris ta ppenda lenge: —Pplalalen, llik kate inai man nisavi dos ande me mislura angla o Del.

² Ondaka o Ananias, kai saia o mai baro popo, ppenda e llenenge kai sea pasa o Pablo te chalaven le ande leko mui.

³ A o Pablo ppenda leke: —¡O Del ka chalavel tut, kojamnea! Te besea tu kote te chine mange kris prema o zakono, ¿Soke tu ppage o zakono ta bichale te chalaven man?

⁴ E llene kai sea kote ppende leke: —¿Gia kuse e mai bare popo e Devleko?

⁵ O Pablo ppenda lenge: —Pplalalen, me ni llanava kai vou si o mai baro popo; soke ando Pisipe ppenel: ‘Na kus gole kai gazdaril che foro.’

⁶ Mapalal, acharda kai nesave llene katar e kris sea katar e saduseura ta aver sea katar e fariseura, o Pablo dia orba zurale ta ppenda: —Pplalalen, me sem fariseo, ande mi vicha si fariseura; ta chinen mange kris soke pachau kai e mule ka usten katar o meripe.

⁷ Samo ppenda gua o Pablo, e fariseura ta e saduseura die orba maskar pete, ta fuladili e kris.

⁸ Soke e saduseura ppenen kai e mule ni usten katar o meripe, ta kai inai suechura ni duura; a e fariseura pachan ande sa gola ezgode.

⁹ Sa urkisarde; ta nesave kovacha e zakonoke kai sea katar e fariseura, ustile ta ppende: —Gava lleno ni cherda nisavo bilachipe; sai avelpe ka dia lea orba iek duo o iek suecho.

¹⁰ Sar e burkania cherdola ios mai bari, o gazda e boñikonengo darailo soke sai mundarena le, ta bichalda nesave boñikonen te ikanen le kotar ta te inllaren le pale ando cher e boñikonengo.

¹¹ Nakkla iek llive, ta kana peli e riat o Gazda avilo kai o Pablo ta ppenda leke: “Le chuke zor, soke gia sar dian e orba chachi mandar kate ando Jerusalem, isto gia ka cherele ande Roma.”

Denpe orba sar kamundaren e Pablo

¹² Ttiarinako nesave judiura diepe orba te mundaren e Pablo, ta jale sovel te achen prokete e Devletar kai ni ka jan ni ka pien lligo ni ka mundaren le.

¹³ Von sea mai but katar e saranda llene kai jale e sovel.

¹⁴ Llele kai e gazda e poponenge ta kai e ppure e judionenge, ta ppende lenge: —Amen jalam sovel te acha prokete e Devletar kai ni ka ja lligo ni ka mundara e Pablo.

¹⁵ Tumen ta ogala llene katar e bari kris mangen katar o gazda e boñikonengo te anel le tumende ttiara, ta ppenen leke kai mangen te dikken mai prezomaia laki dos; ta amen ka adurichara te mundara le mai anglal te anen le tumende.

¹⁶ A iek sinoucho e Pabloko llangla so mangena te mundaren le, ta llelo kai o cher e boñikonengo te ppenel leke.

¹⁷ O Pablo ikkarda iekke katar e kapitanura, ta ppenda leke: —Inllar gale terne kai o gazda e boñikonengo, soke si te del leke iek orba.

¹⁸ O kapitan inllarda le kai o gazda e boñikonengo, ta ppenda leke: —O ppanglo o Pablo mangla mandar te anau kate gale terne, kai si te ppenel chuke vareso.

¹⁹ O gazda e boñikonengo istarda e terne e vastetar, inllarda le pe iek rig ta puchla le: —¿So mange te ppene mange?

²⁰ O terno ppenda leke: —E judiura diepe orba te mangen tutar te inllare e Pablo ttiara kai e llene katar e bari kris, te prezon mai but ande leki dos.

²¹ Te na pacha len, soke mai but katar e saranda llene ka aduricharen le gurudine, ta jale sovel te aven prokete e Devletar kai ni ka jan ni ka pien lligo ni ka mundaren e Pablo; ta akana von aduricharen so ka ppene lenge.

²² Ondaka o gazda e boñikonengo ppenda e terneke te llaltar, ta ppenda leke te na llanel niko goia orba kai dia leke.

Bichalen e Pablo kai o Feliks

²³ O gazda e boñikonengo ikkarda pe duie kapitanonen, ta ppenda lenge te getosaren dui stotine boñikonen te llan peske, ta eftavardesen te llan pe gra ta dui stotine llene te inllare lanse, te llan ande Sesarea ande inia e riateke.

²⁴ Ta i ppenda te lacharen grasten te llal pe lende o Pablo, ta i ppenda te inllaren le bi nusdako kai o sudo o Feliks.

²⁵ Ta bichalda lenchar iek lil kai ppenela gia:

²⁶ “O Klaudio Lisias pisil e glamnoke o gazda e boñikonengo o Feliks: Te ave sasto ta bajtalo.

²⁷ E judiura ppanglea gale llene ta mangena te mundaren le, a kana me llanglem kai saia iek lleno romano, llelem me boñikonenchar ta mukliardem le.

²⁸ Sar mangava te llanau soke dosarena le, inllardem le kai e kris e judionengi,

²⁹ ta llanglem kai dosarena le cheres lengo zakono; a inai saia soke te mundardol, ni te ttoven le ande rubie.

³⁰ A sar llanglem kai e judiura mangena te mundaren le, bichalau le tute; ta manglem katar e llene kai dosaren le te den orba angla tu so si te ppenen leke.”

³¹ E boñikura cherde so ppende lenge te cheren; istarde e Pablo ta inllarde le orachaia ande Antipatris.

³² Ttiarinako, e boñikura kai llana peske irisaile kai o cher e boñikonengo a e boñikura kai llana pe gra llele e Pabloia.

³³ Kana avile ande Sesarea, die o lil kai o sudo ta mukle lete i e Pablo.

³⁴ Kana chitisarda o lil, o sudo puchla katar saia vou; ta kana llangla kai saia katar e Silisia,

³⁵ ppenda leke: —Ka asunau tut kana ka aven gola kai dosaren tut. Mapalal ppenda te inllaren le ando cher e Erodeseko ta te prezon le.