Apostole 21 - Nuevo Testamento Romané 2007

O Pablo llal ando Jerusalem

¹ Kana muklam e pplalen likistam ande llimia ta llelam karing o Kos, ttiarinako llelam ando Rodas, ta kotar llelam ande Patra.

² Ande Patra maladam iek llimia kai llala ande Fenisia, ta likistam andre te lla i amen incha.

³ Kana llaia ande llimia, dikklam e ppuv katar o Chipre, nakklamle po estingo ta llelam llik ande ppuv katar e Siria. Diam ando Tiro soke saia te fuliaren nesave ezgode katar e llimia.

⁴ Kote maladam e llenen kai pachana ando Jesus ta achilam lenchar efta llive. O Santo Duo cherda te den orba e Pabloia ta te ppenen leke te na llal ando Jerusalem.

⁵ A kana nakkle e efta llive, llelam sa e llene avri katar o foro, ta inllarde pe romien ta pe minonen, kote pasa e mora diam changa ta molisalam.

⁶ Mapalal diam lenchar orba ta likistam ande llimia, ta von irisaile kai pe chera.

⁷ Llelam katar o Tiro ando Tolomaida, kote diam orba e pplalenchar ta achilam lenchar iek llive.

⁸ Ttiarinako llelamtar kotar ta avilam ande Sesarea ta llelam kai o cher e Felipeko, gua kai ppenela e llenenge e lachi viasta, vou saia iek katar e efta llene kai pomozina e apostolen, ta achilam lea.

⁹ E Felipe sea trin chea zinimake, von sea poraukura.

¹⁰ Ta cherela nesave llivesa kai amen sama kote, ta avilo iek porauko katar e Judea kai ikkardola Agabo.

¹¹ Kana avilo amende, lia o kavisi e Pabloko, ppangla pe va ta pe porrne lea, ta ppenda: —O Santo Duo ppenel kai ando Jerusalem e judiura ka ppanden gia e llene kai si gazda gale kaviseko, ta ka den le kai e llene kai inai judiura.

¹² Kana asundam gua, amen ta e llene katar e Sesarea manglam katar o Pablo te na llal ando Jerusalem.

¹³ A o Pablo ppenda: —¿Soke roven ta cheren te tristou man? Me sem tromano te ppanden man ta i te mundaren man ando Jerusalem cheres o Gazda o Jesus.

¹⁴ Ta sar nasti cherdam te kandel amen, muklam le, ta ppendam leke: —Te cherdol e Gazdaki volia.

¹⁵ Mapalal lachardam amare ezgode ta llelamtar ando Jerusalem.

¹⁶ Llele amenchar nesave llene katar e Sesarea kai sea katar e kkanlliri, ta inllarde amen kai o cher iekke lleneko kai ikkardola Mnason kai saia katar o Chipre, cherela but vreme kai i vou pachala ando Jesus ta mukla amen te sova ande leko cher.

O Pablo llal kai o Jakobo

¹⁷ Kana avilam ando Jerusalem, e pplal avile amenchar pachivale ta veselisaile but.

¹⁸ Ttiarinako, o Pablo llelo amenchar kai o Jakobo, ta kote sea sa e ppure.

¹⁹ O Pablo dia lenchar orba, ta mapalal ppenda lenge sa so cherda o Del lea maskar e llene kai inai sea judiura.

²⁰ Kana asunde le, blagosisarde e Devle. Ta von ppende e Pabloke: —Pplala, dikke kai maskar e judiura si but llene kai pachaie ando Jesus, ta sa von ppenen kai morabi te kanda o zakono e Moiseseko.

²¹ Ta ppende lenge kai tu ppene sa e judionenge kai zivin ande aver ppuvia te na pachan ando zakono e Moiseseko, ta kai ppene lenge kai morabi te na sirkunsidin pe minonen ta te na cheren prema so sam sikade.

²² ¿So ka chera? E llene ka llanen kai avilan.

²³ Morabi te chere so ka ppena chuke: Kate maskar amende si star llene kai jale sovel e Devleke ta si te cheren so ppende.

²⁴ Inllar len tuia, chistosao lenchar prema sar ppenel o zakono ta de tu e love te llan te chinen pe bal. Ta gia sa ka dikken kai inai chachipe so ppende lenge tutar, ta ka dikken kai i tu kande so ppenel o zakono.

²⁵ A e llenenge kai inai judiura ta pachan ando Jesus, amen bichaldam lenge iek lil ta ppendam lenge pe savi orba achilam: Te na jan o mas katar o kurbano avere delenge, te na jan o rat, ta ni o mas katar e zivirinie kai mundardon tasade, ta te na cheren kurvaluko.

Ppanden e Pablo

²⁶ Ondaka o Pablo inllarda e stare llenen, ta ttiarinako chistosailo lenchar prema sar ppenel o zakono; mapalal dia ando cher e Devleko te ppenel kana ka nakken e llive katar lenge sovel, gua saia o llive kai suako iek lendar ka del so si dino e Devleke.

²⁷ Kana sea pase te nakken e efta llive, nesave judiura kai sea katar e Asia avile kai o Pablo ando cher e Devleko ta divosarde e llenen. Sa e llene vazdinaile po Pablo,

²⁸ ta urkina: “¡Israelitura, aven te pomozin amen! Gava si o lleno kai llal pe suako rig ta sikavel e llenen ezgode kai ni llan prema amaro foro, ni prema o zakono e Moiseseko ni prema gava cher e Devleko, ta i akana anda andre iekke llenen kai si griegura, ta inai le liubao ni ande gava santo Ttan.”

²⁹ Von ppenena gua soke omanglal dikklea e Pablo ando foro e Trofimoa kai saia katar o Efeso, ta mislina kai o Pablo inllardaia le ando cher e Devleko.

³⁰ Sa o foro divosailo, ta e llene avile prastindo. Istarde e Pablo ta ppangle le avri katar o cher e Devleko, ta ondaka kote ppangle e udara.

³¹ Lena te mundaren le, kana o gazda katar e boñikura romanura llangla kai divosailoa sa o Jerusalem.

³² O gazda e boñikonengo chidia sa pe boñikonen, ta llelo prastindo kote kai sea e llene. Kana e llene dikkle len, mukle te maren e Pablo.

³³ Ondaka o gazda e boñikonengo avilo pase, ppangla e Pablo ta ppenda te ppanden le duie lanchonenchar. Mapalal puchla ko saia ta so cherdaia.

³⁴ A nesave llene urkina iek ezgoda a aver urkina aver ezgoda, ta o gazda e boñikonengo ni acharela niso, soke saia but burkania; ta bichalda te inllaren le kai o cher e boñikonengo.

³⁵ Kana avile pase, e boñikura saia te inllaren le ande va, soke e llene sea but silne;

³⁶ soke sa e llene avena pala lende, ta urkina: “¡Te merel!”

O Pablo del orba e foroke

³⁷ Kana lena te ttoven le ande rubie, o Pablo puchla e gazda e boñikonengo: —¿Sai dau tuia orba? O gazda e boñikonengo ppenda leke: —¿Llane te de orba ande chib e griegonengi?

³⁸ Te si gia, ¿Tu inai san o ejipsio kai cherel nesavo vreme palpale cherda te marenpe e romanonenchar ta llelotar ando pusto star milie llenenchar kai sea sikade te marenpe?

³⁹ O Pablo ppenda leke: —Me sem judio katar o Tarso katar e Sisilia, ziviu ande iek foro asundo; cher mange o sebapi te dau orba e llenenchar.

⁴⁰ O gazda e boñikonengo ppenda leke ako, ta o Pablo ustilo pe porrne ta upral kai si o cher e boñikonengo ta e vastea ppenda e llenenge te achen. Kana e llene achile, ppenda lenge ande chib kai den orba e ebreura: