Apostole 18 - Nuevo Testamento Romané 2007

O Pablo ando Korinto

¹ O Pablo llelotar katar e Atenas ta llelo ando Korinto.

² Kote maladilo iekke judioia kai ikkardola Akila kai saia katar o Ponto. Ni cherela but kai o Akila ta leki romi e Prisila avilea katar e Italia, soke o charo o Klaudio ppenda te llantar sa e judiura katar o foro Roma. O Pablo llelo lende

³ ta sar vou cherela chare sargo von achilo lenchar te radin zanio.

⁴ Ta suako sabado o Pablo llala ande kkanlliri e judionengi, ta dela orba lenge ta i e llenenge kai ni sea judiura te cherel len te pachan ando Jesus.

⁵ Kana o Silas ta o Timoteo avile katar e Masedonia, o Pablo sikavela e judionen e lachi viasta kai o Jesus saia o Mesias.

⁶ A e judiura cherdile leke dusmanura ta ttode te kusen le; ondaka o Pablo chinosarda pe patave te sai dikken kai leke ni saia drago so cherde, ta ppenda lenge: —Isto pe tumende ka avel e dos kai ka jasaon; me ni sem dosalo. Katar angle me ka llau kai e llene kai inai judiura te dau lenge orba.

⁷ Likisto katar e kkanlliri e judionengi ta llelo kai o cher iekke lleneko kai ikkardola Tisio Chacho, kai blagosila e Devle ta kai zivila pasa e kkanlliri e judionengi.

⁸ Ta o Krispo, o gazda katar e kkanlliri e judionengi, pachaia sa pe familiaia ando Gazda. Ta but llene katar o Korinto, kana asunde e Pablo, kristisaile.

⁹ Iek riat, o Gazda sikadilo e Pabloke sargo ande iek suno ta ppenda leke: “Na dara; ppen e orba ta na achi.

¹⁰ Soke me sem tuia ta niko ni ka ttovel po va pe tute te cherel chuke niso bilacho, soke ande gava foro si man but llene kai pachan.”

¹¹ Ta o Pablo achilo ando Korinto burs ta dopas, ta sikavela maskar lende e orba e Devleki.

¹² A ande llivesa kana o Galion gazdarila ande o Akaia, e judiura chidinaile te maren e Pablo; ta inllarde le kote kai chinen krisa

¹³ ta ppende e lleneke kai gazdarila pe foro: Gava lleno cherel e llenen te blagosin e Devle na sar ppenel o zakono.

¹⁴ Ta kana o Pablo mangela te del orba, o Galion ppenda gia e judionenge: —Te avilaia iek bilachipe but baro, kote me asundema tumen e judionen;

¹⁵ a sar gava si samo katar e orbe ta katar e anava ta katar tumaro zakono, lacharen tumari buchi isto tumen, soke me ande gala ezgode ni kamam te avau tumaro krisari.

¹⁶ Ta tradia len katar o cher kote kai chinen e krisa.

¹⁷ Ondaka sa istarde e Sostenese, o gazda katar e kkanlliri e judionenge ta marde le isto kote, angla o cher kote kai chinen e krisa. A e Galioneke ni chitilape niso so cherena.

O Pablo irilpe ande Antiokia

¹⁸ O Pablo achilo but llivesa ios ando Korinto. Mapalal dia orba e pplalenchar katar e kkanlliri soke saia te llaltar ta llelotar ande iek llimia karing e Siria, a e Prisila ta o Akila llele lea. Ando Sekreas, kana llana te liken ande llimia, o Pablo jaliarda po soro, soke jalaia sovel e Devleke te cherel le.

¹⁹ Kana avile ando Efeso, o Pablo mukla e Prisila ta e Akilase ta llelotar ande kkanlliri e judionenge, ta dia orba e judionenchar kai chidiniaona kote.

²⁰ Von mangle letar te achel ios mai but vreme lenchar, a vou ni kamla,

²¹ Ta dia lenchar orba mai anglal te llaltar, ta ppenda: “Te kamela o Del, ka avau pale tumende.” Mapalal o Pablo likisto ande llimia ta llelotar katar o Efeso.

²² Kana avilo ande Sesarea, llelo ando Jerusalem te del orba e llenenchar katar e kkanlliri, ta mapalal llelo karing e Antiokia.

O Pablo ppirel e Galasia ta e Frijia te inllarel e lachi viasta

²³ O Pablo achilo nesave llivesa ande Antiokia, ta mapalal ppirda iek po iek e ttana kai si ande Galasia ta ande Frijia ta dela zor sa e llenen kai pachana ando Jesus.

O Apolo del orba ande Efeso

²⁴ Ande gola llivesa avilo ando Efeso iek lleno kai ikkardola Apolo, kai saia katar e Alejandria. Vou llanela te del orba but sukar e llenenchar ta pinllarela but katar o Pisipe.

²⁵ Vou sikiloia katar o drom e Gazdako, ta saia but vreno te sikavel ta sikavela bristomaia katar o Jesus, makar pinllarela samo o kristope e Juaneko.

²⁶ O Apolo dia orba bi darako ande kkanlliri e judionenge; a kana asunde le e Prisila ta o Akila, ikkarde le po chorial ta sikade le mai sukar katar o drom e Devleko.

²⁷ Kana o Apolo mangla te llal ande Akaia, e pplal die le zor, ta pisisarde iek lil e llenenge kai zivina ande goia ppuv ta kai pachana ando Jesus, te aven lea pachivale. Kana avilo ande Akaia, pomozisarda but e llenen kai pala e zalba e Devleki, pachaiea,

²⁸ ta angla sa e llene ppenela e judionenge kai sea ando kojaipe alavenchar kai von nasti ppenena kai inai chache, ta prema o Pisipe sikavela lenge kai o Jesus saia o Mesias.