Apostole 16 - Nuevo Testamento Romané 2007

O Timoteo llal e Pabloia ta e Silasea

¹ O Pablo avilo ando Derbe ta ande Listra, ta kote malada iekke llene kai pachala kai ikkardola Timoteo, leki dei saia iek judia kai pachala ando Jesus, ta lako dad saia griego.

² E pplal kai sea katar e Listra ta katar o Ikonio dena lache orbe letar.

³ O Pablo mangla te llal lea o Timoteo, a mai anglal cherda te sirkunsidin le te na perel ppare e llenenge kai zivina ande gola forura, soke sa llanena kai e Timoteoko dad saia griego.

⁴ Ande sa e forura kai nakkena, ppende e pplalenge pe savi orba achilea e apostolura ta e ppure katar e kkanlliri kai si ando Jerusalem.

⁵ Ta e kkanllira lena zor ando pachape, ta suako llive cherdona mai but llene kai pachana ando Jesus.

O Pablo dikkel sargo iek suno

⁶ Sar o Santo Duo ni mukla len te inllaren e orba e Devleki ande Asia, nakkle katar e Frijia ta katar e Galasia,

⁷ ta avile kote kai delpe ande ppuv katar e Misia. Kotar mangena te den ande Bitinia, a o Duo e Jesuseko ni mukla len.

⁸ Nakkle ta ni achile ande Misia, ta fuliste ando Troade.

⁹ Kana peli e riat o Pablo dikkla sargo iek suno; dikkla iekke llene katar e Masedonia, gua lleno saia pe porrne ta molilape leke ta ppenela: “Lla ande Masedonia ta pomozisar amen.”

¹⁰ Kana o Pablo dikkla gua, lachardam sa te llatar ande Masedonia, ta saia amen o pachape kai o Del ikkarda amen te ppena kote e lachi viasta.

O Pablo ando Filipos

¹¹ Ando Troade likistam ande iek llimia, ta llelam orta karing e Samotrasia, kai si iek isla. Ttiarinako avilam ando Neapolis.

¹² Kotar llelam ando Filipos. Kote si samo romanura ta gua si iek foro but asundo katar goia rig katar e Masedonia. Kote achilam nesave llivesa.

¹³ O llive sabado likistam avri katar o foro, pasa o pai, kote mislia kai chidiniaona e judiura te molinpe. Beslam ta diam orba katar e lachi viasta e diskinienge kai chidinailea kote.

¹⁴ Iek lendar ikkardola Lidia; voi saia katar e Tiatira ta bichinela chituria but lache vunete sargo kaline. Gaia diskinia kai blagosila e Devle ta kai asunela e orba, o Gazda cherda te ttovel sama pe so ppenela o Pablo.

¹⁵ Ta kristisaili voi ta sa laki familia, ta mapalal ppenda amenge: —Te acharena kai chachimaia pachau ando Gazda, aven kai mo cher. Ta cherda te rachara late pe zor.

¹⁶ Iek drom, kana llaia kai o ttan e molimako, maladam iekke chea kai saia ande late iek duo kai cherela la te apogodil. Voi saia iek esluga kai apogodila ta ppenela e llenenge so ka avelpe mai angle. Ta lake gazde lena but love pe late.

¹⁷ Gaia chei lleli pala o Pablo ta pala amende, ta urkila: —¡Gala llene radin e Devleke katar o miloso, ta ppenen tumenge o drom e braduimako!

¹⁸ Goia chei lleli pala lende but llivesa, iek llive o Pablo jolailo ta irisailo ta ppenda e duoke kai saia ande goia chei: —Ando anau e Jesukristoko, like latar. Ondaka o duo mukla la.

¹⁹ A kana e gazde e cheake dikkle kai nasti ka len ios love pe late, istarde e Pablo ta e Silase ta inllarde len kai e sudura, kai si po maskaral e foroko.

²⁰ Inllarde len kai e krisaria, ta ppende: —Gala judiura cheren iek burkania ande amaro foro,

²¹ ta sikaven e llenen te cheren ezgode kai amen ni muka te cheren ta ni amen nasti chera, soke sam romanura.

²² Ondaka e llene jolaile pe lende, ta e krisaria ppende te nangaren len ta te maren len e kastenchar.

²³ Marde len but e kastenchar, ta mapalal ttode len ande rubie, ta ppende e lleneke kai arakkela e rubie te arakkel len zurale.

²⁴ Ta ttoda len mai andre ande rubie ta ppangle lenge porrne pe iek kotora kastune bare ta ppare.

²⁵ A kana saia ande desudui e riateke, ta o Pablo ta o Silas molinape ta llilabena e Devleke, ta ogola ppangle asunena,

²⁶ ondaka dermosali e ppuv gia zurale kai miskosarda e barra kai sea telal katar e rubie. Ondaka kote sa e udara putaile ta sa e ppanglenge lanchura putaile.

²⁷ Kana llungadilo o lleno kai arakkela e rubie ta dikkla kai e udara sea putarde, ikanda po jarni te mundarelpe soke mislila kai sa e ppangle naslea.

²⁸ A o Pablo urkisarda pe lete ta ppenda leke: ¡Na mundar tut kai sa sam kate!

²⁹ Ondaka gua lleno mangla iek villelo, ta dia prastindo, ta izdramno daratar chudiape pe porrne e Pabloke ta e Silaseke.

³⁰ Mapalal ikandalen ta puchla len: —Manusalen, ¿so morabi te cherau te bradui man?

³¹ Von ppende leke: —Pacha ando Gazda o Jesus, ta ka le o braduipe tu ta chi familia.

³² Ta o Pablo ta o Silas die leke orba katar o Gazda ta sa e llenenge kai sea ande leko cher.

³³ Isto ande gua saiato e rachako, o lleno kai arakkela e rubie jalada lenge rrane, ta mapalal kristisailo vou ta sa leki familia.

³⁴ Mapalal inllarda len kai po cher ta dia len te jan, a vou ta leki familia sea but vesele soke pachaie ando Del.

³⁵ Ttiarinako rano, e krisaria bichalde nesave boñikonen kai o lleno kai arakkela e rubie ta ppende leke te mukliarel e Pablo ta e Silase.

³⁶ O lleno kai arakkela e rubie ppenda e Pabloke: —E krisaria ppende mange te mukliarau tumen; akana sai llantar.

³⁷ A o Pablo ppenda e boñikonenge: —Amen, kai sam romanura, chaladen amen angla e llene ta ni cherden amenge ni iek kris, ta ttoden amen ande rubie; ¿Ta akana mangen te mukliaren amen po chorial? ¡Iok! Te aven isto von te ikanen amen.

³⁸ E boñikura llele kai e krisaria ta ppende lenge, a e krisaria daraile soke asunde kai von sea romanura.

³⁹ Ta e krisaria llele kai o Pablo ta o Silas, te prostin len, ta ikande len katar e rubie ta mangle lendar te llantar katar o foro.

⁴⁰ Kana likiste katar e rubie, o Pablo ta o Silas llele karing e Lidiako cher, die orba e pplalenchar ta die len zor, ta mapalal lleletar katar o foro.