Apostole 13 - Nuevo Testamento Romané 2007

O Bernabe ta o Saulo radin e Devleke

¹ Ande kkanlliri kai si ande Antiokia sea poraukura ta kovacha. Gola llene sea o Bernabe, o Simon (kai ikkarena le Kalo), o Lusio katar o Sirene, o Menajem (kai bariloia e Erodesea, gua kai gazdarisarda ande Galilea) ta o Saulo.

² Iek llive, kana von blagosina e Devle ta kana allunina, o Santo Duo ppenda: “ttoven mange pe iek rig e Bernebee ta e Saulo te radin ande buchi kai ikkardem len.”

³ Ondaka kana molisaile ta allunisarde, ttode pe va pe lende ta ppende lenge te llantar.

O Bernabe ta o Saulo ando Chipre

⁴ O Santo Duo bichalda e Bernebee ta e Saulo ande Seleusia, ta kotar lleletar ande iek llimia ando Chipre.

⁵ Kana avile ando Salamina, ttode te ppenen e orba e Devleki ande kkanllira e judionengi. Ta i o Juan llala lenchar te pomozil len.

⁶ Ppirde sa goia isla ta avile ando Pafos, kote malade iekke llene kai saia judio ta kai saia chirimatarko kai ikkardola Barjesus; vou saia iek kojamno porauko.

⁷ O chirimatarko saia amal katar o sudo o Serjio Paulo, iek lleno bizai. O sudo ppenda te anen e Bernabee ta e Pedro, soke mangela te asunel e orba e Devleke.

⁸ A o chirimatarko, kai leko anau ande chib katar e griegura saia Elimas, ni kamla soke ni kamela te pachal o sudo.

⁹ Ondaka o Saulo, kai ikkarena le Pablo, pperdo katar o Santo Duo achilo ta dikkla pe lete

¹⁰ ta ppenda leke: —¡Tu san kojamno, bilacho, chavo e llavoloko ta murzi po lachipe! Tu ppene kai o Gazda bichalda tut te de leke orbe. Na ppen ios gua kojaipe

¹¹ Akana o Gazda ka ttovel tut ande patnia: Ka ache korro nesavo vreme ta nasti ka dikke o villelo e kkameko. Ondaka isto kote o Elimas achilo korro, ta rodela vareka te inllarel le e vastetar soke achilo korro.

¹² Ondaka o sudo kana dikkla gaia ezgoda kai nakkla, pachaia ta chudisailo katar o sikadipe e Gazdako.

O Pedro ta o Bernabe ande Antiokia katar e Pisidia

¹³ O Pablo ta e llene kai llana lea llele katar o Pafos llik kai o Perjes kai achel ande ppuv katar e Panfilia, kote o Juan mukla len ta irisailo ando Jerusalem.

¹⁴ Katar o Parje llele ande Antiokia katar e Pisidia. Kote ando sabado die ande kkanlliri e judionengi ta besle.

¹⁵ Mapalal kana chitisaila o zakono ta o pisipe katar e poraukura, e gazde katar e kkanlliri ikkarde len ta ppende lenge: —Ppalalen, te si tumen vareso te ppenen te del zor e llenen, ppenenle akana.

¹⁶ Ondaka o Pedro ustilo ta cherda lenge e vastea te achen, ta ppenda lenge te na den orba: —Asunen tumen, israelitura, ta i tumen kai inai sen judiura ta kai daran e Devletar.

¹⁷ O Del katar e Israeleko foro esvirisarda amare puranen ta cherda len iek foro baro kana von zivina ando Ejipto, kote kai ni saia lengi ppuv; ta mapalal, pe zoriaia ikanda len katar goia ppuv.

¹⁸ Ta o Del terpisarda so cherena ando pusto preko saranda burs,

¹⁹ ta zatrisarda efta ppuvien ando Kanaan te sai del gola ppuvia kai amare purane.

²⁰ Nakkle preko star stotine ta pinda burs, ta ande gola burs nakkle sa gala ezgode. —“Mapalal o Del bichalda lenge krisaria llik kai e llivesa katar o porauko o Samuel.

²¹ Ondaka von mangle iek charo te gazdaril i pe lende, ta o Del dia len saranda burs e charo e Sauleko, chavo e Kiseko kai saia katar e vicha katar o Benjamin.

²² Mapalal o Del ikanda katar gua ttan e Saule ta dia len charo e Davide, ta ppenda letar: ‘Dikklem kai o David chavo e Jeseeko, si iek lleno kai si ande mi dragostia ta kai mangel te cherel sa so me mangau.’

²³ Ta iek katar e vicha gale Davideki saia o Jesus; le bichalda o Del te braduil e Israele gia sar ppendaia.

²⁴ Mai anglal te avel o Jesus, o Juan gua kai kristila, ppenela e porouka sa e foroke katar o Israel, ta ppenela lenge kai saia te irinpe kai o Del ta aven kristime.

²⁵ Ta kana saia pase o meripe e Juaneko, ppenda: ‘Me ni sem gua kai tumen mislin tumen, soke mapalal mandar ka avel iek manus kai me ni sem lacho ni te putarau leke minie.’

²⁶ “Ppalalen kai sen katar e vicha e Abraameki, ta i tumen kai inai sen judiura kai daran e Devletar: Gaia orba braduimaki si amenge.

²⁷ Soke gola kai zivin ando Jerusalem ta lenge gazde ni pachaie ando Jesus, ta kana von dosarde le, cherde so ppenena e poraukura kana chitinpe lenge alava ande kkanlliri e judionengi suako sabado.

²⁸ Ta i makar von ni malade ni iek dos te mundaren le, mangle katar o Pilato te ppenel te mundaren le.

²⁹ Mapalal kana cherde sa so ppenela letar ando Pisipe, fuliarde le katar o krusto ta prajosarde le.

³⁰ A o Del cherda le te ustel katar o meripe.

³¹ Ta but llivesa, sikadilo e llenenge kai llelea lea katar e Galilea ando Jerusalem; ta akana von si kai ppenen sa e foroke ko si o Jesus.

³² “Goleke amen ppena tumenge gaia lachi viasta katar o alau kai dia o Del amare puranenge.

³³ Ta o Del cherda so ppenda kana dia po alau, soke cherda te ustel e Jesuse katar o meripe ta gia avilape sar si pisime ando duito salmo: ‘Tu san mo Chavo; me diem tut o zivoto allive.’

³⁴ O Del ppendaia kai ka cherel le te ustel katar o meripe te na murilpe leki esnaga kana ppenda ande pe alava: ‘Ka cherau te avenpe e chache ta sante alava kai ppendem e Davideke.’

³⁵ Goleke ppenel ando aver salmo: ‘Ni ka muke te murilpe e esnaga katar cho santo esluga.’

³⁶ Chachimaia o David blazisarda e llenenge ande gola llivesa prema sar ppenda leke o Del, ta mapalal mulo ta chidinailo pe puranenchar, ta leki esnaga murisali.

³⁷ A e esnaga goleki kai o Del cherda le te ustel katar o meripe, ni murisali.

³⁸ Ppalalen, gaia si e viasta kai tumen morabi te llanen, kai o prostipe katar o bilachipe ppendol tumenge katar o Jesus.

³⁹ Ta cheres lete sa gola llene kai pachan achen prostime katar suako ezgoda ta gava kai lien nasti lienle katar o zakono e Moiseseko.

⁴⁰ Arakken tumen, te na perel pe tumende e alava kai pisisarde e poraukura:

⁴¹ ‘Dikken, tumen kai maren espurnia, chudin tumen ta nasen; soke ande tumare llivesa ka cherau iek ezgode kai i te ppenela la vareko tumenge ni ka pachanle.’ ”

⁴² Kana o Pablo ta e llene kai llana lea likiste katar e kkanlliri e judionengi, mangle lendar o gua sabado kai ka avel te den lenge orba i katar gala ezgode.

⁴³ Kana getosarde e orba ande kkanlliri e judionengi, but judiura ta i llene kai cherdilea judiura llele pala lende ta gale llenenge o Pablo ta o Bernabe ppende lenge te na jasaren po pachape ando volipe e Devleko.

⁴⁴ A o gua sabado kai avilo, preko sa o foro chidinailo te asunen e orba e Gazdaki.

⁴⁵ A kana e judiura dikkle kai sea but llene, jolaile but ta ttode te janpe e Pabloia ta te kusen le.

⁴⁶ Ondaka o Pablo ta o Bernabe, die orba tromanimaia, ta ppende lenge: —Amen morabi te ppena e alava e Devleke mai anglal tumenge, kai sen judiura; a sar tumen ni kamen ta ppenen kai ni sen lache te len o zivoto ostade, amen ka lla kai e llene kai inai judiura.

⁴⁷ Soke o Gazda ppenda amenge te chera gia kana ppenda: ‘Ttodem tut sargo villelo e suetoke, te inllare mo braduipe pe riga kai si mai dur katar e ppuv.’

⁴⁸ Kana asunde gala orbe, e llene kai inai sea judiura veselisaile ta ppende kai e orba e Gazdaki saia lachi; ta pachaie kai lenge sai chinado te avel len o zivoto ostade.

⁴⁹ Ta gia die orba katar e porouka e Gazdaki ande sa gola forura.

⁵⁰ A e judiura die orba nesave diskinienchar kai pachana ta kai e llene dena len liubao lenchar, ta die orba i e llenenchar kai sea mai asunde ando foro, ta ppende lenge te maren e Pablo ta e Bernabee, te traden len katar gola forura.

⁵¹ Ondaka o Pablo ta o Bernabe chinosarde o prajo katar pe porrne te llangliolpe kai ni avila lenge drago so cherde gola llene, ta lleletar ando Ikonio.

⁵² A e llene kai pachana sea pperde katar o Santo Duo ta sea but vesele.