Apostole 12 - Nuevo Testamento Romané 2007

Mundaren e Jakobo ta ppanden e Pedro

¹ Ande gola llivesa, o charo o Erodes rodia nesave llenen katar e kkanlliri te maren len.

² Ta ppenda te mundaren e jarniaia e Jakobo, pplal e Juaneko;

³ Ta sar dikkla kai so cherda avila drago e judionenge, cherda te ppanden i e Pedro. Gala ezgode nakkle ande llivesa katar e Paskua, kana jalpe o marrno kai inai le levadura.

⁴ Ta kana ppangle le, o Erodes ttoda e Pedro ande rubie, ta arakkena le desusou boñikura, chidine sa po star. Mangela te sikavel le e foroke kana ka nakkel e Paskua.

⁵ O Pedro saia ande rubie, ta arakkena le zurale, a e llene katar e kkanlliri molinape e Devleke pala le sa pe liea.

Iek suecho ikanel e Pedro katar e rubie

⁶ Ta kana o Erodes mangela te sikavel le e foroke isto goia riat, o Pedro sovela maskar dui boñikura, ppanglo duie lanchonenchar, a aver boñikura sea po udar ta arakkena e rubie.

⁷ Ondaka sikadilo iek suecho e Gazdako, ta ande rubie avilape iek baro villelo. Ta o suecho dodisarda e Pedro pe iek rig ta llungada le ta ppenda leke: “¡Uste oma!” Ondaka, e lanchura peletar katar e Pedroke va,

⁸ ta o suecho ppenda leke: “Ttou pe tute che patave ta che minie.” O Pedro kandia le, ta o suecho ppenda leke: “Ttou cho gertachi ta aide pala ma.”

⁹ Ondaka o Pedro llelo pala o suecho ta ni llanela dal saia istina o iok so cherela o suecho. Vou mislila kai sikadila leke sargo iek suno.

¹⁰ Ta kana nakkle katar e dui ttana kai sea e boñikura, avile kai o udar sastruno kai likel kai o drom; o udar putailo korkorre. Ta kana likiste avri, ppirde pe gua drom, ta o suecho mukla le korkorre.

¹¹ Ondaka o Pedro acharda ta ppenda: “Akana llanau kai chachimaia o Del bichalda pe suecho te ikanel man katar e va e Erodeseke ta katar sa so mangena te cheren mange e judiura.”

¹² Kana o Pedro acharda gala ezgode llelotar kai e Mariako cher, e dei katar o Juan, kai ikkarena le Markos, kote chidinailea but llene ta molinape.

¹³ O Pedro saia po udar kai dela po drom, ta dela len mui. A iek chorri kai ikkardola Rode lleli avri te dikkel ko saia.

¹⁴ Ta kana pinllarda e Pedroko avazi, gia bari saia laki veselia kai ni putarda o udar, voi lleli prastindo te ppenel e llenenge kai o Pedro saia po udar.

¹⁵ A von ppende lake: —¡So san dili! A voi ppenela kai de istina o Pedro saia avri. Von ppenena: —Inai vou; gua si leko suecho.

¹⁶ A o Pedro pale dela len mui po udar. Ta kana putarde o udar ta dikkle le, daraile.

¹⁷ A o Pedro e vastea ppenda lenge te achen, ta ppenda lenge sar o Del ikanda le katar e rubie. Ta ppenda: —Ppenen gava e Santiagoke ta e ppalenge. Mapalal likisto ta llelotar pe aver rig.

¹⁸ Ttiarinako, avilape iek bari burkania maskar e boñikura soke ni llanena so avilape e Pedroia.

¹⁹ O Erodes ppenda te roden le, ta sar nasti malada le, dosarda e boñikonen ta ppenda te mundaren len. Kana nakkle gala ezgode o Erodes llelotar katar e Judea ta llelo te zivil ande Sesarea.

O Meripe e Erodeseko

²⁰ O Erodes jolailoa e llenenchar kai zivina ando Tiro ta ando Sidon, a von diepe orba maskar pete te llan lete. Cherde te peren drago e Blastoke, iek baro sudo e charoko o Erodes, ta mangle letar te del orba pala lende te na avel joli maskar lende, soke o Tiro ta o Sidon lena sa so trubul len katar e ppuv e charoki.

²¹ O Erodes ppenda lenge te aven iek llive, ta furiadilo e patavenachar kai ttoven pe pete e charura, beslo pe pi estolicha e krisaki ta dia lenge orba.

²² Ondaka e llene ttode te urkin ta ppende: “¡Gava kai del orba inai iek manus, vou si iek del!”

²³ Ondaka isto kote, iek suecho e Gazdako cherda te nasuaol o Erodes, soke ni blagosisarda e Devle, ta jale le e cherme ta mulo.

²⁴ A o alau e Devleko sa mai pinllardo cherdola ta ppenenale pe suako rig.

²⁵ Kana o Bernabe ta o Saulo getosarde po rado ando Jerusalem, irisaile ta inllarde pea e Juane, kai ikkarena le Markos.